|| Sri Rama Krishna Ashtottara Shatanama Stotram ||
śrīrāmacandraśrīkr̥ṣṇa sūryacandrakulōdbhavau |
kausalyādēvakīputrau rāmakr̥ṣṇau gatirmama || 1 ||
divyarūpau daśarathavasudēvātmasambhavau |
jānakīrukmiṇīkāntau rāmakr̥ṣṇau gatirmama || 2 ||
āyōdhyādvārakādhīśau śrīmadrāghavayādavau |
śrīkākutsthēndrarājēndrau rāmakr̥ṣṇau gatirmama || 3 ||
śāntāsubhadrāsōdaryau saumitrīgadapūrvajau |
trētādvāparasambhūtau rāmakr̥ṣṇau gatirmama || 4 ||
vilambiviśvāvasujau saumyadakṣāyaṇōdbhavau |
vasantavarṣar̥tujau rāmakr̥ṣṇau gatirmama || 5 ||
caitraśrāvaṇasambhūtau mēṣasiṁhākhyamāsajau |
sitāsitadalōdbhūtau rāmakr̥ṣṇau gatirmama || 6 ||
navamīsvaṣṭamījātau saumyavāsarasambhavau |
aditibrahmatārājau rāmakr̥ṣṇau gatirmama || 7 ||
madhyāhnārdhaniśōtpannau kulīravr̥ṣalagnajau |
dvātriṁśallakṣaṇōpētau rāmakr̥ṣṇau gatirmama || 8 ||
dūrvādalaghanaśyāmau dvicaturbāhusambhavau |
kōdaṇḍacakrahastābjau rāmakr̥ṣṇau gatirmama || 9 ||
vaśiṣṭhagārgyasacivau siddhārthōddhavamantriṇau |
gādhēyasāndīpiśiṣyau rāmakr̥ṣṇau gatirmama || 10 ||
lavapradyumnajanakau kuśasāmbasitānvitau |
hanumadgaruḍārūḍhau rāmakr̥ṣṇau gatirmama || 11 ||
tāṭakāpūtanārāti kharakaṁsaśirōharau |
kākakālīyadarpaghnau rāmakr̥ṣṇau gatirmama || 12 ||
kabandhanarakārātī virādhamuramardanau |
daśāsyaśiśupālaghnau rāmakr̥ṣṇau gatirmama || 13 ||
ahalyānr̥paśāpaghnau śivakaṁsadhanurbhidau |
līlāmānuṣarūpāḍhyau rāmakr̥ṣṇau gatirmama || 14 ||
daṇḍakāraṇyasañcārī br̥ndāvanavihāriṇau |
ēkā:’nēkakalatrāḍhyau rāmakr̥ṣṇau gatirmama || 15 ||
śabarī draupadīpūjyau jaṭāyurbhīṣmamuktidau |
munipāṇḍavasaṁrakṣau rāmakr̥ṣṇau gatirmama || 16 ||
jāmadagnyāhaṅkr̥tighna bāṇāsuramadāpahau |
jayānvitau jagatpūjyau rāmakr̥ṣṇau gatirmama || 17 ||
pitr̥vākyaikaniratau pitr̥bandhavimōcakau |
cīrapītāmbaradharau rāmakr̥ṣṇau gatirmama || 18 ||
sumantradārukābhikhyau sārathījagadīśvarau |
guhapārthapriyasakhau rāmakr̥ṣṇau gatirmama || 19 ||
parantapau śūrpaṇakhārukmivairūpyakāriṇau |
jambūkaśaṅkhacūḍaghnau rāmakr̥ṣṇau gatirmama || 20 ||
samudrasētunirmātr̥ samudrakr̥tapattanau |
mahāsatvamahāmāyau rāmakr̥ṣṇau gatirmama || 21 ||
vīrau viśvāmitradharmayajñarakṣaṇatatparau |
dr̥ḍhavratau sucaritau rāmakr̥ṣṇau gatirmama || 22 ||
trijaṭākhya kucēlākhya dvijadāridryahāriṇau |
yōgidhyēyapadāmbhōjau rāmakr̥ṣṇau gatirmama || 23 ||
mahātmānau saptatālayamalārjunabhañjanau |
mārutākrūravaradau rāmakr̥ṣṇau gatirmama || 24 ||
śivōpadiṣṭagītārtha pārthagītōpadēśakau |
vārdhīśa śakramānaghnau rāmakr̥ṣṇau gatirmama || 25 ||
dēvadēvau kumbhakarṇa dantavaktraniṣūdanau |
vālipauṇḍrakahantārau rāmakr̥ṣṇau gatirmama || 26 ||
dūṣaṇatriśirōhantr̥ sālvāghāsurasūdanau |
mārīca śakaṭadhvaṁsau rāmakr̥ṣṇau gatirmama || 27 ||
sugrīvēṣṭa jarāsandha tanayēpsitarājyadau |
satyavāk satyasaṅkalpau rāmakr̥ṣṇau gatirmama || 28 ||
vibhīṣaṇābhayaśrīda bhagadattā:’bhayapradau |
jaṭājūṭakirīṭādyau rāmakr̥ṣṇau gatirmama || 29 ||
citrakūṭācalāvāsi raivatācalalōlupau |
sarvabhūtahr̥dāvāsau rāmakr̥ṣṇau gatirmama || 30 ||
śarabhaṅgōttamapada mucukundavarapradau |
saccidānandarūpāḍhyau rāmakr̥ṣṇau gatirmama || 31 ||
r̥kṣavānarasēnāḍhya vr̥ṣṭiyādavasainikau |
parātparau jitāmitrau rāmakr̥ṣṇau gatirmama || 32 ||
r̥ṣisaṅghakr̥tātithya munipatnyarpitōdanau |
niramayau nirātaṅkau rāmakr̥ṣṇau gatirmama || 33 ||
dharādharavinirbhēttr̥ gōvardhanadharōddharau |
subāhu śatadhanvaghnau rāmakr̥ṣṇau gatirmama || 34 ||
daśāsyānvayasaṁhartr̥ duryōdhanakulāntakau |
sarvabhūtahitōdyuktau rāmakr̥ṣṇau gatirmama || 35 ||
mr̥taśākhāmr̥gōjjīvi mr̥tagōgōpajīvakau |
brahmēndrādistutiprītau rāmakr̥ṣṇau gatirmama || 36 ||
śivaliṅgapratiṣṭhātr̥ kr̥takailāsayātrakau |
nirañjanau niṣkalaṅkau rāmakr̥ṣṇau gatirmama || 37 ||
mr̥tadvijasutōjjīvi vinaṣṭa guruputradau |
nirmamau nirahaṅkārau rāmakr̥ṣṇau gatirmama || 38 ||
sarayū yamunātīra vihārāsaktamānasau |
vālmīkivyāsasaṁstutyau rāmakr̥ṣṇau gatirmama || 39 ||
bhūmīśārcitapādābja bhūbhāraparihārakau |
dharmasaṁsthāpanōdyuktau rāmakr̥ṣṇau gatirmama || 40 ||
rājarājaprītikara rājēndrānvayapālakau |
sarvābhīṣṭapradātārau rāmakr̥ṣṇau gatirmama || 41 ||
iti śrī rāmakr̥ṣṇa aṣṭōttaraśatanāma stōtram |
Found a Mistake or Error? Report it Now
