|| Sri Jwalamukhi Stotram 1 ||
śrībhairava uvāca |
tāraṁ yō bhajatē mātarbījaṁ tava sudhākaram |
pārāvārasutā nityaṁ niścalā tadgr̥hē vasēt || 1 ||
śūnyaṁ yō dahanādhirūḍhamamalaṁ vāmākṣisaṁsēvitaṁ
sēnduṁ binduyutaṁ bhavāni varadē svāntē smarēt sādhakaḥ |
mūkasyāpi surēndrasindhujalavadvāgdēvatā bhāratī
gadyaḥ padyamayīṁ nirargalatarā mātarmukhē tiṣṭhati || 2 ||
śubhaṁ vahnyārūḍhaṁ matiyutamanalpēṣṭaphaladaṁ
sabindvīnduṁ mandō yadi japati bījaṁ tava priyam |
tadā mātaḥ svaḥstrījanaviharaṇaklēśasahitaḥ
sukhamindrōdyānē svapiti sa bhavatpūjanarataḥ || 3 ||
jvālāmukhīti japatē tava nāmavarṇān
yaḥ sādhakō giriśapatni subhaktipūrvam |
tasyāṅghripadmayugalaṁ suranāthavēśyāḥ
sīmantaratnakiraṇairanurañjayanti || 4 ||
pāśāmbujābhayadharē mama sarvaśatrūn
śabdaṁ tviti smarati yastava mantramadhyē |
tasyādriputri caraṇau bahupāṁsuyuktau
prakṣālayantyarivadhūnayanāśrupātāḥ || 5 ||
bhakṣayadvayamidaṁ yadi bhaktyā
sādhakō japati cētasi mātaḥ |
sa smarāririva tvatprasādata-
-stvatpadaṁ ca labhatē divāniśam || 6 ||
kūrcabījamanaghaṁ yadi dhyāyēt
sādhakastava mahēśvari yō:’ntaḥ |
aṣṭahastakamalēṣu suvaśyā-
-stasya tryambakasamastasiddhayaḥ || 7 ||
ṭhadvayaṁ tava manūttarasthitaṁ
yō japēttu paramaprabhāvadam |
tasya dēvi hariśaṅkarādayaḥ
pūjayanti caraṇau divaukasaḥ || 8 ||
ōṁ hrīṁ śrīṁ tryakṣarē dēvi surāsuraniṣūdini |
trailōkyābhayadē mātarjvālāmukhi namō:’stu tē || 9 ||
uditārkadyutē lakṣmi lakṣmīnāthasamarcitē |
varāmbujābhayadharē jvālāmukhi namō:’stu tē || 10 ||
sarvasāramayi śarvē sarvāmaranamaskr̥tē |
satyē sati sadācārē jvālāmukhi namō:’stu tē || 11 ||
yasyā mūrdhni śaśī trilōcanagatā yasyā ravīndvagnayaḥ
pāśāmbhōjavarābhayāḥ karatalāmbhōjēṣu saddhētayaḥ |
gātrē kuṅkumasannibhā dyutirahiryasyāgalē santataṁ
dēvīṁ kōṭisahasraraśmisadr̥śīṁ jvālāmukhīṁ naumyaham || 12 ||
nidrāṁ nō bhajatē vidhirbhagavati śaṅkā śivaṁ nō tyajē-
-dviṣṇurvyākulatāmalaṁ kamalinīkāntō:’pi dhattē bhayam |
dr̥ṣṭvā dēvi tvadīyakōpadahanajvālāṁ jvalanti tadā
dēvaḥ kuṅkumapītagaṇḍayugalaḥ saṅkrandanaḥ krandati || 13 ||
yāmārādhya divāniśaṁ surasarittīrē stavairātmabhū-
-rudyadbhāsvaragharmabhānusadr̥śīṁ prāptō:’marajyēṣṭhatām |
dāridryōragadaṣṭalōkatritayīsañjivanīṁ mātaraṁ
dēvīṁ tāṁ hr̥dayē śaśāṅkaśakalācūḍāvataṁsāṁ bhajē || 14 ||
āpīnastanaśrōṇibhāranamitāṁ kandarpadarpōjjvalāṁ
lāvaṇyāṅkitaramyagaṇḍayugalāṁ yastvāṁ smarēt sādhakaḥ |
vaśyāstasya dharābhr̥dīśvarasutē gīrvāṇavāmabhruvaḥ
pādāmbhōjatalaṁ bhajanti tridaśā gandharvasiddhādayaḥ || 15 ||
hr̥tvā dēvi śirō vidhēryadakarōt pātraṁ karāmbhōruhē
śūlaprōtamamuṁ hariṁ vyagamayat sadbhūṣaṇaṁ skandhayōḥ |
kālāntē tritayaṁ mukhēndukuharē śambhōḥ śiraḥ pārvati
tanmātarbhuvanē vicitramakhilaṁ jānē bhavatyāḥ śivē || 16 ||
gāyatrī prakr̥tirgalē:’pi vidhr̥tā sā tvaṁ śivē vēdhasā
śrīrūpā hariṇāpi vakṣasi dhr̥tāpyardhāṅgabhāgē tathā |
śarvēṇāpi bhavāni dēvi sakalāḥ khyātuṁ na śaktā vayaṁ
tvadrūpaṁ hr̥di mādr̥śāṁ jaḍadhiyāṁ dhyātuṁ kathaivāsti kā || 17 ||
jvālāmukhīstavamimaṁ paṭhatē yadantaḥ
śrīmantrarājasahitaṁ vibhavaikahētum |
iṣṭapradānasamayē bhuvi kalpavr̥kṣaṁ
svargaṁ vrajēt suravadhūjanasēvitaḥ saḥ || 18 ||
iti dēvīrahasyē śrī jvālāmukhi stavam |
Found a Mistake or Error? Report it Now
