శ్రీ నాగేశ్వర స్తుతిః PDF తెలుగు

శ్రీ నాగేశ్వర స్తుతిః తెలుగు Lyrics

|| శ్రీ నాగేశ్వర స్తుతిః ||

యో దేవః సర్వభూతానామాత్మా హ్యారాధ్య ఏవ చ |
గుణాతీతో గుణాత్మా చ స మే నాగః ప్రసీదతు || ౧ ||

హృదయస్థోఽపి దూరస్థః మాయావీ సర్వదేహినామ్ |
యోగినాం చిత్తగమ్యస్తు స మే నాగః ప్రసీదతు || ౨ ||

సహస్రశీర్షః సర్వాత్మా సర్వాధారః పరః శివః |
మహావిషస్యజనకః స మే నాగః ప్రసీదతు || ౩ ||

కాద్రవేయోమహాసత్త్వః కాలకూటముఖాంబుజః |
సర్వాభీష్టప్రదో దేవః స మే నాగః ప్రసీదతు || ౪ ||

పాతాళనిలయో దేవః పద్మనాభసుఖప్రదః |
సర్వాభీష్టప్రదో యస్తు స మే నాగః ప్రసీదతు || ౫ ||

నాగనారీరతో దక్షో నారదాది సుపూజితః |
సర్వారిష్టహరో యస్తు స మే నాగః ప్రసీదతు || ౬ ||

పృదాకుదేవః సర్వాత్మా సర్వశాస్త్రార్థపారగః |
ప్రారబ్ధపాపహంతా చ స మే నాగః ప్రసీదతు || ౭ ||

లక్ష్మీపతేః సపర్యంకః శంభోః సర్వాంగభూషణః |
యో దేవః పుత్రదో నిత్యం స మే నాగః ప్రసీదతు || ౮ ||

ఫణీశః పరమోదారః శాపపాపనివారకః |
సర్వపాపహరో యస్తు స మే నాగః ప్రసీదతు || ౯ ||

సర్వమంగళదో నిత్యం సుఖదో భుజగేశ్వరః |
యశః కీర్తిం చ విపులాం శ్రియమాయుః ప్రయచ్ఛతు || ౧౦ ||

మనోవాక్కాయజనితం జన్మజన్మాంతరార్జితమ్ |
యత్పాపం నాగదేవేశ విలయం యాతు సంప్రతి || ౧౧ ||

నీరోగం దేహపుష్టిం చ సర్వవశ్యం ధనాగమమ్ |
పశుధాన్యాభివృద్ధిం చ యశోవృద్ధిం చ శాశ్వతమ్ || ౧౨ ||

పరవాక్ స్తంభినీం విద్యాం వాగ్మిత్వం సూక్ష్మబుద్ధితామ్ |
పుత్రం వంశకరం శ్రేష్ఠం దేహి మే భక్తవత్సల || ౧౩ ||

ఇతి శ్రీ నాగేశ్వర స్తుతిః ||