|| ಶ್ರೀ ಶ್ಯಾಮಲಾ ಅಷ್ಟೋತ್ತರಶತನಾಮ ಸ್ತೋತ್ರಂ – ೨ ||
ಅಸ್ಯ ಶ್ರೀಶ್ಯಾಮಲಾಷ್ಟೋತ್ತರಶತನಾಮಸ್ತೋತ್ರ ಮಹಾಮಂತ್ರಸ್ಯ, ಮಹಾಭೈರವ ಋಷಿಃ, ಅನುಷ್ಟುಪ್ ಛಂದಃ, ಶ್ರೀಮಾತಂಗೀಶ್ವರೀ ದೇವತಾ, ಆದಿಶಕ್ತಿರಿತಿ ಬೀಜಂ, ಸರ್ವಕಾಮಪ್ರದೇತಿ ಶಕ್ತಿಃ, ಪರಂಜ್ಯೋತಿಃ ಸ್ವರೂಪಿಣೀತಿ ಕೀಲಕಂ, ಶ್ಯಾಮಲಾಷ್ಟೋತ್ತರಶತನಾಮ ಜಪೇ ವಿನಿಯೋಗಃ |
ನಮಸ್ತೇಽಸ್ತು ಜಗದ್ಧಾತ್ರಿ ಮಾತಂಗೀಶ್ವರಿ ತೇ ನಮಃ |
ಶ್ಯಾಮಲೇ ಜಗದೀಶಾನೇ ನಮಸ್ತೇ ಪರಮೇಶ್ವರೀ || ೧ ||
ನಮಸ್ತೇಽಸ್ತು ಮಹಾಕೃಷ್ಣೇ ಸರ್ವಭೂಷಣಸಂಯುತೇ |
ಮಹಾದೇವಿ ಮಹೇಶಾನಿ ಮಹಾದೇವಪ್ರಿಯೇ ನಮಃ || ೨ ||
ಆದಿಶಕ್ತಿರ್ಮಹಾಶಕ್ತಿಃ ಪರಾಶಕ್ತಿಃ ಪರಾತ್ಪರೇ |
ಬ್ರಹ್ಮಶಕ್ತೇ ವಿಷ್ಣುಶಕ್ತೇ ಶಿವಶಕ್ತೇ ನಮೋ ನಮಃ || ೩ ||
ನಮೋಽಮೃತೇಶ್ವರೀ ದೇವಿ ನಮಃ ಪರಶಿವಪ್ರಿಯೇ |
ಬ್ರಹ್ಮರೂಪೇ ವಿಷ್ಣುರೂಪೇ ಶಿವರೂಪೇ ನಮೋಽಸ್ತು ತೇ || ೪ ||
ಸರ್ವಕಾಮಪ್ರದೇ ತುಭ್ಯಂ ಸರ್ವಸಿದ್ಧಿಪ್ರದೇ ನಮಃ |
ಸರ್ವಸಂಪತ್ಪ್ರದೇ ನೄಣಾಂ ಸರ್ವರಾಜಸುಶಂಕರಿ || ೫ ||
ಸ್ತ್ರೀವಶಂಕರಿ ವಂದೇ ತ್ವಾಂ ನಮೋ ನರವಶಂಕರಿ |
ದೇವಮೋಹಿನಿ ಸೇವೇ ತ್ವಾಂ ಸರ್ವಸತ್ತ್ವವಶಂಕರಿ || ೬ ||
ನಮಃ ಶಾಂಕರಿ ವಾಗ್ದೇವಿ ಸರ್ವಲೋಕವಶಂಕರೀ |
ಸರ್ವಾಭೀಷ್ಟಪ್ರದೇ ನಿತ್ಯೇ ನಮೋ ಮಾತಂಗಕನ್ಯಕೇ || ೭ ||
ನಮೋ ನೀಲೋತ್ಪಲಪ್ರಖ್ಯೇ ನಮೋ ಮರಕತಪ್ರಭೇ |
ನೀಲಮೇಘಪ್ರತೀಕಾಶೇ ಇಂದ್ರನೀಲಸಮಪ್ರಭೇ || ೮ ||
ನಮಶ್ಚಂಡ್ಯಾದಿದೇವೇಶಿ ದಿವ್ಯನಾರೀವಶಂಕರೀ |
ನಮಸ್ತೇ ಮಾತೃಸಂಸ್ತುತ್ಯೇ ಜಯೇ ತೇ ವಿಜಯೇ ನಮಃ || ೯ ||
