श्री लक्ष्मीनृसिंह षोडशोपचार पूजा PDF संस्कृत

श्री लक्ष्मीनृसिंह षोडशोपचार पूजा संस्कृत Lyrics

|| श्री लक्ष्मीनृसिंह षोडशोपचार पूजा ||

पुनः सङ्कल्पम् –
पूर्वोक्त एवं गुण विशेषण विशिष्टायां शुभ तिथौ श्री लक्ष्मी समेत नृसिंह स्वामिनः अनुग्रहप्रसाद सिद्ध्यर्थं श्री लक्ष्मीनृसिंह स्वामिनः प्रीत्यर्थं पुरुष सूक्त विधानेन ध्यान आवाहनादि षोडशोपचार पूजां करिष्ये ।

प्राणप्रतिष्ठ –
ओं असु॑नीते॒ पुन॑र॒स्मासु॒ चक्षु॒:
पुन॑: प्रा॒णमि॒ह नो᳚ धेहि॒ भोग᳚म् ।
ज्योक्प॑श्येम॒ सूर्य॑मु॒च्चर᳚न्त॒
मनु॑मते मृ॒डया᳚ नः स्व॒स्ति ॥
अ॒मृतं॒ वै प्रा॒णा अ॒मृत॒माप॑:
प्रा॒णाने॒व य॑थास्था॒नमुप॑ह्वयते ॥
साङ्गं सायुधं सवाहनं सशक्तिं सपरिवारसमेतं श्रीलक्ष्मी सहित नृसिंह स्वामिनं आवाहयामि स्थापयामि पूजयामि ॥
स्थिरो भव वरदो भव सुमुखो भव सुप्रसन्नो भव स्थिरासनं कुरु प्रसीद प्रसीद ।

स्वामिन् सर्वजगन्नाथ यावत्पूजावसानकम् ।
तावत्त्वं प्रीतिभावेन बिम्बेऽस्मिन् सन्निधिं कुरु ॥

ध्यानम् –
लक्ष्मीशोभितवामभागममलं सिंहासने सुन्दरं
सव्ये चक्रधरं च निर्भयकरं वामेन चापं वरम् ।
सर्वाधीशकृतान्तपत्रममलं श्रीवत्सवक्षःस्थलं
वन्दे देवमुनीन्द्रवन्दितपदं लक्ष्मीनृसिंहं विभुम् ॥
ओं श्री लक्ष्मीनृसिंहाय नमः ध्यायामि ध्यानम् समर्पयामि ।

आवाहनम् –
स॒हस्र॑शीर्षा॒ पुरु॑षः ।
स॒ह॒स्रा॒क्षः स॒हस्र॑पात् ।
स भूमिं॑ वि॒श्वतो॑ वृ॒त्वा ।
अत्य॑तिष्ठद्दशाङ्गु॒लम् ॥
आगच्छ देवदेवेश तेजोराशे जगत्पते ।
क्रियमाणां मया पूजां गृहाण सुरसत्तमे ॥
ओं श्री लक्ष्मीनृसिंहाय नमः आवाहयामि ।

आसनम् –
पुरु॑ष ए॒वेदग्ं सर्वम्᳚ ।
यद्भू॒तं यच्च॒ भव्यम्᳚ ।
उ॒तामृ॑त॒त्वस्येशा॑नः ।
य॒दन्ने॑नाति॒रोह॑ति ॥
नाना रत्नसमायुक्तं कार्तस्वरविभूषितम् ।
आसनं देवदेवेश प्रीत्यर्थं प्रतिगृह्यताम् ॥
ओं श्री लक्ष्मीनृसिंहाय नमः नवरत्नखचित सुवर्ण सिंहासनं समर्पयामि ।

पाद्यम् –
ए॒तावा॑नस्य महि॒मा ।
अतो॒ ज्यायाग्॑श्च॒ पूरु॑षः ।
पादो᳚ऽस्य॒ विश्वा॑ भू॒तानि॑ ।
त्रि॒पाद॑स्या॒मृतं॑ दि॒वि ॥
गङ्गादि सर्वतीर्थेभ्यः मया प्रार्थनयाहृतम् ।
लक्ष्मीनृसिंह पाद्यर्थं इदं तोयं गृहाण भोः ॥
ओं श्री लक्ष्मीनृसिंहाय नमः पादयोः पाद्यं समर्पयामि ।

