శ్రీ సర్వమంగళా స్తోత్రం PDF తెలుగు

శ్రీ సర్వమంగళా స్తోత్రం తెలుగు Lyrics

|| శ్రీ సర్వమంగళా స్తోత్రం ||

బ్రహ్మోవాచ |
దుర్గే శివేఽభయే మాయే నారాయణి సనాతని |
జయే మే మంగళం దేహి నమస్తే సర్వమంగళే || ౧ ||

దైత్యనాశార్థవచనో దకారః పరికీర్తితః |
ఉకారో విఘ్ననాశార్థవాచకో వేదసమ్మతః || ౨ ||

రేఫో రోగఘ్నవచనో గశ్చ పాపఘ్నవాచకః |
భయశత్రుఘ్నవచనశ్చాఽఽకారః పరికీర్తితః || ౩ ||

స్మృత్యుక్తిస్మరణాద్యస్యా ఏతే నశ్యంతి నిశ్చితమ్ |
అతో దుర్గా హరేః శక్తిర్హరిణా పరికీర్తితా || ౪ ||

విపత్తివాచకో దుర్గశ్చాఽఽకారో నాశవాచకః |
దుర్గం నశ్యతి యా నిత్యం సా చ దుర్గా ప్రకీర్తితా || ౫ ||

దుర్గో దైత్యేంద్రవచనోఽప్యాకారో నాశవాచకః |
తం ననాశ పురా తేన బుధైర్దుర్గా ప్రకీర్తితా || ౬ ||

శశ్చ కళ్యాణవచన ఇకారోత్కృష్టవాచకః |
సమూహవాచకశ్చైవ వాకారో దాతృవాచకః || ౭ ||

శ్రేయః సంఘోత్కృష్టదాత్రీ శివా తేన ప్రకీర్తితా |
శివరాశిర్మూర్తిమతీ శివా తేన ప్రకీర్తితా || ౮ ||

శివో హి మోక్షవచనశ్చాఽఽకారో దాతృవాచకః |
స్వయం నిర్వాణదాత్రీ యా సా శివా పరికీర్తితా || ౯ ||

అభయో భయనాశోక్తశ్చాఽఽకారో దాతృవాచకః |
ప్రదదాత్యభయం సద్యః సాఽభయా పరికీర్తితా || ౧౦ ||

రాజశ్రీవచనో మాశ్చ యాశ్చ ప్రాపణవాచకః |
తాం ప్రాపయతి యా నిత్యం సా మాయా పరికీర్తితా || ౧౧ ||

మాశ్చ మోక్షార్థవచనో యాశ్చ ప్రాపణవాచకః |
తం ప్రాపయతి యా సద్యః సా మాయా పరికీర్తితా || ౧౨ ||

నారాయణార్ధాంగభూతా తేన తుల్యా చ తేజసా |
సదా తస్య శరీరస్థా తేన నారాయణీ స్మృతా || ౧౩ ||

నిర్గుణస్య చ నిత్యస్య వాచకశ్చ సనాతనః |
సదా నిత్యా నిర్గుణా యా కీర్తితా సా సనాతనీ || ౧౪ ||

జయః కల్యాణవచనో హ్యాకారో దాతృవాచకః |
జయం దదాతి యా నిత్యం సా జయా పరికీర్తితా || ౧౫ ||

సర్వమంగళశబ్దశ్చ సంపూర్ణైశ్వర్యవాచకః |
ఆకారో దాతృవచనస్తద్దాత్రీ సర్వమంగళా || ౧౬ ||

నామాష్టకమిదం సారం నామార్థసహసంయుతమ్ |
నారాయణేన యద్దత్తం బ్రహ్మణే నాభిపంకజే || ౧౭ ||

తస్మై దత్త్వా నిద్రితశ్చ బభూవ జగతాం పతిః |
మధుకైటభౌ దుర్దాంతౌ బ్రహ్మాణం హంతుముద్యతౌ || ౧౮ ||

స్తోత్రేణానేన స బ్రహ్మా స్తుతిం నత్వా చకార హ |
సాక్షాత్ స్తుతా తదా దుర్గా బ్రహ్మణే కవచం దదౌ || ౧౯ ||

ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే సప్తవింశోఽధ్యాయే బ్రహ్మకృత సర్వమంగళా స్తోత్రమ్ |