ಶ್ರೀ ಮಾತಂಗೀ ಕವಚಂ – ೩

|| ಶ್ರೀ ಮಾತಂಗೀ ಕವಚಂ – ೩ ||

ಅಸ್ಯ ಶ್ರೀಮಾತಂಗೀ ಕವಚಮಂತ್ರಸ್ಯ ಮಹಾಯೋಗೀಶ್ವರಋಷಿಃ ಅನುಷ್ಟುಪ್ ಛಂದಃ ಶ್ರೀಮಾತಂಗೀಶ್ವರೀ ದೇವತಾ ಶ್ರೀಮಾತಂಗೀಪ್ರಸಾದಸಿದ್ಧ್ಯರ್ಥೇ ಜಪೇ ವಿನಿಯೋಗಃ ||

ನೀಲೋತ್ಪಲಪ್ರತೀಕಾಶಾಮಂಜನಾದ್ರಿಸಮಪ್ರಭಾಮ್ |
ವೀಣಾಹಸ್ತಾಂ ಗಾನರತಾಂ ಮಧುಪಾತ್ರಂ ಚ ಬಿಭ್ರತೀಮ್ || ೧ ||

ಸರ್ವಾಲಂಕಾರಸಂಯುಕ್ತಾಂ ಶ್ಯಾಮಲಾಂ ಮದಶಾಲಿನೀಮ್ |
ನಮಾಮಿ ರಾಜಮಾತಂಗೀಂ ಭಕ್ತಾನಾಮಿಷ್ಟದಾಯಿನೀಮ್ || ೨ ||

ಏವಂ ಧ್ಯಾತ್ವಾ ಜಪೇನ್ನಿತ್ಯಂ ಕವಚಂ ಸರ್ವಕಾಮದಮ್ |
ಓಂ | ಶಿಖಾಂ ಮೇ ಶ್ಯಾಮಲಾ ಪಾತು ಮಾತಂಗೀ ಮೇ ಶಿರೋಽವತು || ೩ ||

ಲಲಾಟಂ ಪಾತು ಚಂಡೇಶೀ ಭ್ರುವೌ ಮೇ ಮದಶಾಲಿನೀ |
ಕರ್ಣೌ ಮೇ ಪಾತು ಮಾತಂಗೀ ಶಂಖೀ ಕುಂಡಲಶೋಭಿತಾ || ೪ ||

ನೇತ್ರೇ ಮೇ ಪಾತು ರಕ್ತಾಕ್ಷೀ ನಾಸಿಕಾಂ ಪಾತು ಮೇ ಶಿವಾ |
ಗಂಡೌ ಮೇ ಪಾತು ದೇವೇಶೀ ಓಷ್ಠೌ ಬಿಂಬಫಲಾಧರಾ || ೫ ||

ಜಿಹ್ವಾಂ ಮೇ ಪಾತು ವಾಗೀಶೀ ದಂತಾನ್ ಕಲ್ಯಾಣಕಾರಿಣೀ |
ಪಾತು ಮೇ ರಾಜಮಾತಂಗೀ ವದನಂ ಸರ್ವಸಿದ್ಧಿದಾ || ೬ ||

ಕಂಠಂ ಮೇ ಪಾತು ಹೃದ್ಯಾಂಗೀ ವೀಣಾಹಸ್ತಾ ಕರೌ ಮಮ |
ಹೃದಯಂ ಪಾತು ಮೇ ಲಕ್ಷ್ಮೀರ್ನಾಭಿಂ ಮೇ ವಿಶ್ವನಾಯಿಕಾ || ೭ ||

ಮಮ ಪಾರ್ಶ್ವದ್ವಯಂ ಪಾತು ಸೂಕ್ಷ್ಮಮಧ್ಯಾ ಮಹೇಶ್ವರೀ |
ಶುಕಶ್ಯಾಮಾ ಕಟಿಂ ಪಾತು ಗುಹ್ಯಂ ಮೇ ಲೋಕಮೋಹಿನೀ || ೮ ||

ಊರೂ ಮೇ ಪಾತು ಭದ್ರಾಂಗೀ ಜಾನುನೀ ಪಾತು ಶಾಂಕರೀ |
ಜಂಘಾದ್ವಯಂ ಮೇ ಲೋಕೇಶೀ ಪಾದೌ ಮೇ ಪರಮೇಶ್ವರೀ || ೯ ||

