|| Sri Narasimha Samstuti ||
bhairavāḍambaraṁ bāhudaṁṣṭrāyudhaṁ
caṇḍakōpaṁ mahājvālamēkaṁ prabhum |
śaṅkhacakrābjahastaṁ smarātsundaraṁ
hyugramatyuṣṇakāntiṁ bhajē:’haṁ muhuḥ || 1 ||
divyasiṁhaṁ mahābāhuśauryānvitaṁ
raktanētraṁ mahādēvamāśāmbaram |
raudramavyaktarūpaṁ ca daityāmbaraṁ
vīramādityabhāsaṁ bhajē:’haṁ muhuḥ || 2 ||
mandahāsaṁ mahēndrēndramādistutaṁ
harṣadaṁ śmaśruvantaṁ sthirajñaptikam |
viśvapālairvivandyaṁ varēṇyāgrajaṁ
nāśitāśēṣaduḥkhaṁ bhajē:’haṁ muhuḥ || 3 ||
savyajūṭaṁ surēśaṁ vanēśāyinaṁ
ghōramarkapratāpaṁ mahābhadrakam |
durnirīkṣyaṁ sahasrākṣamugraprabhaṁ
tējasā sañjvalantaṁ bhajē:’haṁ muhuḥ || 4 ||
siṁhavaktraṁ śarīrēṇa lōkākr̥tiṁ
vāraṇaṁ pīḍanānāṁ samēṣāṁ gurum |
tāraṇaṁ lōkasindhōrnarāṇāṁ paraṁ
mukhyamasvapnakānāṁ bhajē:’haṁ muhuḥ || 5 ||
pāvanaṁ puṇyamūrtiṁ susēvyaṁ hariṁ
sarvavijñaṁ bhavantaṁ mahāvakṣasam |
yōginandaṁ ca dhīraṁ paraṁ vikramaṁ
dēvadēvaṁ nr̥siṁhaṁ bhajē:’haṁ muhuḥ || 6 ||
sarvamantraikarūpaṁ surēśaṁ śubhaṁ
siddhidaṁ śāśvataṁ sattrilōkēśvaram |
vajrahastēruhaṁ viśvanirmāpakaṁ
bhīṣaṇaṁ bhūmipālaṁ bhajē:’haṁ muhuḥ || 7 ||
sarvakāruṇyamūrtiṁ śaraṇyaṁ suraṁ
divyatējaḥsamānaprabhaṁ daivatam |
sthūlakāyaṁ mahāvīramaiśvaryadaṁ
bhadramādyantavāsaṁ bhajē:’haṁ muhuḥ || 8 ||
bhaktavātsalyapūrṇaṁ ca saṅkarṣaṇaṁ
sarvakāmēśvaraṁ sādhucittasthitam |
lōkapūjyaṁ sthiraṁ cācyutaṁ cōttamaṁ
mr̥tyumr̥tyuṁ viśālaṁ bhajē:’haṁ muhuḥ || 9 ||
bhaktipūrṇāṁ kr̥pākāraṇāṁ saṁstutiṁ
nityamēkaikavāraṁ paṭhan sajjanaḥ |
sarvadā:’:’pnōti siddhiṁ nr̥siṁhāt kr̥pāṁ
dīrghamāyuṣyamārōgyamapyuttamam || 10 ||
iti śrī nr̥siṁha saṁstutiḥ |
Found a Mistake or Error? Report it Now
