ஶ்ரீ மாதங்கீ³ கவசம்

அஸ்ய ஶ்ரீமாதங்கீ³ கவசமந்த்ரஸ்ய மஹாயோகீ³ஶ்வரருஷி꞉ அநுஷ்டுப் ச²ந்த³꞉ ஶ்ரீமாதங்கீ³ஶ்வரீ தே³வதா ஶ்ரீமாதங்கீ³ப்ரஸாத³ஸித்³த்⁴யர்தே² ஜபே விநியோக³꞉ ॥

நீலோத்பலப்ரதீகாஶாமஞ்ஜநாத்³ரிஸமப்ரபா⁴ம் ।
வீணாஹஸ்தாம் கா³நரதாம் மது⁴பாத்ரம் ச பி³ப்⁴ரதீம் ॥ 1 ॥

ஸர்வாலங்காரஸம்யுக்தாம் ஶ்யாமளாம் மத³ஶாலிநீம் ।
நமாமி ராஜமாதங்கீ³ம் ப⁴க்தாநாமிஷ்டதா³யிநீம் ॥ 2 ॥

ஏவம் த்⁴யாத்வா ஜபேந்நித்யம் கவசம் ஸர்வகாமத³ம் ।
ஓம் । ஶிகா²ம் மே ஶ்யாமளா பாது மாதங்கீ³ மே ஶிரோ(அ)வது ॥ 3 ॥

லலாடம் பாது சண்டே³ஶீ ப்⁴ருவௌ மே மத³ஶாலிநீ ।
கர்ணௌ மே பாது மாதங்கீ³ ஶங்கீ² குண்ட³லஶோபி⁴தா ॥ 4 ॥

நேத்ரே மே பாது ரக்தாக்ஷீ நாஸிகாம் பாது மே ஶிவா ।
க³ண்டௌ³ மே பாது தே³வேஶீ ஓஷ்டௌ² பி³ம்ப³ப²லாத⁴ரா ॥ 5 ॥

ஜிஹ்வாம் மே பாது வாகீ³ஶீ த³ந்தாந் கல்யாணகாரிணீ ।
பாது மே ராஜமாதங்கீ³ வத³நம் ஸர்வஸித்³தி⁴தா³ ॥ 6 ॥

கண்ட²ம் மே பாது ஹ்ருத்³யாங்கீ³ வீணாஹஸ்தா கரௌ மம ।
ஹ்ருத³யம் பாது மே லக்ஷ்மீர்நாபி⁴ம் மே விஶ்வநாயிகா ॥ 7 ॥

மம பார்ஶ்வத்³வயம் பாது ஸூக்ஷ்மமத்⁴யா மஹேஶ்வரீ ।
ஶுகஶ்யாமா கடிம் பாது கு³ஹ்யம் மே லோகமோஹிநீ ॥ 8 ॥

ஊரூ மே பாது ப⁴த்³ராங்கீ³ ஜாநுநீ பாது ஶாங்கரீ ।
ஜங்கா⁴த்³வயம் மே லோகேஶீ பாதௌ³ மே பரமேஶ்வரீ ॥ 9 ॥

ப்ராகா³தி³தி³க்ஷு மாம் பாது ஸர்வைஶ்வர்யப்ரதா³யிநீ ।
ரோமாணி பாது மே க்ருஷ்ணா பா⁴ர்யாம் மே ப⁴வவல்லபா⁴ ॥ 10 ॥

ஶங்கரீ ஸர்வத꞉ பாது மம ஸர்வவஶங்கரீ ।
மஹாலக்ஷ்மீர்மம த⁴நம் விஶ்வமாதா ஸுதாந் மம ॥ 11 ॥

ஶ்ரீமாதங்கீ³ஶ்வரீ நித்யம் மாம் பாது ஜக³தீ³ஶ்வரீ ।
மாதங்கீ³ கவசம் நித்யம் ய ஏதத் ப்ரபடே²ந்நர꞉ ॥ 12 ॥

ஸுகி²த்வா ஸகலாந் லோகாந் தா³ஸீபூ⁴தாந் கரோத்யஸௌ ।
ப்ராப்நோதி மஹதீம் காந்திம் ப⁴வேத் காமஶதப்ரப⁴꞉ ॥ 13 ॥

லப⁴தே மஹதீம் லக்ஷ்மீம் த்ரைலோக்யே சாபி து³ர்லபா⁴ம் ।
அணிமாத்³யஷ்டஸித்³தோ⁴(அ)யம் ஸஞ்சரத்யேஷ மாநவ꞉ ॥ 14 ॥

ஸர்வவித்³யாநிதி⁴ரயம் ப⁴வேத்³வாகீ³ஶ்வரேஶ்வர꞉ ।
ப்³ரஹ்மராக்ஷஸவேதாலபூ⁴தப்ரேதபிஶாசகை꞉ ॥ 15 ॥

ஜ்வலந்வஹ்ந்யாதி³வத்த்ரஸ்தைர்வீக்ஷ்யதே பூ⁴தபூர்வகை꞉ ।
பரமம் யோக³மாப்நோதி தி³வ்யஜ்ஞாநம் ஸமஶ்நுதே ॥ 16 ॥

புத்ராந் பௌத்ராநவாப்நோதி ஶ்ரீர்வித்³யாகாந்தி ஸம்யுதாந் ।
தத்³பா⁴ர்யா து³ர்ப⁴கா³ சாபி காந்த்யா ரதிஸமா ப⁴வேத் ॥ 17 ॥

ஸர்வாந் காமாநவாப்நோதி மஹாபோ⁴கா³ந் ஸுது³ர்லபா⁴ந் ।
முக்திமந்தே ஸமாப்நோதி ஸாக்ஷாத்பரஶிவோ ப⁴வேத் ॥ 18 ॥

இதி ஶ்ரீ மஹாக³மரஹஸ்யே த³த்தாத்ரேய வாமதே³வ ஸம்வாதே³ ஸப்தமபரிச்சே²தே³ ஶ்ரீ மாதங்கீ³ கவசம் ।

Found a Mistake or Error? Report it Now