ಪ್ರಾಗಾದಿದಿಕ್ಷು ಮಾಂ ಪಾತು ಸರ್ವೈಶ್ವರ್ಯಪ್ರದಾಯಿನೀ |
ರೋಮಾಣಿ ಪಾತು ಮೇ ಕೃಷ್ಣಾ ಭಾರ್ಯಾಂ ಮೇ ಭವವಲ್ಲಭಾ || ೧೦ ||

ಶಂಕರೀ ಸರ್ವತಃ ಪಾತು ಮಮ ಸರ್ವವಶಂಕರೀ |
ಮಹಾಲಕ್ಷ್ಮೀರ್ಮಮ ಧನಂ ವಿಶ್ವಮಾತಾ ಸುತಾನ್ ಮಮ || ೧೧ ||

ಶ್ರೀಮಾತಂಗೀಶ್ವರೀ ನಿತ್ಯಂ ಮಾಂ ಪಾತು ಜಗದೀಶ್ವರೀ |
ಮಾತಂಗೀ ಕವಚಂ ನಿತ್ಯಂ ಯ ಏತತ್ ಪ್ರಪಠೇನ್ನರಃ || ೧೨ ||

ಸುಖಿತ್ವಾ ಸಕಲಾನ್ ಲೋಕಾನ್ ದಾಸೀಭೂತಾನ್ ಕರೋತ್ಯಸೌ |
ಪ್ರಾಪ್ನೋತಿ ಮಹತೀಂ ಕಾಂತಿಂ ಭವೇತ್ ಕಾಮಶತಪ್ರಭಃ || ೧೩ ||

ಲಭತೇ ಮಹತೀಂ ಲಕ್ಷ್ಮೀಂ ತ್ರೈಲೋಕ್ಯೇ ಚಾಪಿ ದುರ್ಲಭಾಮ್ |
ಅಣಿಮಾದ್ಯಷ್ಟಸಿದ್ಧೋಽಯಂ ಸಂಚರತ್ಯೇಷ ಮಾನವಃ || ೧೪ ||

ಸರ್ವವಿದ್ಯಾನಿಧಿರಯಂ ಭವೇದ್ವಾಗೀಶ್ವರೇಶ್ವರಃ |
ಬ್ರಹ್ಮರಾಕ್ಷಸವೇತಾಲಭೂತಪ್ರೇತಪಿಶಾಚಕೈಃ || ೧೫ ||

ಜ್ವಲನ್ವಹ್ನ್ಯಾದಿವತ್ತ್ರಸ್ತೈರ್ವೀಕ್ಷ್ಯತೇ ಭೂತಪೂರ್ವಕೈಃ |
ಪರಮಂ ಯೋಗಮಾಪ್ನೋತಿ ದಿವ್ಯಜ್ಞಾನಂ ಸಮಶ್ನುತೇ || ೧೬ ||

ಪುತ್ರಾನ್ ಪೌತ್ರಾನವಾಪ್ನೋತಿ ಶ್ರೀರ್ವಿದ್ಯಾಕಾಂತಿ ಸಂಯುತಾನ್ |
ತದ್ಭಾರ್ಯಾ ದುರ್ಭಗಾ ಚಾಪಿ ಕಾಂತ್ಯಾ ರತಿಸಮಾ ಭವೇತ್ || ೧೭ ||

ಸರ್ವಾನ್ ಕಾಮಾನವಾಪ್ನೋತಿ ಮಹಾಭೋಗಾನ್ ಸುದುರ್ಲಭಾನ್ |
ಮುಕ್ತಿಮಂತೇ ಸಮಾಪ್ನೋತಿ ಸಾಕ್ಷಾತ್ಪರಶಿವೋ ಭವೇತ್ || ೧೮ ||

ಇತಿ ಶ್ರೀ ಮಹಾಗಮರಹಸ್ಯೇ ದತ್ತಾತ್ರೇಯ ವಾಮದೇವ ಸಂವಾದೇ ಸಪ್ತಮಪರಿಚ್ಛೇದೇ ಶ್ರೀ ಮಾತಂಗೀ ಕವಚಮ್ |

Found a Mistake or Error? Report it Now