|| Sri Natesha Stava ||
hrīmatyā śivayā virāṇmayamajaṁ hr̥tpaṅkajasthaṁ sadā
hrīṇānā śivakīrtanē hitakaraṁ hēlāhr̥dā māninām |
hōbērādisugandhavasturuciraṁ hēmādribāṇāsanaṁ
hrīṅkārādikapādapīṭhamamalaṁ hr̥dyaṁ naṭēśaṁ bhajē || 1 ||
śrīmajjñānasabhāntarē pravilasacchrīpañcavarṇākr̥tiṁ
śrīvāṇīvinutāpadānanicayaṁ śrīvallabhēnārcitam |
śrīvidyāmanumōdinaṁ śritajanaśrīdāyakaṁ śrīdharaṁ
śrīcakrāntaravāsinaṁ śivamahaṁ śrīmannaṭēśaṁ bhajē || 2 ||
navyāmbhōjamukhaṁ namajjananidhiṁ nārāyaṇēnārcitaṁ
nākaukōnagarīnaṭīlasitakaṁ nāgādinālaṅkr̥tam |
nānārūpakanartanādicaturaṁ nālīkajānvēṣitaṁ
nādātmānamahaṁ nagēndratanayānāthaṁ naṭēśaṁ bhajē || 3 ||
madhyasthaṁ madhuvairimārgitapadaṁ madvaṁśanāthaṁ prabhuṁ
mārātītamatīva mañjuvapuṣaṁ mandāragauraprabham |
māyātītamaśēṣamaṅgalanidhiṁ madbhāvanābhāvitaṁ
madhyēvyōmasabhāguhāntamakhilākāśaṁ naṭēśaṁ bhajē || 4 ||
śiṣṭaiḥ pūjitapādukaṁ śivakaraṁ śītāṁśurēkhādharaṁ
śilpaṁ bhaktajanāvanē śithilitāghaughaṁ śivāyāḥ priyam |
śikṣārakṣaṇamambujāsanaśiraḥ saṁhāraśīlaprabhuṁ
śītāpāṅgavilōcanaṁ śivamahaṁ śrīmannaṭēśaṁ bhajē || 5 ||
vāṇīvallabhavandyavaibhavayutaṁ vandārucintāmaṇiṁ
vātāśādhipabhūṣaṇaṁ parakr̥pāvārānnidhiṁ yōginām |
vāñchāpūrtikaraṁ valārivinutaṁ vāhīkr̥tāmnāyakaṁ
vāmaṅgāttavarāṅganaṁ mama hr̥dāvāsaṁ naṭēśaṁ bhajē || 6 ||
yakṣādhīśasakhaṁ yamapramathanaṁ yāminyadhīśāsanaṁ
yajñadhvaṁsakaraṁ yatīndravinutaṁ yajñakriyādīśvaram |
yājyaṁ yājakarūpiṇaṁ yamadhanairyatnōpalabhyāṅghrikaṁ
vājībhūtavr̥ṣaṁ sadā hr̥di mamāyattaṁ naṭēśaṁ bhajē || 7 ||
māyāśrīvilasaccidambaramahāpañcākṣarairaṅkitān
ślōkān sapta paṭhanti yē:’nudivasaṁ cintāmaṇīnāmakān |
tēṣāṁ bhāgyamanēkamāyuradhikān vidvadvarān satsutān
sarvābhīṣṭamasau dadāti sahasā śrīmatsabhādhīśvaraḥ || 8 ||
iti śrī naṭēśa stavaḥ |
Found a Mistake or Error? Report it Now