अर्घ्यम् –
त्रि॒पादू॒र्ध्व उदै॒त्पुरु॑षः ।
पादो᳚ऽस्ये॒हाऽऽभ॑वा॒त्पुन॑: ।
ततो॒ विष्व॒ङ्व्य॑क्रामत् ।
सा॒श॒ना॒न॒श॒ने अ॒भि ॥
नमस्ते देवदेवेश नमस्ते धरणीधर ।
नमस्ते कमलाकान्त गृहाणार्घ्यं नमोऽस्तु ते ॥
ओं श्री लक्ष्मीनृसिंहाय नमः हस्तयोः अर्घ्यं समर्पयामि ।

आचमनीयम् –
तस्मा᳚द्वि॒राड॑जायत ।
वि॒राजो॒ अधि॒ पूरु॑षः ।
स जा॒तो अत्य॑रिच्यत ।
प॒श्चाद्भूमि॒मथो॑ पु॒रः ॥
कर्पूरवासितं तोयं मन्दाकिन्यः समाहृतम् ।
आचम्य तां जगन्नाथ मया दत्तं हि भक्तितः ॥
ओं श्री लक्ष्मीनृसिंहाय नमः मुखे आचमनीयं समर्पयामि ।

मधुपर्कम् –
नमः श्री वासुदेवाय तत्त्वज्ञानस्वरूपिणे ।
मधुपर्कं गृहाणेदं श्रीलक्ष्मीपतये नमः ॥
ओं श्री लक्ष्मीनृसिंहाय नमः मधुपर्कं समर्पयामि ।

पञ्चामृत स्नानम् –
दधि क्षीराज्य मधुभिः शर्करा फलमिश्रितम् ।
पञ्चामृतस्नानमिदं गृहाण पुरुषोत्तम ॥
ओं श्री लक्ष्मीनृसिंहाय नमः पञ्चामृत स्नानं समर्पयामि ।

शुद्धोदक स्नानम् –
यत्पुरु॑षेण ह॒विषा᳚ ।
दे॒वा य॒ज्ञमत॑न्वत ।
व॒स॒न्तो अ॑स्यासी॒दाज्यम्᳚ ।
ग्री॒ष्म इ॒ध्मश्श॒रद्ध॒विः ॥
सुगन्धपुष्पसम्युक्तं पवित्रं विमलं जलम् ।
स्नानार्थं हि मयानीतं स्वीकुरुष्व महामते ॥

आपो॒ हिष्ठा म॑यो॒भुव॒स्ता न॑ ऊ॒र्जे द॑धातन ।
म॒हेरणा॑य॒ चक्ष॑से ।
यो व॑: शि॒वत॑मो रस॒स्तस्य॑ भाजयते॒ ह न॑: ।
उ॒श॒तीरि॑व मा॒त॑रः ।
तस्मा॒ अर॑ङ्गमामवो॒ यस्य॒ क्षया॑य॒ जिन्व॑थ ।
आपो॑ ज॒नय॑था च नः ।

ओं श्री लक्ष्मीनृसिंहाय नमः शुद्धोदक स्नानं समर्पयामि ।
स्नानानन्तरं शुद्ध आचमनीयं समर्पयामि ।

वस्त्रम् –
स॒प्तास्या॑सन्परि॒धय॑: ।
त्रिः स॒प्त स॒मिध॑: कृ॒ताः ।
दे॒वा यद्य॒ज्ञं त॑न्वा॒नाः ।
अब॑ध्न॒न्पुरु॑षं प॒शुम् ॥
तप्तकाञ्चनसङ्काशं पीताम्बरमिदं हरे ।
सङ्गृहाण जगन्नाथ नारायण नमोऽस्तु ते ॥
ओं श्री लक्ष्मीनृसिंहाय नमः वस्त्रयुग्मं समर्पयामि ।

यज्ञोपवीतम् –
तं य॒ज्ञं ब॒र्हिषि॒ प्रौक्षन्॑ ।
पुरु॑षं जा॒तम॑ग्र॒तः ।
तेन॑ दे॒वा अय॑जन्त ।
सा॒ध्या ऋष॑यश्च॒ ये ॥
ब्रह्मविष्णुमहेशश्च निर्मितं ब्रह्मसूत्रकम् ।
उपवीतं मया दत्तं गृहाण कमलापतिः ॥
ओं श्री लक्ष्मीनृसिंहाय नमः यज्ञोपवीतं समर्पयामि ।

