ಶ್ರೀ ರಾಮಚಂದ್ರ ಸ್ತುತಿಃ
ನಮಾಮಿ ಭಕ್ತವತ್ಸಲಂ ಕೃಪಾಲು ಶೀಲಕೋಮಲಂ
ಭಜಾಮಿ ತೇ ಪದಾಂಬುಜಂ ಹ್ಯಕಾಮಿನಾಂ ಸ್ವಧಾಮದಮ್ |
ನಿಕಾಮಶ್ಯಾಮಸುಂದರಂ ಭವಾಂಬುವಾರ್ಧಿಮಂದರಂ
ಪ್ರಫುಲ್ಲಕಂಜಲೋಚನಂ ಮದಾದಿದೋಷಮೋಚನಮ್ || ೧ ||
ಪ್ರಲಂಬಬಾಹುವಿಕ್ರಮಂ ಪ್ರಭೋಽಪ್ರಮೇಯವೈಭವಂ
ನಿಷಂಗಚಾಪಸಾಯಕಂ ಧರಂ ತ್ರಿಲೋಕನಾಯಕಮ್ |
ದಿನೇಶವಂಶಮಂಡನಂ ಮಹೇಶಚಾಪಖಂಡನಂ
ಮುನೀಂದ್ರಚಿತ್ತರಂಜನಂ ಸುರಾರಿಬೃಂದಭಂಜನಮ್ || ೨ ||
ಮನೋಜವೈರಿವಂದಿತಂ ಹ್ಯಜಾದಿದೇವಸೇವಿತಂ
ವಿಶುದ್ಧಬೋಧವಿಗ್ರಹಂ ಸಮಸ್ತದೂಷಣಾಪಹಮ್ |
ನಮಾಮಿ ಜಾನಕೀಪತಿಂ ಸುಖಾಕರಂ ಸತಾಂ ಗತಿಂ
ಭಜೇ ಸಶಕ್ತಿಸಾನುಜಂ ಶಚೀಪತಿಪ್ರಿಯಾನುಜಮ್ || ೩ ||
ತ್ವದಂಘ್ರಿಸೀಮ ಯೇ ನರಾ ಭಜಂತಿ ಹೀನಮತ್ಸರಾಃ
ಪತಂತಿ ನೋ ಭವಾರ್ಣವೇ ವಿತರ್ಕವೀಚಿಸಂಕುಲೇ |
ವಿವಿಕ್ತವಾಸಿನಃ ಸದಾ ಭಜಂತಿ ಮುಕ್ತಯೇ ಮುದಾ
ನಿರಸ್ಯ ಹೀಂದ್ರಿಯಾದಿಕಂ ಪ್ರಯಾಂತಿ ತೇ ಗತಿಂ ಸ್ವಕಮ್ || ೪ ||
ತ್ವಮೇಕಮದ್ಭುತಂ ಪ್ರಭುಂ ನಿರೀಹಮೀಶ್ವರಂ ವಿಭುಂ
ಜಗದ್ಗುರುಂ ಚ ಶಾಶ್ವತಂ ತುರೀಯಮೇವ ಕೇವಲಮ್ |
ಭಜಾಮಿ ಭಾವವಲ್ಲಭಂ ಸುಯೋಗಿನಾಂ ಸುದುರ್ಲಭಂ
ಸ್ವಭಕ್ತಕಲ್ಪಪಾದಪಂ ಸಮಸ್ತಸೇವ್ಯಮನ್ವಹಮ್ || ೫ ||
ಅನೂಪರೂಪಭೂಪತಿಂ ನತೋಽಹಮುರ್ವಿಜಾಪತಿಂ
ಪ್ರಸೀದ ಮೇ ನಮಾಮಿ ತೇ ಪದಾಬ್ಜಭಕ್ತಿ ದೇಹಿ ಮೇ |
ಪಠಂತಿ ಯೇ ಸ್ತವಂ ತ್ವಿದಂ ಸದಾದರೇಣ ತೇ ಪದಂ
ವ್ರಜಂತಿ ನಾತ್ರ ಸಂಶಯಂ ತ್ವದೀಯ ಭಕ್ತಿಸಂಯುತಾಃ || ೬ ||
ಇತಿ ಶ್ರೀರಾಮಚಂದ್ರ ಸ್ತುತಿಃ ||
Found a Mistake or Error? Report it Now
