అనామయ స్తోత్రం

|| అనామయ స్తోత్రం ||

తృష్ణాతంత్రే మనసి తమసా దుర్దినే బంధువర్తీ
మాదృగ్జంతుః కథమధికరోత్యైశ్వరం జ్యోతిరగ్ర్యం .
వాచః స్ఫీతా భగవతి హరేస్సన్నికృష్టాత్మరూపా-
స్స్తుత్యాత్మానస్స్వయమివముఖాదస్య మే నిష్పతంతి ..

వేధా విష్ణుర్వరుణధనదౌ వాసవో జీవితేశ-
శ్చంద్రాదిత్యే వసవ ఇతి యా దేవతా భిన్నకక్ష్యా .
మన్యే తాసామపి న భజతే భారతీ తే స్వరూపం
స్థూలే త్వంశే స్పృశతి సదృశం తత్పునర్మాదృశోఽపి ..

తన్నస్థాణోస్స్తుతిరతిభరా భక్తిరుచ్చైర్ముఖీ చేద్
గ్రామ్యస్తోతా భవతి పురుషః కశ్చిదారణ్యకో వా .
నో చేద్భక్తిస్త్వయి చ యది వా బ్రహ్మవిద్యాత్వధీతే
నానుధ్యేయస్తవ పశురసావాత్మకర్మానభిజ్ఞః ..

విశ్వం ప్రాదుర్భవతి లభతే త్వామధిష్ఠాయకం చేత్
నేహోత్పత్తిర్యది జనయితా నాస్తి చైతన్యయుక్తః .
క్షిత్యాదీనాం భవ నిజకలావత్తయా జన్మవత్తా
సిధ్యత్యేవం సతి భగవతస్సర్వలోకాధిపత్యం ..

భోగ్యామాహుః ప్రకృతిమృషయశ్చేతనాశక్తిశూన్యాం
భోక్తా చైనాం పరిణమయితుం బుద్ధివర్తీ సమర్థః .
భోగోప్యస్మిన్ భవతి మిథునే పుష్కలస్తత్ర హేతుః
నీలగ్రీవ త్వమసి భువనస్థాపనాసూత్రధారః ..

భిన్నావస్థం జగతి బహునా దేశకాలప్రభేదాద్
ద్వాభ్యాం పాపాన్యభిగిరి హరన్ యోనవద్య క్రమాభ్యాం .
ప్రేక్ష్యారూఢస్సృజతి నియమాదస్య సర్వం హి యత్తత్
సర్వజ్ఞత్వం త్రిభువన సృజా యత్ర సూత్రం న కించిత్ ..

చారూద్రేకే రజసి జగతాం జన్మసత్వే ప్రకృష్టే
యాత్రాం భూయస్తమసి బహులే బిభ్రతస్సంహృతిం చ .
బ్రహ్మాద్యైతత్ప్రకృతిగహనం స్తంభపర్యంతమాసీత్
క్రీడావస్తు త్రినయన మనోవృత్తిమాత్రానుగం తే ..

కృత్తిశ్చిత్రా నివసనపదే కల్పితా పౌండరీకో
వాసాగారం పితృవనభువం వాహనం కశ్చిదుక్షా .
ఏవం ప్రాహుః ప్రలఘుహృదయా యద్యపి స్వార్థపోషం
త్వాం ప్రత్యేకం ధ్వనతి భగవన్నీశ ఇత్యేష శబ్దః ..

క్లృప్తాకల్పః కిమయమశివైరస్థిముఖ్యైః పదార్థైః
కస్స్యాదస్య స్తనకలశయోర్భారనమ్రా భవానీ .
బాణౌ ఖడ్గః పరశురిదమప్యక్షసూత్రం కిమస్యేత్
యా చక్షాణో హర కృతవియామస్తు హాస్యైకవేద్యః ..

యత్కాపాలవ్రతమపి మహద్ పృష్టమేకాంతఘోరం
ముక్తేరధ్వా స పునరమలః పావనః కిం న జాతః .
దాక్షాయణ్యాం ప్రియతమతయా వర్తతే యోగమాయా
సా స్యాద్ధత్తే మిథునచరితం వృద్ధిమూలం ప్రజానాం ..

కశ్చిన్మర్త్యః క్రతుకృశతనుర్నీలకంఠ త్వయా చేద్
దృష్టిస్నిగ్ధస్స పునరమరస్త్రీభుజగ్రాహ్యకంఠః .
అప్యారూఢస్సుపరివృతం స్థానమాఖండలీయం
త్వం చేత్క్రుద్ధస్స పతతి నిరాలంబనో ధ్వాంతజాలే ..

