|| Sri Anjaneya Shodasopachara Puja ||
punaḥ saṅkalpam –
pūrvokta evaṃ guṇa viśeṣaṇa viśiṣṭāyāṃ śubhatithau mama saṅkalpita manovāñchāphala siddhyarthaṃ iṣṭakāmyārtha siddhyarthaṃ śrīmadāñjaneya svāmi devatā prītyarthaṃ yathāśakti ṣoḍaśopacāra pūjāṃ kariṣye ||
dhyānam –
atulitabaladhāmaṃ svarṇaśailābhadehaṃ
danujavanakṛśānuṃ jñānināmagragaṇyam |
sakalaguṇanidhānaṃ vānarāṇāmadhīśaṃ
raghupatipriyabhaktaṃ vātajātaṃ namāmi ||
goṣpadīkṛtavārīśaṃ maśakīkṛtarākṣasam |
rāmāyaṇamahāmālāratnaṃ vande’nilātmajam ||
oṃ śrī hanumate namaḥ dhyāyāmi |
āvāhanam –
rāmacandrapadāmbhojayugala sthiramāsanam |
āvāhayāmi varadaṃ hanūmantamabhīṣṭadam ||
oṃ śrī hanumate namaḥ āvāhayāmi |
āsanam –
navaratnanibaddhāśraṃ caturaśraṃ suśobhanam |
sauvarṇamāsanaṃ tubhyaṃ dāsyāmi kapināyaka ||
oṃ śrī hanumate namaḥ siṃhāsanaṃ samarpayāmi |
pādyam –
suvarṇakalaśānītaṃ gaṅgādi salilairyutam |
pādayoḥ pādyamanaghaṃ pratigṛhya prasīda me ||
oṃ śrī hanumate namaḥ pādayoḥ pādyaṃ samarpayāmi |
arghyam –
lakṣmaṇaprāṇasaṃrakṣa sītāśokavināśana |
gṛhāṇārghyaṃ mayā dattaṃ añjanāpriyanandana ||
oṃ śrī hanumate namaḥ hastayoḥ arghyaṃ samarpayāmi |
ācamanīyam –
vālāgrasetubandhāya śatānanavadhāya ca |
tubhyamācamanaṃ dattaṃ pratigṛhṇīṣva mārute ||
oṃ śrī hanumate namaḥ mukhe ācamanīyaṃ samarpayāmi |
madhuparkam –
arjunadhvajasaṃvāsa daśānanamadāpaha |
madhuparkaṃ pradāsyāmi hanuman pratigṛhyatām ||
oṃ śrī hanumate namaḥ madhuparkaṃ samarpayāmi |
snānam –
gaṅgādisarvatīrthebhyaḥ samānītairnavodakaiḥ |
bhavantaṃ snapayiṣyāmi kapināyaka gṛhyatām ||
oṃ śrī hanumate namaḥ śuddhodaka snānaṃ samarpayāmi |
snānānantaraṃ śuddha ācamanīyaṃ samarpayāmi |
vastram –
pītāmbaramidaṃ tubhyaṃ taptahāṭakasannibham |
dāsyāmi vānaraśreṣṭha saṅgṛhāṇa namo’stu te ||
uttarīyaṃ tu dāsyāmi saṃsārottārakāraṇa |
gṛhāṇa ca mayā prītyā dattaṃ dhatsva yathāvidhi ||
oṃ śrī hanumate namaḥ vastrayugmaṃ samarpayāmi |
yajñopavītam –
navabhistantubhiryuktaṃ triguṇaṃ devatāmayam |
upavītaṃ cottarīyaṃ gṛhāṇa rāmakiṅkara ||
oṃ śrī hanumate namaḥ yajñopavītaṃ samarpayāmi |
gandham –
kastūrīkuṅkumāmiśraṃ karpūrāgaruvāsitam |
śrīcandanaṃ tu dāsyāmi gṛhyatāṃ hanumatprabho ||
oṃ śrī hanumate namaḥ divya śrīcandanaṃ samarpayāmi |
ābharaṇam –
bhūṣaṇāni mahārhāṇi kirīṭapramukhānyaham |
tubhyaṃ dāsyāmi sarveśa gṛhāṇa kapināyaka ||
oṃ śrī hanumate namaḥ sarvābharaṇāni samarpayāmi |
