ஶ்ரீ ஹரி ஶரணாஷ்டகம்

|| ஶ்ரீ ஹரி ஶரணாஷ்டகம் ||

த்⁴யேயம் வத³ந்தி ஶிவமேவ ஹி கேசித³ந்யே
ஶக்திம் க³ணேஶமபரே து தி³வாகரம் வை ।
ரூபைஸ்து தைரபி விபா⁴ஸி யதஸ்த்வமேவ
தஸ்மாத்த்வமேவ ஶரணம் மம ஶங்க²பாணே ॥ 1 ॥

நோ ஸோத³ரோ ந ஜநகோ ஜநநீ ந ஜாயா
நைவாத்மஜோ ந ச குலம் விபுலம் ப³லம் வா ।
ஸந்த்³ருஶ்யதே ந கில கோ(அ)பி ஸஹாயகோ மே
தஸ்மாத்த்வமேவ ஶரணம் மம ஶங்க²பாணே ॥ 2 ॥

நோபாஸிதா மத³மபாஸ்ய மயா மஹாந்த-
-ஸ்தீர்தா²நி சாஸ்திகதி⁴யா நஹி ஸேவிதாநி ।
தே³வார்சநம் ச விதி⁴வந்ந க்ருதம் கதா³பி
தஸ்மாத்த்வமேவ ஶரணம் மம ஶங்க²பாணே ॥ 3 ॥

து³ர்வாஸநா மம ஸதா³ பரிகர்ஷயந்தி
சித்தம் ஶரீரமபி ரோக³க³ணா த³ஹந்தி ।
ஸஞ்ஜீவநம் ச பரஹஸ்தக³தம் ஸதை³வ
தஸ்மாத்த்வமேவ ஶரணம் மம ஶங்க²பாணே ॥ 4 ॥

பூர்வம் க்ருதாநி து³ரிதாநி மயா து யாநி
ஸ்ம்ருத்வா(அ)கி²லாநி ஹ்ருத³யம் பரிகம்பதே மே ।
க்²யாதா ச தே பதிதபாவநதா து யஸ்மா-
-த்தஸ்மாத்த்வமேவ ஶரணம் மம ஶங்க²பாணே ॥ 5 ॥

து³꞉க²ம் ஜராஜநநஜம் விவிதா⁴ஶ்ச ரோகா³꞉
காகஶ்வஸூகரஜநிர்நிசயே ச பாத꞉ ।
தத்³விஸ்ம்ருதே꞉ ப²லமித³ம் விததம் ஹி லோகே
தஸ்மாத்த்வமேவ ஶரணம் மம ஶங்க²பாணே ॥ 6 ॥

நீசோ(அ)பி பாபவளிதோ(அ)பி விநிந்தி³தோ(அ)பி
ப்³ரூயாத்தவாஹமிதி யஸ்து கிலைகவாரம் ।
தஸ்மை த³தா³ஸி நிஜலோகமிதி வ்ரதம் தே
தஸ்மாத்த்வமேவ ஶரணம் மம ஶங்க²பாணே ॥ 7 ॥

வேதே³ஷு த⁴ர்மவசநேஷு ததா²க³மேஷு
ராமாயணே(அ)பி ச புராணகத³ம்ப³கே வா ।
ஸர்வத்ர ஸர்வவிதி⁴நா க³தி³தஸ்த்வமேவ
தஸ்மாத்த்வமேவ ஶரணம் மம ஶங்க²பாணே ॥ 8 ॥

இதி ஶ்ரீமத்பரமஹம்ஸ ஸ்வாமி ப்³ரஹ்மாநந்த³ விரசிதம் ஶ்ரீ ஹரி ஶரணாஷ்டகம் ।

Found a Mistake or Error? Report it Now