శశ్వద్బాల్యం శరవణభవం షణ్ముఖం ద్వాదశాక్షం
తేజో యత్తే కనకనలినీపద్మపత్రావదాతం .
విస్మార్యంతే సురయువతయస్తేన సేంద్రావరోధా
దైత్యేంద్రాణామసురజయినాం బంధనాగారవాసం ..

వేగాకృష్టగ్రహరవిశశివ్యశ్నువానం దిగంతాత్
న్యక్కుర్వాణం ప్రలయపయసామూర్మిభంగావలేపం .
ముక్తాకారం హర తవ జటాబద్ధసంస్పర్శి సద్యో
జజ్ఞే చూడా కుసుమసుభగం వారి భాగీరథీయం ..

కల్మాషస్తే మరకతశిలాభంగకాంతిర్న కంఠే
న వ్యాచష్టే భువనవిషయీం త్వత్ప్రసాదప్రవృత్తిం .
వారాం గర్భస్య హి విషమయో మందరక్షోభజన్మా
నైవం రుద్ధో యది న భవతి స్థావరం జంగమం వా ..

సంధాయాస్త్రం ధనుషి నియమోన్మాయి సమ్మోహనాఖ్యం
పార్శ్వే తిష్ఠన్ గిరిశసదృశే పంచబాణో ముహూర్తం .
తస్మాదూర్ధ్వం దహనపరిధౌ రాషదృష్టిప్రసూతే
రక్తాశోకస్తవకిత ఇవ ప్రాంతధూమద్విరేఫః ..

లంకానాథం లవణజలధిస్థూలవేలోర్మిదీర్ఘైః
కైలాసం తే నిలయనగరీం బాహుభిః కంపయంతం .
ఆక్రోశద్భిర్వమితరుధిరైరాననైరాప్లుతాక్షై-
రాపాతాలానయదలసాబద్ధమంగుష్ఠకర్మ ..

ఐశ్వర్యం తేఽప్యనృణతపతన్నేకమూర్ధావశేషః
పాదద్వంద్వం దశముఖశిరః పుండరీకోపహారః .
యేనైవాసావధిగతఫలో రాక్షసశ్రీవిధేయ-
శ్చక్రే దేవాసురపరిషదో లోకపాలైకశత్రుః ..

భక్తిర్బాణాసురమపి భయత్పాదపద్య స్పృశంతం
స్థానం చంద్రాభరణ గమయామాస లోకస్య మూర్ధ్ని .
నహ్యస్యాపి భ్రుకుటినయనాదగ్నిదంష్ట్రాకరాలం
ద్రష్టుం కశ్చిద్వదనమశకద్దేవదైత్యేశ్వరేషు ..

పాదన్యాసాన్నమతి వసుధా పన్నగస్కంధలగ్నా
బాహుక్షేపాద్ గ్రహగణయుతం ఘూర్ణతే మేఘవృందం .
ఉత్సాద్యంతే క్షణమివ దిశో హుంకృతేనాతిమాత్రం
భిన్నావస్థం భవతి భువనం త్వయ్యుపక్రాంతవృత్తే ..

నోర్ధ్వం గమ్యం సరసిజభువో నాప్యధశ్శార్ఙ్గపాణే-
రాసీదన్యస్తవ హుతవహస్తంభమూర్త్యా స్థితస్య .
భూయస్తాభ్యాముపరి లఘునా విస్మయేన స్తువద్భ్యాం
కంఠే కాలం కపిలనయనం రూపమావిర్బభూవ ..

శ్లాధ్యాం దృష్టిం దుహితరి గిరేర్న్యస్య చాపోర్ధ్వకోట్యాం
కృత్వా బాహుం త్రిపురవిజయానంతరం తే స్థితస్య .
మందారాణాం మధురసురభయో వృష్టయః పేతురార్ద్రాః
స్వర్గోద్యానభ్రమరవనితాదత్తదీర్ఘానుయాతాః ..

ఉద్ధృత్యైకం నయనమరుణం స్నిగ్ధతారాపరాగం
పూర్ణేధాద్యః పరమసులభే దుష్కరాణాం సహస్రే .
చక్రం భేజే దహనజటిలం దక్షిణం తస్య హస్తం
బాలస్యేవ ద్యూతివలయితం మండలం భాస్కరస్య ..

విష్ణుశ్చక్రే కరతలగతే విష్టపానాం త్రయాణాం
దత్తాశ్వాసో దనుసుతశిరశ్ఛేదదీక్షాం బబంధ .
ప్రత్యాసన్నం తదపి నయనం పుండరీకాతుకారి
శ్లాఘ్యా భక్తిస్త్రినయన భవత్యర్పితా కిం న సూతే ..

