పశుపత్యష్టకం PDF తెలుగు

పశుపత్యష్టకం తెలుగు Lyrics

|| పశుపత్యష్టకం ||

ధ్యాయేన్నిత్యం మహేశం రజతగిరినిభం చారుచంద్రావతంసం
రత్నాకల్పోజ్జ్వలాంగం పరశుమృగవరాభీతిహస్తం ప్రసన్నమ్ |
పద్మాసీనం సమంతాత్ స్తుతమమరగణైర్వ్యాఘ్రకృత్తిం వసానం
విశ్వాద్యం విశ్వబీజం నిఖిలభయహరం పంచవక్త్రం త్రినేత్రమ్ ||

పశుపతిం ద్యుపతిం ధరణీపతిం
భుజగలోకపతిం చ సతీపతిమ్ |
ప్రణత భక్తజనార్తిహరం పరం
భజత రే మనుజా గిరిజాపతిమ్ || ౧ ||

న జనకో జననీ న చ సోదరో
న తనయో న చ భూరిబలం కులమ్ |
అవతి కోఽపి న కాలవశం గతం
భజత రే మనుజా గిరిజాపతిమ్ || ౨ ||

మురజడిండిమవాద్యవిలక్షణం
మధురపంచమనాదవిశారదమ్ |
ప్రమథభూతగణైరపి సేవితం
భజత రే మనుజా గిరిజాపతిమ్ || ౩ ||

శరణదం సుఖదం శరణాన్వితం
శివ శివేతి శివేతి నతం నృణామ్ |
అభయదం కరుణావరుణాలయం
భజత రే మనుజా గిరిజాపతిమ్ || ౪ ||

నరశిరోరచితం మణికుండలం
భుజగహారముదం వృషభధ్వజమ్ |
చితిరజోధవళీకృతవిగ్రహం
భజత రే మనుజా గిరిజాపతిమ్ || ౫ ||

మఖవినాశకరం శశిశేఖరం
సతతమధ్వరభాజి ఫలప్రదమ్ |
ప్రళయదగ్ధసురాసురమానవం
భజత రే మనుజా గిరిజాపతిమ్ || ౬ ||

మదమపాస్య చిరం హృది సంస్థితం
మరణజన్మజరాభయపీడితమ్ |
జగదుదీక్ష్య సమీపభయాకులం
భజత రే మనుజా గిరిజాపతిమ్ || ౭ ||

హరివిరంచిసురాధిపపూజితం
యమజనేశధనేశనమస్కృతమ్ |
త్రినయనం భూవనత్రితయాధిపం
భజత రే మనుజా గిరిజాపతిమ్ || ౮ ||

పశుపతేరిదమష్టకమద్భుతం
విరచితం పృథివీపతిసూరిణా |
పఠతి సంశృణుతే మనుజః సదా
శివపురీం వసతే లభతే ముదమ్ || ౯ ||

ఇతి శ్రీపృథివీపతిసూరివిరచితం శ్రీపశుపత్యష్టకమ్ |