శ్రీ మాతంగీ స్తోత్రం 1 PDF తెలుగు

|| శ్రీ మాతంగీ స్తోత్రం 1 ||

ఈశ్వర ఉవాచ |
ఆరాధ్య మాతశ్చరణాంబుజే తే
బ్రహ్మాదయో విస్తృతకీర్తిమాపుః |
అన్యే పరం వా విభవం మునీంద్రాః
పరాం శ్రియం భక్తిభరేణ చాన్యే || ౧

నమామి దేవీం నవచంద్రమౌళే-
-ర్మాతంగినీం చంద్రకళావతంసామ్ |
ఆమ్నాయప్రాప్తిప్రతిపాదితార్థం
ప్రబోధయంతీం ప్రియమాదరేణ || ౨ ||

వినమ్రదేవాసురమౌళిరత్నై-
-ర్నీరాజితం తే చరణారవిందమ్ |
భజంతి యే దేవి మహీపతీనాం
వ్రజంతి తే సంపదమాదరేణ || ౩ ||

కృతార్థయంతీం పదవీం పదాభ్యా-
-మాస్ఫాలయంతీం కృతవల్లకీం తామ్ |
మాతంగినీం సద్ధృదయాం ధినోమి
లీలాంశుకాం శుద్ధనితంబబింబామ్ || ౪ ||

తాలీదళేనార్పితకర్ణభూషాం
మాధ్వీమదోద్ఘూర్ణితనేత్రపద్మామ్ |
ఘనస్తనీం శంభువధూం నమామి
తటిల్లతాకాంతిమనర్ఘ్యభూషామ్ || ౫ ||

చిరేణ లక్ష్యం నవలోమరాజ్యా
స్మరామి భక్త్యా జగతామధీశే |
వలిత్రయాఢ్యం తమ మధ్యమంబ
నీలోత్పలాంశుశ్రియమావహంత్యాః || ౬ ||

కాంత్యా కటాక్షైః కమలాకరాణాం
కదంబమాలాంచితకేశపాశమ్ |
మాతంగకన్యాం హృది భావయామి
ధ్యాయేయమారక్తకపోలబింబమ్ || ౭ ||

బింబాధరన్యస్తలలామవశ్య-
-మాలీలలీలాలకమాయతాక్షమ్ |
మందస్మితం తే వదనం మహేశి
స్తుత్యానయా శంకరధర్మపత్నీమ్ || ౮ ||

మాతంగినీం వాగధిదేవతాం తాం
స్తువంతి యే భక్తియుతా మనుష్యాః |
పరాం శ్రియం నిత్యముపాశ్రయంతి
పరత్ర కైలాసతలే వసంతి || ౯ ||

ఉద్యద్భానుమరీచివీచివిలసద్వాసో వసానాం పరాం
గౌరీం సంగతిపానకర్పరకరామానందకందోద్భవామ్ |
గుంజాహారచలద్విహారహృదయామాపీనతుంగస్తనీం
మత్తస్మేరముఖీం నమామి సుముఖీం శావాసనాసేదుషీమ్ || ౧౦ ||

ఇతి శ్రీరుద్రయామలే మాతంగీ స్తోత్రమ్ |