|| సుపర్ణ స్తోత్రం ||
దేవా ఊచుః |
త్వం ఋషిస్త్వం మహాభాగః త్వం దేవః పతగేశ్వరః |
త్వం ప్రభుస్తపనః సూర్యః పరమేష్ఠీ ప్రజాపతిః || ౧ ||
త్వమింద్రస్త్వం హయముఖః త్వం శర్వస్త్వం జగత్పతిః |
త్వం ముఖం పద్మజో విప్రః త్వమగ్నిః పవనస్తథా || ౨ ||
త్వం హి ధాతా విధాతా చ త్వం విష్ణుః సురసత్తమః |
త్వం మహానభిభూః శశ్వదమృతం త్వం మహద్యశః || ౩ ||
త్వం ప్రభాస్త్వమభిప్రేతం త్వం నస్త్రాణమనుత్తమమ్ |
త్వం గతిః సతతం త్వత్తః కథం నః ప్రాప్నుయాద్భయమ్ || ౪ ||
బలోర్మిమాన్ సాధురదీనసత్త్వః
సమృద్ధిమాన్ దుర్విషహస్త్వమేవ |
త్వత్తః సృతం సర్వమహీనకీర్తే
హ్యనాగతం చోపగతం చ సర్వమ్ || ౫ ||
త్వముత్తమః సర్వమిదం చరాచరం
గభస్తిభిర్భానురివావభాససే |
సమాక్షిపన్ భానుమతః ప్రభాం ముహుః
త్వమంతకః సర్వమిదం ధ్రువాధ్రువమ్ || ౬ ||
దివాకరః పరికుపితో యథా దహేత్
ప్రజాస్తథా దహసి హుతాశనప్రభ |
భయంకరః ప్రలయ ఇవాగ్నిరుత్థితో
వినాశయన్ యుగపరివర్తనాంతకృత్ || ౭ ||
ఖగేశ్వరం శరణముపాగతా వయం
మహౌజసం జ్వలనసమానవర్చసమ్ |
తడిత్ప్రభం వితిమిరమభ్రగోచరం
మహాబలం గరుడముప్యేత ఖేచరమ్ || ౮ ||
పరావరం వరదమజయ్యవిక్రమం
తవౌజసా సర్వమిదం ప్రతాపితమ్ |
జగత్ప్రభో తప్తసువర్ణవర్చసా
త్వం పాహి సర్వాంశ్చ సురాన్ మహాత్మనః || ౯ ||
భయాన్వితా నభసి విమానగామినో
విమానితా విపథగతిం ప్రయాంతి తే |
ఋషేః సుతస్త్వమసి దయావతః ప్రభో
మహాత్మనః ఖగవర కశ్యపస్య హ || ౧౦ ||
స మా క్రుధః జగతో దయాం పరాం
త్వమీశ్వరః ప్రశమముపైహి పాహి నః |
మహాశనిస్ఫురిత సమస్వనేన తే
దిశోంబరం త్రిదివమియం చ మేదినీ || ౧౧ ||
చలంతి నః ఖగ హృదయాని చానిశం
నిగృహ్య తాం వపురిదమగ్నిసన్నిభమ్ |
తవ ద్యుతిం కుపితకృతాంతసన్నిభాం
నిశమ్య నశ్చలతి మనోవ్యవస్థితమ్ || ౧౨ ||
ఏవం స్తుతః సుపర్ణస్తు దేవైః సర్షిగణైస్తదా |
తేజసః ప్రతిసంహారమాత్మనః స చకార హ || ౧౩ ||
ఇతి శ్రీమన్మహాభారతే ఆదిపర్వణి సుపర్ణస్తోత్రం సంపూర్ణమ్ |
Found a Mistake or Error? Report it Now
