|| ಶ್ರೀ ಜ್ಞಾನಪ್ರಸೂನಾಂಬಿಕಾ ಸ್ತೋತ್ರಂ ||
ಮಾಣಿಕ್ಯಾಂಚಿತಭೂಷಣಾಂ ಮಣಿರವಾಂ ಮಾಹೇಂದ್ರನೀಲೋಜ್ಜ್ವಲಾಂ
ಮಂದಾರದ್ರುಮಮಾಲ್ಯಭೂಷಿತಕುಚಾಂ ಮತ್ತೇಭಕುಂಭಸ್ತನೀಮ್ |
ಮೌನಿಸ್ತೋಮನುತಾಂ ಮರಾಳಗಮನಾಂ ಮಾಧ್ವೀರಸಾನಂದಿನೀಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೧ ||
ಶ್ಯಾಮಾಂ ರಾಜನಿಭಾನನಾಂ ರತಿಹಿತಾಂ ರಾಜೀವಪತ್ರೇಕ್ಷಣಾಂ
ರಾಜತ್ಕಾಂಚನರತ್ನಭೂಷಣಯುತಾಂ ರಾಜ್ಯಪ್ರದಾನೇಶ್ವರೀಮ್ |
ರಕ್ಷೋಗರ್ವನಿವಾರಣಾಂ ತ್ರಿಜಗತಾಂ ರಕ್ಷೈಕಚಿಂತಾಮಣಿಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೨ ||
ಕಲ್ಯಾಣೀಂ ಕರಿಕುಂಭಭಾಸುರಕುಚಾಂ ಕಾಮೇಶ್ವರೀಂ ಕಾಮಿನೀಂ
ಕಲ್ಯಾಣಾಚಲವಾಸಿನೀಂ ಕಲರವಾಂ ಕಂದರ್ಪವಿದ್ಯಾಕಲಾಮ್ |
ಕಂಜಾಕ್ಷೀಂ ಕಲಬಿಂದುಕಲ್ಪಲತಿಕಾಂ ಕಾಮಾರಿಚಿತ್ತಪ್ರಿಯಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೩ ||
ಭಾವಾತೀತಮನಃಪ್ರಭಾವಭರಿತಾಂ ಬ್ರಹ್ಮಾಂಡಭಾಂಡೋದರೀಂ
ಬಾಲಾಂ ಬಾಲಕುರಂಗನೇತ್ರಯುಗಳಾಂ ಭಾನುಪ್ರಭಾಭಾಸಿತಾಮ್ |
ಭಾಸ್ವತ್ಕ್ಷೇತ್ರರುಚಾಭಿರಾಮನಿಲಯಾಂ ಭವ್ಯಾಂ ಭವಾನೀಂ ಶಿವಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೪ ||
ವೀಣಾಗಾನವಿನೋದಿನೀಂ ವಿಜಯಿನೀಂ ವೇತಂಡಕುಂಭಸ್ತನೀಂ
ವಿದ್ವದ್ವಂದಿತಪಾದಪದ್ಮಯುಗಳಾಂ ವಿದ್ಯಾಪ್ರದಾಂ ಶಾಂಕರೀಮ್ |
ವಿದ್ವೇಷಿಣ್ಯಭಿರಂಜಿನೀಂ ಸ್ತುತಿವಿಭಾಂ ವೇದಾಂತವೇದ್ಯಾಂ ಶಿವಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೫ ||
ನಾನಾಭೂಷಿತಭೂಷಣಾದಿವಿಮಲಾಂ ಲಾವಣ್ಯಪಾಥೋನಿಧಿಂ
ಕಾಂಚೀಚಂಚಲಘಂಟಿಕಾಕಲರವಾಂ ಕಂಜಾತಪತ್ರೇಕ್ಷಣಾಮ್ |
ಕರ್ಪೂರಾಗರುಕುಂಕುಮಾಂಕಿತಕುಚಾಂ ಕೈಲಾಸನಾಥಪ್ರಿಯಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೬ ||
ಮಂಜೀರಾಂಚಿತಪಾದಪದ್ಮಯುಗಳಾಂ ಮಾಣಿಕ್ಯಭೂಷಾನ್ವಿತಾಂ
ಮಂದಾರದ್ರುಮಮಂಜರೀಮಧುಝರೀಮಾಧುರ್ಯಖೇಲದ್ಗಿರಾಮ್ |
ಮಾತಂಗೀಂ ಮಧುರಾಲಸಾಂ ಕರಶುಕಾಂ ನೀಲಾಲಕಾಲಂಕೃತಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೭ ||
ಕರ್ಣಾಲಂಬಿತಹೇಮಕುಂಡಲಯುಗಾಂ ಕಾದಂಬವೇಣೀಮುಮಾಂ
ಅಂಭೋಜಾಸನವಾಸವಾದಿವಿನುತಾಮರ್ಧೇಂದುಭೂಷೋಜ್ಜ್ವಲಾಮ್ |
ಕಸ್ತೂರೀತಿಲಕಾಭಿರಾಮನಿಟಿಲಾಂ ಗಾನಪ್ರಿಯಾಂ ಶ್ಯಾಮಲಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೮ ||
ಕೌಮಾರೀಂ ನವಪಲ್ಲವಾಂಘ್ರಿಯುಗಳಾಂ ಕರ್ಪೂರಭಾಸೋಜ್ಜ್ವಲಾಂ
ಗಂಗಾವರ್ತಸಮಾನನಾಭಿಕುಹರಾಂ ಗಾಂಗೇಯಭೂಷಾನ್ವಿತಾಮ್ |
ಚಂದ್ರಾರ್ಕಾನಲಕೋಟಿಕೋಟಿಸದೃಶಾಂ ಚಂದ್ರಾರ್ಕಬಿಂಬಾನನಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೯ ||
ಬಾಲಾದಿತ್ಯನಿಭಾನನಾಂ ತ್ರಿನಯನಾಂ ಬಾಲೇಂದುನಾ ಭೂಷಿತಾಂ
ನೀಲಾಕಾರಸುಕೇಶಿನೀ ವಿಲಸಿತಾಂ ನಿತ್ಯಾನ್ನದಾನಪ್ರದಾಮ್ |
ಶಂಖಂ ಚಕ್ರವರಾಭಯಂ ಚ ದಧತೀಂ ಸಾರಸ್ವತಾರ್ಥಪ್ರದಾಂ
ಧ್ಯಾಯೇ ಚೇತಸಿ ಕಾಳಹಸ್ತಿನಿಲಯಾಂ ಜ್ಞಾನಪ್ರಸೂನಾಂಬಿಕಾಮ್ || ೧೦ ||
ಇತಿ ಶ್ರೀ ಜ್ಞಾನಪ್ರಸೂನಾಂಬಿಕಾ ಸ್ತೋತ್ರಮ್ ||
Found a Mistake or Error? Report it Now