ಭೂಷಿತಾಂಗಿ ಮಹಾಶ್ಯಾಮೇ ಮಹಾರಾಮೇ ಮಹಾಪ್ರಭೇ |
ಮಹಾವಿಷ್ಣುಪ್ರಿಯಕರೀ ಸದಾಶಿವಮಹಾಪ್ರಿಯೇ || ೧೦ ||
ರುದ್ರಾಣೀ ಸರ್ವಪಾಪಘ್ನೀ ಕಾಮೇಶ್ವರಿ ನಮೋಽಸ್ತು ತೇ |
ಶುಕಶ್ಯಾಮೇ ಲಘುಶ್ಯಾಮೇ ರಾಜವಶ್ಯಕರೀ ನಮಃ || ೧೧ ||
ವೀಣಾಹಸ್ತೇ ನಮಸ್ತುಭ್ಯಂ ನಮೋ ಗೀತರತೇ ಸದಾ |
ಸರ್ವವಿದ್ಯಾಪ್ರದೇ ತುಭ್ಯಂ ನಮಃ ಶಕ್ತ್ಯಾದಿಪೂಜಿತೇ || ೧೨ ||
ಭಜೇಽಹಂ ವೇದಗೀತೇ ತ್ವಾಂ ದೇವಗೀತೇ ನಮೋ ನಮಃ |
ಶಂಖಕುಂಡಲಸಂಯುಕ್ತೇ ಬಿಂಬೋಷ್ಠೀ ತ್ವಾಂ ಭಜಾಮ್ಯಹಮ್ || ೧೩ ||
ರಕ್ತವಸ್ತ್ರಪರೀಧಾನೇ ಗೃಹೀತಮಧುಪಾತ್ರಕೇ |
ಮಧುಪ್ರಿಯೇ ನಮಸ್ತುಭ್ಯಂ ಮಧುಮಾಂಸಬಲಿಪ್ರಿಯೇ || ೧೪ ||
ರಕ್ತಾಕ್ಷೀ ಘಾರ್ಣಮಾನಾಕ್ಷೀ ಸ್ಮಿತೇಂದುಮುಖಿ ಸಂಸ್ತುತೇ |
ಕಸ್ತೂರೀತಿಲಕೋಪೇತೇ ಚಂದ್ರಶೀರ್ಷೇ ಜಗನ್ಮಯೇ || ೧೫ ||
ನಮಸ್ತುಭ್ಯಂ ಮಹಾಲಕ್ಷ್ಮಿ ಕದಂಬವನಸಂಸ್ಥಿತೇ |
ಮಹಾವಿದ್ಯೇ ನಮಸ್ತುಭ್ಯಂ ಸ್ತನಭಾರವಿರಾಜಿತೇ || ೧೬ ||
ಹರಹರ್ಯಾದಿಸಂಸ್ತುತ್ಯೇ ಸ್ಮಿತಾಸ್ಯೇ ತ್ವಾಂ ಭಜಾಮ್ಯಹಮ್ |
ನಮಃ ಕಳ್ಯಾಣದೇ ಪುಂಸಾಂ ಕಳ್ಯಾಣಿ ಕಮಲಾಲಯೇ || ೧೭ ||
ಮಹಾದಾರಿದ್ರ್ಯಸಂಹರ್ತ್ರೀ ಮಹಾಪಾತಕದಾಹಿನೀ |
ಮಹಾಜ್ಞಾನಪ್ರದೇ ನೄಣಾಂ ಮಹಾಸೌಂದರ್ಯದೇ ನಮಃ || ೧೮ ||
ಮಹಾಮುಕ್ತಿಪ್ರದೇ ವಾಣಿ ಪರಂಜ್ಯೋತಿಃ ಸ್ವರೂಪಿಣಿ |
ಚಿದಾನಂದಾತ್ಮಿಕೇ ತುಭ್ಯಂ ನಮೋಽಲಕ್ಷ್ಮೀವಿನಾಶಿನಿ || ೧೯ ||
ಭಕ್ತಾಽಭಯಪ್ರದೇ ನಿತ್ಯಮಾಪನ್ನಾಶಿನಿ ತೇ ನಮಃ |
ನಮಸ್ತೇಽಸ್ತು ಸಹಸ್ರಾಕ್ಷಿ ಸಹಸ್ರಭುಜಧಾರಿಣೀ || ೨೦ ||
ಮಹ್ಯಾಃ ಶುಭಪ್ರದೇ ತುಭ್ಯಂ ಭಕ್ತಾನಾಂ ಮಂಗಳಪ್ರದೇ |
