|| శ్రీ పుండరీకాక్ష స్తోత్రం ||
వరాహ ఉవాచ |
నమస్తే పుండరీకాక్ష నమస్తే మధుసూదన |
నమస్తే సర్వలోకేశ నమస్తే తిగ్మచక్రిణే || ౧ ||
విశ్వమూర్తిం మహాబాహుం వరదం సర్వతేజసమ్ |
నమామి పుండరీకాక్షం విద్యాఽవిద్యాత్మకం విభుమ్ || ౨ ||
ఆదిదేవం మహాదేవం వేదవేదాంగపారగమ్ |
గంభీరం సర్వదేవానాం నమస్యే వారిజేక్షణమ్ || ౩ ||
సహస్రశీర్షిణం దేవం సహస్రాక్షం మహాభుజమ్ |
జగత్సంవ్యాప్య తిష్ఠంతం నమస్యే పరమేశ్వరమ్ || ౪ ||
శరణ్యం శరణం దేవం విష్ణుం జిష్ణుం సనాతనమ్ |
నీలమేఘప్రతీకాశం నమస్యే చక్రపాణినమ్ || ౫ ||
శుద్ధం సర్వగతం నిత్యం వ్యోమరూపం సనాతనమ్ |
భావాభావవినిర్ముక్తం నమస్యే సర్వగం హరిమ్ || ౬ ||
నాన్యత్కించిత్ప్రపశ్యామి వ్యతిరిక్తం త్వయాఽచ్యుత |
త్వన్మయం చ ప్రపశ్యామి సర్వమేతచ్చరాచరమ్ || ౭ ||
ఇతి శ్రీవరాహపురాణే షష్ఠోఽధ్యాయే శ్రీపుండరీకాక్ష స్తోత్రమ్ |
Found a Mistake or Error? Report it Now