సవ్యే శూలం త్రిశిఖరమపరే దోష్ణి భిక్షాకపాలం
సోమో ముగ్ధశ్శిరసి భుజగః కశ్చిదంశోత్తరీయః .
కోఽయం వేషస్త్రినయన కుతో దృష్ట ఇత్యద్రికన్యా
ప్రాయేణ త్వాం హసతి భగవన్ ప్రేమనిర్యంత్రితాత్మా ..

ఆర్ద్రం నాగాజినమవయవగ్రంథిమద్బిభ్రదంసే
రూపం ప్రావృడ్ఘనరుచిమహాభైరవం దర్శయిత్వా .
పశ్యన్ గౌరీం భయచలకరాలంబితస్కంధహస్తాం
మన్యే ప్రీత్యా దృఢ ఇతి భవాన్ వజ్రదేహేఽపి జాతః ..

వ్యాలాకల్పా విషమనయనా విద్రుమాతామ్రభాసో
జాయామిశ్రా జటిలశిరశ్చంద్రరేఖావతంసాః .
నిత్యానందా నియతలలితాః స్నిగ్ధకల్మాషకంఠాః
దేవా రుద్రా ధృతపరశవస్తే భవిష్యంతి భక్తాః ..

మంత్రాభ్యాసో నియమవిధయస్తీర్థయాత్రానురోధో
గ్రామే భిక్షాచరణముటజే బీజవృత్తిర్వనే వా
ఇత్యాయాసే మహతి రమతామప్రగల్భః ఫలార్థే
స్మృత్యేవాహం తవచరణయోర్నిర్వృతిం సాధయామి ..

ఆస్తాం తావత్స్నపనముపరిక్షీరధారాప్రవాహైః
స్నేహాభ్యంగో భవనకరణం గంధపుష్పార్పణం వా .
యస్తే కశ్చిత్కిరతి కుసుమాన్యుద్దిశన్ పాదపీఠం
భూయో నైవ భ్రమతి జననీగర్భకారాగృహేషు ..

శుక్తాకారం మునిభిరనిశం చేతసి ధ్యాయమానం
ముక్తాగీరం శిరసిజటిలే జాహ్నవీముద్వహంతం .
నానాకారం నవశశికలాశేఖరం నాగహారం
నారీమిశ్రం ధృతనరశిరోమాల్యమీశం నమామి ..

తిర్యగ్యోనౌ త్రిదశనిలయే మానుషే రాక్షసే వా
యక్షావాసే విషధరపురే దేవ విద్యాధరే వా .
యస్మిన్ కస్మిన్సుకృతనిలయే జన్మని శ్రేయసో వా
భూయాద్యుష్మచ్చరణకమలధ్యాయినీ చిత్తవృత్తిః ..

వందే రుద్రం వరదమమలం దండినం ముండధారిం
దివ్యజ్ఞానం త్రిపురదహనం శంకరం శూలపాణిం .
తేజోరాశిం త్రిభువనగురుం తీర్థమౌలిం త్రినేత్రం
కైలాసస్థం ధనపతిసఖం పార్వతీనాథమీశం ..

యోగీ భోగీ విషభుగమృతభృక్ శస్త్రపాణిస్తపస్వీ
శాంతః క్రూరః శమితవిషయః శైలకన్యాసహాయః .
భిక్షావృత్తిస్త్రిభువనపతిః శుద్ధిమానస్థిమాలీ
శక్యో జ్ఞాతుం కథమివ శివ త్వం విరుద్ధస్వభావః ..

ఉపదిశతి యదుచ్చైర్జ్యోతిరామ్నాయవిద్యాం
పరమ పరమదూరం దూరమాద్యంతశూన్యాం .
త్రిపురజయినీ తస్మిన్ దేవదేవే నివిష్టాం
భగవతి పరివర్తోన్మాదినీ భక్తిరస్తు ..

ఇతి విరచితమేతచ్చారుచంద్రార్ధమౌలే-
ర్లలితపదముదారం దండినా పండితేన .
స్తవనమవనకామేనాత్మనోఽనామయాఖ్యం
భవతి విగతరోగీ జంతురేతజ్జపేన ..

స్తోత్రం సమ్యక్పరమవిదుషా దండినాం వాచ్యవృత్తాన్
మందాక్రాంతాన్ త్రిభువనగురోః పార్వతీవల్లభస్య .
కృత్వా స్తోత్రం యది సుభగమాప్నోతి నిత్యం హి పుణ్యం
తేన వ్యాధిం హర హర నృణాం స్తోత్రపాఠేన సత్యం ..

ఇతి దండివిరచితమనామయస్తోత్రం సంపూర్ణం ..

Found a Mistake or Error? Report it Now