|| Sri Hanuman Kavacham 1 ||
asya śrī hanumat kavacastōtramahāmantrasya vasiṣṭha r̥ṣiḥ anuṣṭup chandaḥ śrī hanumān dēvatā mārutātmaja iti bījaṁ añjanāsūnuriti śaktiḥ vāyuputra iti kīlakaṁ hanumatprasāda siddhyarthē japē viniyōgaḥ ||
ullaṅghya sindhōssalilaṁ salīlaṁ
yaśśōkavahniṁ janakātmajāyāḥ |
ādāya tēnaiva dadāha laṅkāṁ
namāmi taṁ prāñjalirāñjanēyam || 1
manōjavaṁ mārutatulyavēgaṁ
jitēndriyaṁ buddhimatāṁ variṣṭham |
vātātmajaṁ vānarayūthamukhyaṁ
śrīrāmadūtaṁ śirasā namāmi || 2
udyadādityasaṅkāśaṁ udārabhujavikramam |
kandarpakōṭilāvaṇyaṁ sarvavidyāviśāradam || 3
śrīrāmahr̥dayānandaṁ bhaktakalpamahīruham |
abhayaṁ varadaṁ dōrbhyāṁ kalayē mārutātmajam || 4
śrīrāma rāma rāmēti ramē rāmē manōramē |
sahasranāma tattulyaṁ rāmanāma varānanē || 5
pādau vāyusutaḥ pātu rāmadūtastadaṅgulīḥ |
gulphau harīśvaraḥ pātu jaṅghē cārṇavalaṅghanaḥ || 6
jānunī mārutiḥ pātu ūrū pātvasurāntakaḥ |
guhyaṁ vajratanuḥ pātu jaghanaṁ tu jagaddhitaḥ || 7
āñjanēyaḥ kaṭiṁ pātu nābhiṁ saumitrijīvanaḥ |
udaraṁ pātu hr̥dgēhī hr̥dayaṁ ca mahābalaḥ || 8
vakṣō vālāyudhaḥ pātu stanau cā:’mitavikramaḥ |
pārśvau jitēndriyaḥ pātu bāhū sugrīvamantrakr̥t || 9
karāvakṣa jayī pātu hanumāṁśca tadaṅgulīḥ |
pr̥ṣṭhaṁ bhaviṣyadrbahmā ca skandhau mati matāṁ varaḥ || 10
kaṇṭhaṁ pātu kapiśrēṣṭhō mukhaṁ rāvaṇadarpahā |
vaktraṁ ca vaktr̥pravaṇō nētrē dēvagaṇastutaḥ || 11
brahmāstrasanmānakarō bhruvau mē pātu sarvadā |
kāmarūpaḥ kapōlē mē phālaṁ vajranakhō:’vatu || 12
śirō mē pātu satataṁ jānakīśōkanāśanaḥ |
śrīrāmabhaktapravaraḥ pātu sarvakalēbaram || 13
māmahni pātu sarvajñaḥ pātu rātrau mahāyaśāḥ |
vivasvadantēvāsī ca sandhyayōḥ pātu sarvadā || 14
brahmādidēvatādattavaraḥ pātu nirantaram |
ya idaṁ kavacaṁ nityaṁ paṭhēcca śr̥ṇuyānnaraḥ || 15
dīrghamāyuravāpnōti balaṁ dr̥ṣṭiṁ ca vindati |
pādākrāntā bhaviṣyanti paṭhatastasya śatravaḥ |
sthirāṁ sukīrtimārōgyaṁ labhatē śāśvataṁ sukham || 16
iti nigaditavākyavr̥tta tubhyaṁ
sakalamapi svayamāñjanēya vr̥ttam |
api nijajanarakṣaṇaikadīkṣō
vaśaga tadīya mahāmanuprabhāvaḥ || 17
iti śrī hanumat kavacam |
Found a Mistake or Error? Report it Now
