কনকধাৰাস্তোত্ৰম্

|| কনকধাৰাস্তোত্ৰম্ ||

ৱন্দে ৱন্দাৰুমন্দাৰমিন্দিৰানন্দকন্দলম্ ।
অমন্দানন্দসন্দোহবন্ধুৰং সিন্ধুৰাননম্ ॥

অঙ্গং হৰেঃ পুলকভূষণমাশ্ৰয়ন্তী
ভৃঙ্গাঙ্গনেৱ মুকুলাভৰণং তমালম্ ।
অঙ্গীকৃতাখিলৱিভূতিৰপাঙ্গলীলা
মাঙ্গল্যদাস্তু মম মঙ্গল়দেৱতায়াঃ ॥

মুগ্ধা মুহুৰ্ৱিদধতী ৱদনে মুৰাৰেঃ
প্ৰেমত্ৰপাপ্ৰণিহিতানি গতাগতানি ।
মালা দৃশোৰ্মধুকৰীৱ মহোৎপলে যা
সা মে শ্ৰিয়ং দিশতু সাগৰসম্ভৱায়াঃ ॥

আমীলিতাক্ষমধিগম্য মুদা মুকুন্দং
আনন্দকন্দমনিমেষমনঙ্গতন্ত্ৰম্ ।
আকেকৰস্থিতকনীনিকপক্ষ্মনেত্ৰং
ভূত্যৈ ভৱেন্মম ভুজঙ্গশয়াঙ্গনায়াঃ ॥

বাহ্ৱন্তৰে মধুজিতঃ শ্ৰিতকৌস্তুভে যা
হাৰাৱলীৱ হৰিনীলময়ী ৱিভাতি ।
কামপ্ৰদা ভগৱতোঽপি কটাক্ষমালা
কল্যাণমাৱহতু মে কমলালয়ায়াঃ ॥

কালাম্বুদাল়িললিতোৰসি কৈটভাৰেঃ
ধাৰাধৰে স্ফুৰতি যা তডিদঙ্গনেৱ ।
মাতুস্সমস্তজগতাং মহনীয়মূৰ্তিঃ
ভদ্ৰাণি মে দিশতু ভাৰ্গৱনন্দনায়াঃ ॥

প্ৰাপ্তং পদং প্ৰথমতঃ খলু যৎপ্ৰভাৱান্-
মাঙ্গল্যভাজি মধুমাথিনি মন্মথেন ।
ময়্যাপতেত্তদিহ মন্থৰমীক্ষণাৰ্ধং
মন্দালসং চ মকৰালয়কন্যকায়াঃ ॥

ৱিশ্ৱামৰেন্দ্ৰপদৱিভ্ৰমদানদক্ষং
আনন্দহেতুৰধিকং মুৰৱিদ্ৱিষোঽপি ।
ঈষন্নিষীদতু ময়ি ক্ষণমীক্ষণাৰ্ধ-
মিন্দীৱৰোদৰসহোদৰমিন্দিৰায়াঃ ॥

ইষ্টা ৱিশিষ্টমতয়োঽপি যয়া দয়াৰ্দ্ৰ
দৃষ্ট্যা ত্ৰিৱিষ্টপপদং সুলভং লভন্তে ।
দৃষ্টিঃ প্ৰহৃষ্টকমলোদৰদীপ্তিৰিষ্টাং
পুষ্টিং কৃষীষ্ট মম পুষ্কৰৱিষ্টৰায়াঃ ॥

দদ্যাদ্দয়ানুপৱনো দ্ৰৱিণাম্বুধাৰাং
অস্মিন্নকিঞ্চনৱিহঙ্গশিশৌ ৱিষণ্ণে ।
দুষ্কৰ্মঘৰ্মমপনীয় চিৰায় দূৰং
নাৰায়ণপ্ৰণয়িনীনয়নাম্বুৱাহঃ ॥

ধীৰ্দেৱতেতি গৰুডধ্ৱজসুন্দৰীতি
শাকম্ভৰীতি শশিশেখৰৱল্লভেতি ।
সৃষ্টিস্থিতিপ্ৰলয়কেলিষু সংস্থিতায়ৈ
তস্যৈ নমস্ত্ৰিভুৱনৈকগুৰোস্তৰুণ্যৈ ॥

