శ్రీ విఖనస స్తోత్రం

|| శ్రీ విఖనస స్తోత్రం ||

నైమిశే నిమిశక్షేత్రే గోమత్యా సమలంకృతే |
హరేరారాధనాసక్తం వందే విఖనసం మునిమ్ || ౧ ||

రేచకైః పూరకైశ్చైవ కుంభకైశ్చ సమాయుతమ్ |
ప్రాణాయామపరం నిత్యం వందే విఖనసం మునిమ్ || ౨ ||

తులసీనళినాక్షైశ్చ కృతమాలా విభూషితమ్ |
అంచితైరూర్ధ్వపుండ్రైశ్చ వందే విఖనసం మునిమ్ || ౩ ||

తులసీస్తబకైః పద్మైర్హరిపాదార్చనారతమ్ |
శాంతం జితేంద్రియం మౌనిం వందే విఖనసం మునిమ్ || ౪ ||

కుండలాంగదహారాద్యైర్ముద్రికాభిరలంకృతమ్ |
సర్వాభరణసంయుక్తం వందే విఖనసం మునిమ్ || ౫ ||

రత్నకంకణమంజీర కటిసూత్రైరలంకృతమ్ |
కాంచీపీతాంబరధరం వందే విఖనసం మునిమ్ || ౬ ||

శరచ్చంద్రప్రతీకాశైర్ధవళైరుపవీతకైః |
సోత్తరీయం బద్ధశిఖం వందే విఖనసం మునిమ్ || ౭ ||

కంబుగ్రీవం విశాలాక్షం వికసత్పంకజాననమ్ |
కందర్పకోటిలావణ్యం వందే విఖనసం మునిమ్ || ౮ ||

కుందేందుశంఖసదృశ దంతపంక్త్యా విరాజితమ్ |
సూర్యకోటినిభం కాంత్యా వందే విఖనసం మునిమ్ || ౯ ||

జ్వాలామణిగణప్రఖ్య నఖపంక్త్యా సుశోభితమ్ |
కరాభ్యామంజలికరం వందే విఖనసం మునిమ్ || ౧౦ ||

వందే విఖనసం సాక్షాద్బ్రహ్మరూపం మునీశ్వరమ్ |
శ్రుతిస్మృతీతిహాసజ్ఞైః ఋషిభిః సమభిష్ఠుతమ్ || ౧౧ ||

వందే భృగుం తపోనిష్ఠం మరీచిం చ మహామునిమ్ |
అత్రిం చైవ త్రికాలజ్ఞం కాశ్యపం బ్రహ్మవాదినమ్ || ౧౨ ||

ఏతద్విఖనసస్తోత్రం ప్రాతరుత్థాయ యః పఠేత్ |
దివా చ యది వా రాత్రౌ సమేషు విషమేషు చ |
న భయం విందతే కించిత్కార్యసిద్ధిం చ గచ్ఛతి || ౧౩ ||

ఏతద్విఖనసస్తోత్రం యః పఠేద్ధరిసన్నిధౌ |
విష్ణోరారాధనే కాలే జపకాలే విశేషతః || ౧౪ ||

య ఏతత్ ప్రాతరుత్థాయ నిత్యం చ ప్రయతః పఠేత్ |
పుత్రః పౌత్రైర్ధనం తస్య ఆయురారోగ్యసంపదః || ౧౫ ||

ఏతైర్యుక్తో మహాభోగీ ఇహలోకే సుఖీ భవేత్ |
అంతే విమానమారుహ్య విష్ణులోకం చ గచ్ఛతి || ౧౬ ||

ఇతి శ్రీ విఖనస స్తోత్రమ్ |

Found a Mistake or Error? Report it Now