|| Sri Hari Ashtakam (Prahlada Krutam) ||
harirharati pāpāni duṣṭacittairapi smr̥taḥ |
anicchayā:’pi saṁspr̥ṣṭō dahatyēva hi pāvakaḥ || 1 ||
sa gaṅgā sa gayā sētuḥ sa kāśī sa ca puṣkaram |
jihvāgrē vartatē yasya harirityakṣaradvayam || 2 ||
vārāṇasyāṁ kurukṣētrē naimiśāraṇya ēva ca |
yatkr̥taṁ tēna yēnōktaṁ harirityakṣaradvayam || 3 ||
pr̥thivyāṁ yāni tīrthāni puṇyānyāyatanāni ca |
tāni sarvāṇyaśēṣāṇi harirityakṣaradvayam || 4 ||
gavāṁ kōṭisahasrāṇi hēmakanyāsahasrakam |
dattaṁ syāttēna yēnōktaṁ harirityakṣaradvayam || 5 ||
r̥gvēdō:’tha yajurvēdaḥ sāmavēdō:’pyatharvaṇaḥ |
adhītastēna yēnōktaṁ harirityakṣaradvayam || 6 ||
aśvamēdhairmahāyajñairnaramēdhaistathaiva ca |
iṣṭaṁ syāttēna yēnōktaṁ harirityakṣaradvayam || 7 ||
prāṇaḥ prayāṇa pāthēyaṁ saṁsāravyādhināśanam |
duḥkhātyanta paritrāṇaṁ harirityakṣaradvayam || 8 ||
baddhaḥ parikarastēna mōkṣāya gamanaṁ prati |
sakr̥duccāritaṁ yēna harirityakṣaradvayam || 9 ||
haryaṣṭakamidaṁ puṇyaṁ prātarutthāya yaḥ paṭhēt |
āyuṣyaṁ balamārōgyaṁ yaśō vr̥ddhiḥ śriyāvaham || 10 ||
prahlādēna kr̥taṁ stōtraṁ duḥkhasāgaraśōṣaṇam |
yaḥ paṭhētsa narō yāti tadviṣṇōḥ paramaṁ padam || 11 ||
iti prahlādakr̥ta śrī haryaṣṭakam |
Found a Mistake or Error? Report it Now
