|| ஶ்ரீ ஸூர்ய ஸ்துதி꞉ (ப்³ரஹ்ம க்ருதம்) ||
ப்³ரஹ்மோவாச ।
ஆதி³தே³வோ(அ)ஸி தே³வாநாமைஶ்வர்யாச்ச த்வமீஶ்வர꞉ ।
ஆதி³கர்தா(அ)ஸி பூ⁴தாநாம் தே³வதே³வோ தி³வாகர꞉ ॥ 1 ॥
ஜீவந꞉ ஸர்வபூ⁴தாநாம் தே³வக³ந்த⁴ர்வரக்ஷஸாம் ।
முநிகிந்நரஸித்³தா⁴நாம் ததை²வோரக³பக்ஷிணாம் ॥ 2 ॥
த்வம் ப்³ரஹ்மா த்வம் மஹாதே³வஸ்த்வம் விஷ்ணுஸ்த்வம் ப்ரஜாபதி꞉ ।
வாயுரிந்த்³ரஶ்ச ஸோமஶ்ச விவஸ்வாந் வருணஸ்ததா² ॥ 3 ॥
த்வம் கால꞉ ஸ்ருஷ்டிகர்தா ச ஹர்தா ப⁴ர்தா ததா² ப்ரபு⁴꞉ ।
ஸரித꞉ ஸாக³ரா꞉ ஶைலா வித்³யுதி³ந்த்³ரத⁴நூம்ஷி ச ॥ 4 ॥
ப்ரளய꞉ ப்ரப⁴வஶ்சைவ வ்யக்தாவ்யக்த꞉ ஸநாதந꞉ ।
ஈஶ்வராத்பரதோ வித்³யா வித்³யாயா꞉ பரத꞉ ஶிவ꞉ ॥ 5 ॥
ஶிவாத்பரதரோ தே³வஸ்த்வமேவ பரமேஶ்வர꞉ ।
ஸர்வத꞉ பாணிபாதா³ந்த꞉ ஸர்வதோக்ஷிஶிரோமுக²꞉ ॥ 6 ॥
ஸஹஸ்ராம்ஶு꞉ ஸஹஸ்ராஸ்ய꞉ ஸஹஸ்ரசரணேக்ஷண꞉ ।
பூ⁴தாதி³ர்பூ⁴ர்பு⁴வ꞉ ஸ்வஶ்ச மஹ꞉ ஸத்யம் தபோ ஜந꞉ ॥ 7 ॥
ப்ரதீ³ப்தம் தீ³பநம் தி³வ்யம் ஸர்வலோகப்ரகாஶகம் ।
து³ர்நிரீக்ஷ்யம் ஸுரேந்த்³ராணாம் யத்³ரூபம் தஸ்ய தே நம꞉ ॥ 8 ॥
ஸுரஸித்³த⁴க³ணைர்ஜுஷ்டம் ப்⁴ருக்³வத்ரிபுலஹாதி³பி⁴꞉ ।
ஸ்துதஸ்ய பரமவ்யக்தம் யத்³ரூபம் தஸ்ய தே நம꞉ ॥ 9 ॥
வேத்³யம் வேத³விதா³ம் நித்யம் ஸர்வஜ்ஞாநஸமந்விதம் ।
ஸர்வதே³வாதி⁴தே³வஸ்ய யத்³ரூபம் தஸ்ய தே நம꞉ ॥ 10 ॥
விஶ்வக்ருத்³விஶ்வபூ⁴தம் ச வைஶ்வாநரஸுரார்சிதம் ।
விஶ்வஸ்தி²தமவேத்³யம் ச யத்³ரூபம் தஸ்ய தே நம꞉ ॥ 11 ॥
பரம் யஜ்ஞாத்பரம் வேதா³த்பரம் லோகாத்பரம் தி³வ꞉ ।
பரமாத்மேத்யபி⁴க்²யாதம் யத்³ரூபம் தஸ்ய தே நம꞉ ॥ 12 ॥
அவிஜ்ஞேயமநாலக்ஷ்யமத்⁴யாநக³தமவ்யயம் ।
அநாதி³நித⁴நம் சைவ யத்³ரூபம் தஸ்ய தே நம꞉ ॥ 13 ॥
நமோ நம꞉ காரணகாரணாய
நமோ நம꞉ பாபவிமோசநாய ।
நமோ நமஸ்தே(அ)தி³திவந்தி³தாய
நமோ நமோ ரோக³விநாஶநாய ॥ 14 ॥
நமோ நம꞉ ஸர்வவரப்ரதா³ய
நமோ நம꞉ ஸர்வஸுக²ப்ரதா³ய ।
நமோ நம꞉ ஸர்வத⁴நப்ரதா³ய
நமோ நம꞉ ஸர்வமதிப்ரதா³ய ॥ 15 ॥
இதி ஶ்ரீப்³ரஹ்மபுராணே ஏகத்ரிம்ஶோ(அ)த்⁴யாயே ப்³ரஹ்மக்ருத ஶ்ரீ ஸூர்ய ஸ்துதி꞉ ।
Found a Mistake or Error? Report it Now