akṣatān –
śālīyānakṣatān ramyān padmarāgasamaprabhān |
akhaṇḍān khaṇḍitadhvānta svīkuruṣva dayānidhe ||
oṃ śrī hanumate namaḥ akṣatān samarpayāmi |
puṣpāṇi –
sugandhīni surūpāṇi vanyāni vividhāni ca |
campakādīni puṣpāṇi kamalānyutpalāni ca ||
tulasīdala bilvāni manasā kalpitāni ca |
gṛhāṇa hanumaddeva praṇato’smi padāmbuje ||
oṃ śrī hanumate namaḥ nānāvidha parimala patra puṣpāṇi samarpayāmi |
atha aṅgapūjā –
oṃ mārutaye namaḥ – pādau pūjayāmi |
oṃ sugrīvasakhāya namaḥ – gulphau pūjayāmi |
oṃ aṅgadamitrāya namaḥ – jaṅghe pūjayāmi |
oṃ rāmadāsāya namaḥ – ūrū pūjayāmi |
oṃ akṣaghnāya namaḥ – kaṭiṃ pūjayāmi |
oṃ laṅkādahanāya namaḥ – vālaṃ pūjayāmi |
oṃ sañjīvananagāhartre namaḥ – skandhau pūjayāmi |
oṃ saumitriprāṇadātre namaḥ – vakṣaḥsthalaṃ pūjayāmi |
oṃ kuṇṭhitadaśakaṇṭhāya namaḥ – kaṇṭhaṃ pūjayāmi |
oṃ rāmābhiṣekakāriṇe namaḥ – hastau pūjayāmi |
oṃ mantraracitarāmāyaṇāya namaḥ – vaktraṃ pūjayāmi |
oṃ prasannavadanāya namaḥ – vadanaṃ pūjayāmi |
oṃ piṅgalanetrāya namaḥ – netrau pūjayāmi |
oṃ śrutiparāyaṇāya namaḥ – śrotre pūjayāmi |
oṃ ūrdhvapuṇḍradhāriṇe namaḥ – lalāṭaṃ pūjayāmi |
oṃ maṇikaṇṭhamālikāya namaḥ – śiraḥ pūjayāmi |
oṃ sarvābhīṣṭapradāya namaḥ – sarvāṇyaṅgani pūjayāmi |
atha aṣṭottaraśatanāma pūjā –
śrī āñjaneya aṣṭottaraśatanāmāvalī paśyatu ||
dhūpam –
divyaṃ saguggulaṃ ramyaṃ daśāṅgena samanvitam |
gṛhāṇa mārute dhūpaṃ supriyaṃ ghrāṇatatparam ||
oṃ śrī hanumate namaḥ dhūpaṃ āghrāpayāmi |
dīpam –
sājyaṃ trivarti samyuktaṃ vahninā yojitaṃ mayā |
gṛhāṇa maṅgalaṃ dīpaṃ trailokya timirāpaham ||
suprakāśo mahādīpaḥ sarvatastimirāpahaḥ |
sabāhyābhyantaraṃ jyotirdīpo’yaṃ pratigṛhyatām ||
oṃ śrī hanumate namaḥ dīpaṃ darśayāmi |
naivedyam –
maṇipātra sahasrāḍhyaṃ divyānnaṃ ghṛtapāyasaṃ
āpūpalaḍḍūkopetaṃ madhurāmraphalairyutam |
hiṅgū jīraka samyuktaṃ ṣaḍrasopetamuttamaṃ
naivedyamarpayāmyadya gṛhāṇedaṃ kapīśvara ||
oṃ śrī hanumate namaḥ ___ naivedyaṃ samarpayāmi |
oṃ bhūrbhuva̱ssuva̍: | tatsa̍vi̱turvare̎ṇya̱ṃ bhargo̍ de̱vasya̍ dhīmahi |
dhiyo̱ yo na̍: praco̱dayā̎t ||
satyaṃ tvā ṛtena pariṣiñcāmi |
(sāyaṅkāle – ṛtaṃ tvā satyena pariṣiñcāmi)
amṛtamastu | a̱mṛ̱to̱pa̱stara̍ṇamasi |
oṃ prā̱ṇāya̱ svāhā̎ | oṃ a̱pā̱nāya̱ svāhā̎ |
oṃ vyā̱nāya̱ svāhā̎ | oṃ u̱dā̱nāya̱ svāhā̎ |
oṃ sa̱mā̱nāya̱ svāhā̎ |
madhye madhye pānīyaṃ samarpayāmi |