শ্ৰুত্যৈ নমোঽস্তু শুভকৰ্মফলপ্ৰসূত্যৈ
ৰত্যৈ নমোঽস্তু ৰমণীয়গুণাৰ্ণৱায়ৈ ।
শক্ত্যৈ নমোঽস্তু শতপত্ৰনিকেতনায়ৈ
পুষ্ট্যৈ নমোঽস্তু পুৰুষোত্তমৱল্লভায়ৈ ॥

নমোঽস্তু নালীকনিভাননায়ৈ
নমোঽস্তু দুগ্ধোদধিজন্মভূম্যৈ ।
নমোঽস্তু সোমামৃতসোদৰায়ৈ
নমোঽস্তু নাৰায়ণৱল্লভায়ৈ ॥

নমোঽস্তু হেমাম্বুজপীঠিকায়ৈ
নমোঽস্তু ভূমণ্ডলনায়িকায়ৈ ।
নমোঽস্তু দেৱাদিদয়াপৰায়ৈ
নমোঽস্তু শাৰ্ঙ্গায়ুধৱল্লভায়ৈ ॥

নমোঽস্তু দেৱ্যৈ ভৃগুনন্দনায়ৈ
নমোঽস্তু ৱিষ্ণোৰুৰসি স্থিতায়ৈ ।
নমোঽস্তু লক্ষ্ম্যৈ কমলালয়ায়ৈ
নমোঽস্তু দামোদৰৱল্লভায়ৈ ॥

নমোঽস্তু কান্ত্যৈ কমলেক্ষণায়ৈ
নমোঽস্তু ভূত্যৈ ভুৱনপ্ৰসূত্যৈ ।
নমোঽস্তু দেৱাদিভিৰৰ্চিতায়ৈ
নমোঽস্তু নন্দাত্মজৱল্লভায়ৈ ॥

সম্পৎকৰাণি সকলেন্দ্ৰিয়নন্দনানি
সাম্ৰাজ্যদানৱিভৱানি সৰোৰুহাক্ষি ।
ত্ৱদ্ৱন্দনানি দুৰিতোত্তৰণোদ্যতানি
মামেৱ মাতৰনিশং কলয়ন্তু মান্যে ॥

যৎকটাক্ষসমুপাসনাৱিধিঃ
সেৱকস্য সকলাৰ্থসম্পদঃ ।
সন্তনোতি ৱচনাঙ্গমানসৈঃ
ত্ৱাং মুৰাৰিহৃদয়েশ্ৱৰীং ভজে ॥

সৰসিজনিলয়ে সৰোজহস্তে
ধৱল়তমাংশুকগন্ধমাল্যশোভে ।
ভগৱতি হৰিৱল্লভে মনোজ্ঞে
ত্ৰিভুৱনভূতিকৰি প্ৰসীদ মহ্যম্ ॥

দিগ্ঘস্তিভিঃ কনককুম্ভমুখাৱসৃষ্ট
স্ৱৰ্ৱাহিনী ৱিমলচাৰুজলপ্লুতাঙ্গীম্ ।
প্ৰাতৰ্নমামি জগতাং জননীমশেষ
লোকাধিনাথগৃহিণীমমৃতাব্ধিপুত্ৰীম্ ॥

কমলে কমলাক্ষৱল্লভে ত্ৱং
কৰুণাপূৰতৰঙ্গিতৈৰপাঙ্গৈঃ ।
অৱলোকয় মামকিঞ্চনানাং
প্ৰথমং পাত্ৰমকৃত্ৰিমং দয়ায়াঃ ॥

দেৱি প্ৰসীদ জগদীশ্ৱৰি লোকমাতঃ
কল্যানগাত্ৰি কমলেক্ষণজীৱনাথে ।
দাৰিদ্ৰ্যভীতিহৃদয়ং শৰণাগতং মাং
আলোকয় প্ৰতিদিনং সদয়ৈৰপাঙ্গৈঃ ॥

স্তুৱন্তি যে স্তুতিভিৰমূভিৰন্ৱহং
ত্ৰয়ীময়ীং ত্ৰিভুৱনমাতৰং ৰমাম্ ।
গুণাধিকা গুৰুতৰভাগ্যভাগিনো
ভৱন্তি তে ভুৱি বুধভাৱিতাশয়াঃ ॥

Found a Mistake or Error? Report it Now