गन्धम् –
तस्मा᳚द्य॒ज्ञात्स॑र्व॒हुत॑: ।
सम्भृ॑तं पृषदा॒ज्यम् ।
प॒शूग्‍स्ताग्‍श्च॑क्रे वाय॒व्यान्॑ ।
आ॒र॒ण्यान्ग्रा॒म्याश्च॒ ये ॥
चन्दनं शीतलं दिव्यं कस्तूरी कुङ्कुमं तथा ।
ददामि तव प्रीत्यर्थं नृसिंह परमेश्वरः ॥
ओं श्री लक्ष्मीनृसिंहाय नमः दिव्य श्री चन्दनं समर्पयामि ।

आभरणम् –
तस्मा᳚द्य॒ज्ञात्स॑र्व॒हुत॑: ।
ऋच॒: सामा॑नि जज्ञिरे ।
छन्दाग्ं॑सि जज्ञिरे॒ तस्मा᳚त् ।
यजु॒स्तस्मा॑दजायत ॥
भूषणानि विचित्रानि हेमरत्नमयानि च ।
गृहाण भुवनाधार भुक्तिमुक्तिफलप्रद ॥
ओं श्री लक्ष्मीनृसिंहाय नमः सर्वाभरणानि समर्पयामि ।

पुष्पाणि –
तस्मा॒दश्वा॑ अजायन्त ।
ये के चो॑भ॒याद॑तः ।
गावो॑ ह जज्ञिरे॒ तस्मा᳚त् ।
तस्मा᳚ज्जा॒ता अ॑जा॒वय॑: ॥
माल्यादीनि सुगन्धानि माल्यतादीनि वै प्रभो ।
मयाहृतानि पूजार्थं पुष्पाणि प्रतिगृह्यताम् ॥
ओं श्री लक्ष्मीनृसिंहाय नमः नानाविध परिमल पत्र पुष्पाणि समर्पयामि ।

अथाङ्ग पूज –
ओं नृसिंहाय नमः पादौ पूजयामि ।
ओं करालाय नमः गुल्फौ पूजयामि ।
ओं विकृताय नमः जानुनी पूजयामि ।
ओं नखाङ्कुराय नमः जङ्घैः पूजयामि ।
ओं प्रह्लादवरदाय नमः ऊरूं पूजयामि ।
ओं श्रीमते नमः गुह्यं पूजयामि ।
ओं अप्रमेयपराक्रमाय नमः जघनं पूजयामि ।
ओं भक्तानामभयप्रदाय नमः कटिं पूजयामि ।
ओं कुक्षिस्थाखिलभुवनाय नमः उदरं पूजयामि ।
ओं सर्वरक्षाय नमः हृदयं पूजयामि ।
ओं कपिलाय नमः पृष्ठदेहं पूजयमि ।
ओं शङ्खचक्रगदाशार्ङ्गपाणये नमः बाहून् पूजयामि ।
ओं स्थूलग्रीवाय नमः कण्ठं पूजयामि ।
ओं ज्वालामुखाय नमः वक्त्रं पूजयामि ।
ओं तीक्ष्णदंष्ट्राय नमः दन्तान् पूजयामि ।
ओं ब्रह्मण्याय नमः नासिकां पूजयामि ।
ओं भक्तवत्सलाय नमः श्रोत्रे पूजयामि ।
ओं सोमसूर्याग्निलोचनाय नमः नेत्रौ पूजयामि ।
ओं उग्राय नमः ललाटं पूजयामि ।
ओं हृषीकेशाय नमः शिरः पूजयामि ।
ओं श्री लक्ष्मीनृसिंहाय नमः सर्वाण्यङ्गानि पूजयामि ॥

अष्टोत्तरशतनामावली –

श्री नृसिंह अष्टोत्तरशतनामावली पश्यतु ।

धूपम् –
यत्पुरु॑षं॒ व्य॑दधुः ।
क॒ति॒धा व्य॑कल्पयन् ।
मुखं॒ किम॑स्य॒ कौ बा॒हू ।
कावू॒रू पादा॑वुच्येते ॥
वनस्पत्युद्भवो दिव्यो गन्धाद्यो गन्ध उत्तमः ।
नरसिंह महीपालो धुपोऽयं प्रतिगृह्यताम् ॥
ओं श्री लक्ष्मीनृसिंहाय नमः धूपं समर्पयामि ।