a̱mṛ̱tā̱pi̱dhā̱nama̍si | uttarāpośanaṃ samarpayāmi |
hastau prakṣālayāmi | pādau prakṣālayāmi |
śuddhācamanīyaṃ samarpayāmi |
tāmbūlam –
nāgavallīdalopetaṃ kramukairmadhurairyutam |
tāmbūlamarpayāmyadya karpūrādi suvāsitam ||
oṃ śrī hanumate namaḥ tāmbūlaṃ samarpayāmi |
nīrājanam –
ārārtikaṃ tamohāri śatasūrya samaprabham |
arpayāmi tava prītyai andhakāra niṣūdanam ||
oṃ śrī hanumate namaḥ karpūra nīrājanaṃ samarpayāmi |
nīrājanānantaraṃ śuddhācamanīyaṃ samarpayāmi | namaskaromi |
mantrapuṣpam –
oṃ āñjaneyāya vidmahe vāyuputrāya dhīmahi tanno hanumat pracodayāt ||
oṃ śrī hanumate namaḥ mantrapuṣpaṃ samarpayāmi |
ātmapradakṣiṇa-
yāni kāni ca pāpāni janmāntarakṛtāni ca |
tāni tāni praṇaśyanti pradakṣiṇa pade pade ||
pāpo’haṃ pāpakarmā’haṃ pāpātmā pāpasambhava |
trāhi māṃ kṛpayā deva śaraṇāgatavatsala ||
anyathā śaraṇaṃ nāsti tvameva śaraṇaṃ mama |
tasmātkāruṇya bhāvena rakṣa rakṣa kapīśvara ||
oṃ śrī hanumate namaḥ ātmapradakṣiṇa namaskārān samarpayāmi |
sarvopacārāḥ –
oṃ śrī hanumate namaḥ chatraṃ ācchādayāmi |
oṃ śrī hanumate namaḥ cāmarairvījayāmi |
oṃ śrī hanumate namaḥ nṛtyaṃ darśayāmi |
oṃ śrī hanumate namaḥ gītaṃ śrāvayāmi |
oṃ śrī hanumate namaḥ āndolikānārohayāmi |
oṃ śrī hanumate namaḥ aśvānārohayāmi |
oṃ śrī hanumate namaḥ gajānārohayāmi |
samasta rājopacārān devopacārān samarpayāmi |
prārthanā –
manojavaṃ mārutatulyavegaṃ
jitendriyaṃ buddhimatāṃ variṣṭham |
vātātmajaṃ vānarayūthamukhyaṃ
śrīrāmadūtaṃ śirasā namāmi || 1 ||
āñjaneyamatipāṭalānanaṃ
kāñcanādrikamanīyavigraham |
pārijātatarumūlavāsinaṃ
bhāvayāmi pavamānanandanam || 2 ||
markaṭeśa mahotsāha sarvasiddhipradāyaka |
śatrūn saṃhara māṃ rakṣa śriyaṃ dāpaya me prabho || 3 ||
kṣamā prārthanā –
aparādha sahasrāṇi kriyante’harniśaṃ mayā |
dāso’yamiti māṃ matvā kṣamasva kapināyaka ||
āvāhanaṃ na jānāmi na jānāmi visarjanam |
pūjāvidhiṃ na jānāmi kṣamasva vānarottama ||
mantrahīnaṃ kriyāhīnaṃ bhaktihīnaṃ kapīśvara |
yatpūjitaṃ mayā deva paripūrṇaṃ tadastu te ||
anayā dhyāna āvāhanādi ṣoḍaśopacāra pūjayā bhagavān sarvātmakaḥ śrīmadāñjaneya svāmi suprītā suprasannā varadā bhavantu ||
tīrthaprasāda grahaṇam –
akālamṛtyaharaṇaṃ sarvavyādhinivāraṇam |
samasta pāpakṣayakaraṃ śrīāñjaneya pādodakaṃ pāvanaṃ śubham ||
śrī āñjaneyāya namaḥ prasādaṃ śirasā gṛhṇāmi |
oṃ śāntiḥ śāntiḥ śāntiḥ ||
Found a Mistake or Error? Report it Now
