|| Sri Rama Anusmruti Stotram ||
brahmōvāca |
vandē rāmaṁ jagadvandyaṁ sundarāsyaṁ śucismitam |
kandarpakōṭilāvaṇyaṁ kāmitārthapradāyakam || 1 ||
bhāsvatkirīṭakaṭakakaṭisūtrōpaśōbhitam |
viśālalōcanaṁ bhrājattaruṇāruṇakuṇḍalam || 2 ||
śrīvatsakaustubhalasadvakṣasaṁ vanamālinam |
muktāhārasuśōbhāḍhyaṁ mudrikāratnabhāsuram || 3 ||
sarvāṅgasundaraṁ hr̥dyaṁ dvibhujaṁ raghunandanam |
nīlajīmūtasaṅkāśaṁ nīlālakavr̥tānanam || 4 ||
jñānamudrālasadvakṣōbāhuṁ jñānamayaṁ harim |
vāmajānūparinyastavāmahastāmbujaṁ prabhum || 5 ||
vīrāsanē samāsīnaṁ vidyutpuñjanibhāmbaram |
kōṭisūryapratīkāśaṁ kōmalāṅgasamujjvalam || 6 ||
jānakīlakṣmaṇābhyāṁ ca vāmadakṣiṇaśōbhitam |
hanumadravimukhyādikapimukhyaiśca sēvitam || 7 ||
divyaratnasamāyuktasiṁhāsanagataṁ prabhum |
pratyahaṁ prātarutthāya dhyātvaivaṁ rāghavaṁ hr̥di || 8 ||
ēbhiḥ ṣōḍaśabhirnāmapadaiḥ stutvā namēddharim |
namō rāmāya śuddhāya buddhāya paramātmanē || 9 ||
viśuddhajñānadēhāya raghunāthāya tē namaḥ |
namō rāvaṇahantrē tē namō vālivināśinē || 10 ||
namō vaikuṇṭhanāthāya namō viṣṇusvarūpiṇē |
namō yajñasvarūpāya yajñabhōktrē namō namaḥ || 11 ||
yōgidhyēyāya yōgāya paramānandarūpiṇē |
śaṅkarapriyamitrāya jānakījānayē namaḥ || 12 ||
ya ēvaṁ prātarutthāya bhaktiśraddhāsamanvitaḥ |
ṣōḍaśaitāni nāmāni rāmacandrasya nityaśaḥ || 13 ||
paṭhēdvidvān smaran rāmaṁ sa ēva syādraghūttamaḥ |
śrīrāmē bhaktiracalā bhavatyēva hi sarvadā || 14 ||
samayē samanuprāptē rāghavaḥ sītayā saha |
hr̥di sandr̥śyatē tasya sākṣāt saumitriṇā saha || 15 ||
nityaṁ cāpararātrēṣu rāmasyaitāṁ samāhitaḥ |
mucyatē:’nusmr̥tiṁ japtvā mr̥tyudāridryapātakaiḥ || 16 ||
iti brahmaprōktaṁ śrīrāmānusmr̥ti stōtram |
Found a Mistake or Error? Report it Now
