गिरीश स्तुति

|| गिरीश स्तुति ||

शिवशर्वमपार- कृपाजलधिं
श्रुतिगम्यमुमादयितं मुदितम्।

सुखदं च धराधरमादिभवं
भज रे गिरिशं भज रे गिरिशम्।

जननायकमेक- मभीष्टहृदं
जगदीशमजं मुनिचित्तचरम्।

जगदेकसुमङ्गल- रूपशिवं
भज रे गिरिशं भज रे गिरिशम्।

जटिनं ग्रहतारकवृन्दपतिं
दशबाहुयुतं सितनीलगलम्।

नटराजमुदार- हृदन्तरसं
भज रे गिरिशं भज रे गिरिशम्।

विजयं वरदं च गभीररवं
सुरसाधुनिषेवित- सर्वगतिम्।

च्युतपापफलं कृतपुण्यशतं
भज रे गिरिशं भज रे गिरिशम्।

कृतयज्ञसु- मुख्यमतुल्यबलं
श्रितमर्त्य- जनामृतदानपरम्।

स्मरदाहक- मक्षरमुग्रमथो
भज रे गिरिशं भज रे गिरिशम्।

भुवि शङ्करमर्थदमात्मविदं
वृषवाहनमाश्रम- वासमुरम्।

प्रभवं प्रभुमक्षयकीर्तिकरं
भज रे गिरिशं भज रे गिरिशम्।

Found a Mistake or Error? Report it Now