दीपम् –
ब्रा॒ह्म॒णो᳚ऽस्य॒ मुख॑मासीत् ।
बा॒हू रा॑ज॒न्य॑: कृ॒तः ।
ऊ॒रू तद॑स्य॒ यद्वैश्य॑: ।
प॒द्भ्याग्ं शू॒द्रो अ॑जायत ॥
भक्त्या दीपं प्रयच्छामि देवाय परमात्मने ।
त्राहि मां नरकाद्घोरात् दिव्य ज्योतिर्नमोऽस्तु ते ॥
ओं श्री लक्ष्मीनृसिंहाय नमः दीपं समर्पयामि ।

नैवेद्यम् –
च॒न्द्रमा॒ मन॑सो जा॒तः ।
चक्षो॒: सूर्यो॑ अजायत ।
मुखा॒दिन्द्र॑श्चा॒ग्निश्च॑ ।
प्रा॒णाद्वा॒युर॑जायत ॥
नैवेद्यं गृह्यतां देव भक्तिं मे अचलां कुरु ।
ईप्सितं मे वरं देहि इहत्र च परां गतिम् ॥
श्रीनृसिंह नमस्तुभ्यं महानैवेद्यमुत्तमम् ।
सङ्गृहाण सुरश्रेष्ठ भुक्तिमुक्तिप्रदायकम् ॥
ओं श्री लक्ष्मीनृसिंहाय नमः नैवेद्यं समर्पयामि ।

ओं भूर्भुव॒स्सुव॑: । तत्स॑वि॒तुर्वरे᳚ण्यं॒ भर्गो॑ दे॒वस्य॑ धीमहि ।
धियो॒ यो न॑: प्रचो॒दया᳚त् ॥

सत्यं त्वा ऋतेन परिषिञ्चामि ।
(सायङ्काले – ऋतं त्वा सत्येन परिषिञ्चामि)
अमृतमस्तु । अ॒मृ॒तो॒प॒स्तर॑णमसि ।
ओं प्रा॒णाय॒ स्वाहा᳚ । ओं अ॒पा॒नाय॒ स्वाहा᳚ ।
ओं व्या॒नाय॒ स्वाहा᳚ । ओं उ॒दा॒नाय॒ स्वाहा᳚ ।
ओं स॒मा॒नाय॒ स्वाहा᳚ ।
मध्ये मध्ये पानीयं समर्पयामि ।
अ॒मृ॒ता॒पि॒धा॒नम॑सि । उत्तरापोशनं समर्पयामि ।
हस्तौ प्रक्षालयामि । पादौ प्रक्षालयामि ।
शुद्धाचमनीयं समर्पयामि ।

ताम्बूलम् –
नाभ्या॑ आसीद॒न्तरि॑क्षम् ।
शी॒र्ष्णो द्यौः सम॑वर्तत ।
प॒द्भ्यां भूमि॒र्दिश॒: श्रोत्रा᳚त् ।
तथा॑ लो॒काग्ं अ॑कल्पयन् ॥
पूगीफल समायुक्तं नागवल्लीदलैर्युतम् ।
येला लवङ्ग सम्युक्तं ताम्बूलं देव गृह्यताम् ॥
ओं श्री लक्ष्मीनृसिंहाय नमः ताम्बूलं समर्पयामि ।

नीराजनम् –
वेदा॒हमे॒तं पुरु॑षं म॒हान्तम्᳚ ।
आ॒दि॒त्यव॑र्णं॒ तम॑स॒स्तु पा॒रे ।
सर्वा॑णि रू॒पाणि॑ वि॒चित्य॒ धीर॑: ।
नामा॑नि कृ॒त्वाऽभि॒वद॒न्॒ यदास्ते᳚ ॥
कर्पूरकं महाराज रम्भोद्भूतं च दीपकम् ।
मङ्गलार्थं महीपाल सङ्गृहाण जगत्पते ॥
ओं श्री लक्ष्मीनृसिंहाय नमः कर्पूर नीराजनं समर्पयामि ।
नीराजनानन्तरं शुद्धाचमनीयं समर्पयामि । नमस्करोमि ।