ನಮೋಽಸ್ತ್ವಶುಭಸಂಹರ್ತ್ರೀ ಭಕ್ತಾಷ್ಟೈಶ್ವರ್ಯದೇ ನಮಃ || ೨೧ ||
ನಮೋ ದೇವ್ಯೈ ನಮಸ್ತುಭ್ಯಂ ನಮಸ್ತೇ ಮುಖರಂಜಿನೀ |
ಜಗನ್ಮಾತರ್ನಮಸ್ತುಭ್ಯಂ ನಮಸ್ತೇ ಸರ್ವನಾಯಿಕೇ || ೨೨ ||
ನಮಃ ಪರಾಪರಕಳೇ ಪರಮಾತ್ಮಪ್ರಿಯೇ ನಮಃ |
ನಮಸ್ತೇ ರಾಜಮಾತಂಗೀ ನಮಸ್ತುಭ್ಯಂ ನಮೋಽಸ್ತು ತೇ || ೨೩ ||
ಫಲಶ್ರುತಿಃ –
ನಾಮ್ನಾಮಷ್ಟೋತ್ತರಂ ಪುಣ್ಯಂ ಶ್ಯಾಮಲಾಯಾ ಇತೀರಿತಮ್ |
ಪ್ರಜಪೇದ್ಯೋ ನರೋ ಭಕ್ತ್ಯಾ ಸರ್ವಪಾಪೈರ್ವಿಮುಚ್ಯತೇ || ೨೪ ||
ವ್ಯಾಚಷ್ಟೇ ಸರ್ವಶಾಸ್ತ್ರಾಣಿ ಮಹಾವಾಗೀಶ್ವರೋ ಭವೇತ್ |
ಸಕೃಚ್ಛ್ರವಣಮಾತ್ರೇಣ ಗುಹ್ಯಾದ್ದ್ವೇ ಚ ಚತುಷ್ಟಯಮ್ || ೨೫ ||
ಸರ್ವಲೋಕಾನ್ ವಶೀಕುರ್ಯಾತ್ ಕಾಂತ್ಯಾ ವಿಷ್ಣುಸಮೋ ಭವೇತ್ |
ಲಭತೇ ಮಹತೀಂ ಲಕ್ಷ್ಮೀಂ ದೈವತೈರತಿದುರ್ಲಭಾಮ್ || ೨೬ ||
ಅಣಿಮಾದಿಗುಣೈಶ್ವರ್ಯಂ ಸ ಲಭೇಚ್ಛೀಘ್ರಮೇವ ಹಿ |
ಜಾತಿಸ್ಮೃತಿರ್ಭವೇಚ್ಛೀಘ್ರಂ ಸರ್ವವಿದ್ಯಾನಿಧಿರ್ಭವೇತ್ || ೨೭ ||
ಪ್ರಾಪ್ನೋತಿ ಪರಮಂ ಜ್ಞಾನಂ ಸರ್ವದಾ ಸುಖಮಶ್ನುತೇ |
ಸರ್ವತ್ರ ಸ ಭವೇತ್ಪೂಜ್ಯಃ ಸರ್ವತ್ರ ವಿಜಯೀ ಭವೇತ್ || ೨೮ ||
ಭೂತಪ್ರೇತಪಿಶಾಚಾದಿ ಭಯಂ ತಸ್ಯ ನ ಜಾಯತೇ |
ಮಹತೀಂ ಕೀರ್ತಿಮಾಪ್ನೋತಿ ಲಭೇದ್ಯೋಗಮನುತ್ತಮಮ್ || ೨೯ ||
ಘಟಿಕಾಪಾದುಕಾದ್ಯಷ್ಟಸಿದ್ಧಿನಾಥೋ ಭವೇದಯಮ್ |
ಮಂಗಳಾನಿ ಭವೇನ್ನಿತ್ಯಂ ಸ ಮಹಾಪಂಡಿತೋ ಭವೇತ್ || ೩೦ ||
ಲಭತೇ ಮಹದಾಯುಷ್ಯಂ ಲೋಕಸಮ್ಮೋಹನೋ ಭವೇತ್ |
ಲಭೇದಂತೇ ಮಹಾದೇವರೂಪಂ ನಾತ್ರ ವಿಚಾರಣಾ || ೩೧ ||
ಇತಿ ಶ್ರೀ ಶ್ಯಾಮಲಾಷ್ಟೋತ್ತರಶತನಾಮ ಸ್ತೋತ್ರಮ್ ||
Found a Mistake or Error? Report it Now
