|| Sri Raghavendra Mangala Ashtakam ||
śrīmadrāmapādāravindamadhupaḥ śrīmadhvavaṁśādhipaḥ
sacciṣyōḍugaṇōḍupaḥ śritajagadgīrvāṇasatpādapaḥ |
atyarthaṁ manasā kr̥tācyutajapaḥ pāpāndhakārātapaḥ
śrīmatsadgururāghavēndrayatirāṭ kuryāddhruvaṁ maṅgalam || 1 ||
karmandīndrasudhīndrasadgurukarāmbhōjōdbhavaḥ santataṁ
prājyadhyānavaśīkr̥tākhilajagadvāstavyalakṣmīdhavaḥ |
sacchāstrādi vidūṣakākhilamr̥ṣāvādībhakaṇṭhīravaḥ
śrīmatsadgururāghavēndrayatirāṭ kuryāddhruvaṁ maṅgalam || 2 ||
sālaṅkārakakāvyanāṭakakalākāṇādapātañjala
trayyarthasmr̥tijaiminīyakavitāsaṅgītapāraṅgataḥ |
viprakṣatraviḍaṅghrijātamukharānēkaprajāsēvitaḥ
śrīmatsadgururāghavēndrayatirāṭ kuryāddhruvaṁ maṅgalam || 3 ||
raṅgōttuṅgataraṅgamaṅgalakara śrītuṅgabhadrātaṭa
pratyaksthadvijapuṅgavālaya lasanmantrālayākhyē purē |
navyēndrōpalanīlabhavyakarasadvr̥ndāvanāntargataḥ
śrīmatsadgururāghavēndrayatirāṭ kuryāddhruvaṁ maṅgalam || 4 ||
vidvadrājaśiraḥkirīṭakhacitānarghyōruratnaprabhā
rāgāghaughahapādukādvayacaraḥ padmākṣamālādharaḥ |
bhāsvaddaṇṭakamaṇḍalōjjvalakarō raktāmbarāḍambaraḥ
śrīmatsadgururāghavēndrayatirāṭ kuryāddhruvaṁ maṅgalam || 5 ||
yadvr̥ndāvanasatpradakṣiṇanamaskārābhiṣēkastuti-
dhyānārādhanamr̥dvilēpanamukhānēkōpacārān sadā |
kāraṁ kāramabhiprayānti caturō lōkāḥ pumarthān sadā
śrīmatsadgururāghavēndrayatirāṭ kuryāddhruvaṁ maṅgalam || 6 ||
vēdavyāsamunīśamadhvayatirāṭ ṭīkāryavākyāmr̥taṁ
jñātvā:’dvaitamataṁ halāhalasamaṁ tyaktvā samākhyāptayē |
saṅkhyāvatsukhadāṁ daśōpaniṣadāṁ vyākhyāṁ samākhyanmudā
śrīmatsadgururāghavēndrayatirāṭ kuryāddhruvaṁ maṅgalam || 7 ||
śrīmadvaiṣṇavalōkajālakaguruḥ śrīmatparivrāḍguruḥ
śāstrē dēvaguruḥ śritāmarataruḥ pratyūhagōtrasvaruḥ |
cētō:’tītaśirustathā jitavarussatsaukhyasampatkaruḥ
śrīmatsadgururāghavēndrayatirāṭ kuryāddhruvaṁ maṅgalam || 8 ||
yassandhyāsvaniśaṁ gurōryatipatēḥ sanmaṅgalasyāṣṭakaṁ
sadyaḥ pāpaharaṁ svasēvi viduṣāṁ bhaktyaitadābhāṣitam |
bhaktyā vakti susampadaṁ śubhapadaṁ dīrghāyurārōgyakaṁ
kīrtiṁ putrakalatrabāndhavasuhr̥nmūrtiḥ prayāti dhruvam ||
iti śrīmadappaṇācāryakr̥taṁ śrīrāghavēndramaṅgalāṣṭakaṁ sampūrṇam |
Found a Mistake or Error? Report it Now