मन्त्रपुष्पम् –

[ मन्त्रपुष्पं पश्यतु ॥ ]

धा॒ता पु॒रस्ता॒द्यमु॑दाज॒हार॑ ।
श॒क्रः प्रवि॒द्वान्प्र॒दिश॒श्चत॑स्रः ।
तमे॒वं वि॒द्वान॒मृत॑ इ॒ह भ॑वति ।
नान्यः पन्था॒ अय॑नाय विद्यते ॥
ओं व॒ज्र॒न॒खाय॑ वि॒द्महे॑ तीक्ष्णद॒ग्ंष्ट्राय॑ धीमहि ।
तन्नो॑ नारसिग्ंहः प्रचो॒दया᳚त् ॥
ओं श्री लक्ष्मीनृसिंहाय नमः सुवर्ण दिव्य मन्त्रपुष्पं समर्पयामि ।

आत्मप्रदक्षिण नमस्कारम् –
यानिकानि च पापानि जन्मान्तरकृतानि च ।
तानि तानि प्रणश्यन्ति प्रदक्षिण पदे पदे ॥
पापोऽहं पापकर्माऽहं पापात्मा पापसम्भव ।
त्राहिमां कृपया देव शरणागतवत्सला ॥
अन्यथा शरणं नास्ति त्वमेव शरणं मम ।
तस्मात्कारुण्य भावेन रक्ष रक्ष रमापते ॥
ओं श्री लक्ष्मीनृसिंहाय नमः आत्मप्रदक्षिण नमस्कारान् समर्पयामि ।

साष्टाङ्ग नमस्कारम् –
नमः सर्वहितार्थाय जगदाधारहेतवे ।
साष्टाङ्गोऽयं प्रणामस्ते प्रयत्नेन मयाकृतः ॥
उरसा शिरसा दृष्ट्या मनसा वचसा तथा ।
पद्भ्यां कराभ्यां जानुभ्यां प्रणामोष्टाङ्गं उच्यते ॥
ओं श्री लक्ष्मीनृसिंहाय नमः साष्टाङ्ग नमस्कारां समर्पयामि ।

सर्वोपचाराः –
ओं श्री लक्ष्मीनृसिंहाय नमः छत्रं आच्छादयामि ।
ओं श्री लक्ष्मीनृसिंहाय नमः चामरैर्वीजयामि ।
ओं श्री लक्ष्मीनृसिंहाय नमः नृत्यं दर्शयामि ।
ओं श्री लक्ष्मीनृसिंहाय नमः गीतं श्रावयामि ।
ओं श्री लक्ष्मीनृसिंहाय नमः आन्दोलिकान्नारोहयामि ।
ओं श्री लक्ष्मीनृसिंहाय नमः अश्वानारोहयामि ।
ओं श्री लक्ष्मीनृसिंहाय नमः गजानारोहयामि ।
समस्त राजोपचारान् देवोपचारान् समर्पयामि ।

क्षमा प्रार्थन –
अपराध सहस्राणि क्रियन्तेऽहर्निशं मया ।
दासोऽयमिति मां मत्वा क्षमस्व पुरुषोत्तमा ॥
आवाहनं न जानामि न जानामि विसर्जनम् ।
पूजाविधिं न जानामि क्षमस्व कमलापते ॥
मन्त्रहीनं क्रियाहीनं भक्तिहीनं जनार्दन ।
यत्पूजितं मया देव परिपूर्णं तदस्तुते ॥

अनया पुरुषसूक्त विधान पूर्वक ध्यान आवाहनादि षोडशोपचार पूजया भगवान् सर्वात्मकः श्री लक्ष्मीनृसिंह स्वामी सुप्रीता सुप्रसन्ना वरदा भवन्तु ॥

तीर्थप्रसाद ग्रहणम् –
अकालमृत्यहरणं सर्वव्याधिनिवारणम् ।
समस्तपापक्षयकरं श्री लक्ष्मीनृसिंह पादोदकं पावनं शुभम् ॥
श्री लक्ष्मीनृसिंहाय नमः प्रसादं शिरसा गृह्णामि ।

ओं शान्तिः शान्तिः शान्तिः ॥