|| Sri Rama Stavaraja Stotram ||
asya śrīrāmacandra stavarājastōtramantrasya sanatkumārar̥ṣiḥ | śrīrāmō dēvatā | anuṣṭup chandaḥ | sītā bījam | hanumān śaktiḥ | śrīrāmaprītyarthē japē viniyōgaḥ ||
sūta uvāca |
sarvaśāstrārthatattvajñaṁ vyāsaṁ satyavatīsutam |
dharmaputraḥ prahr̥ṣṭātmā pratyuvāca munīśvaram || 1 ||
yudhiṣṭhira uvāca |
bhagavanyōgināṁ śrēṣṭha sarvaśāstraviśārada |
kiṁ tattvaṁ kiṁ paraṁ jāpyaṁ kiṁ dhyānam muktisādhanam || 2 ||
śrōtumicchāmi tatsarvaṁ brūhi mē munisattama || 3 ||
vēdavyāsa uvāca |
dharmarāja mahābhāga śr̥ṇu vakṣyāmi tattvataḥ || 4 ||
yatparaṁ yadguṇātītaṁ yajjyōtiramalaṁ śivam |
tadēva paramaṁ tattvaṁ kaivalyapadakāraṇam || 5 ||
śrīrāmēti paraṁ jāpyaṁ tārakaṁ brahmasañjñakam |
brahmahatyādipāpaghnamiti vēdavidō viduḥ || 6 ||
śrīrāma rāmēti janā yē japanti ca sarvadā |
tēṣāṁ bhuktiśca muktiśca bhaviṣyati na saṁśayaḥ || 7 ||
stavarājaṁ purā prōktaṁ nāradēna ca dhīmatā |
tatsarvaṁ sampravakṣyāmi haridhyānapuraḥsaram || 8 ||
tāpatrayāgniśamanaṁ sarvāghaughanikr̥ntanam |
dāridryaduḥkhaśamanaṁ sarvasampatkaraṁ śivam || 9 ||
vijñānaphaladaṁ divyaṁ mōkṣaikaphalasādhanam |
namaskr̥tya pravakṣyāmi rāmaṁ kr̥ṣṇaṁ jaganmayam || 10 ||
ayōdhyānagarē ramyē ratnamaṇḍapamadhyagē |
smarētkalpatarōrmūlē ratnasiṁhāsanaṁ śubham || 11 ||
tanmadhyē:’ṣṭadalaṁ padmaṁ nānāratnaiśca vēṣṭitam |
smarēnmadhyē dāśarathiṁ sahasrādityatējasam || 12 ||
pituraṅkagataṁ rāmamindranīlamaṇiprabham |
kōmalāṅgaṁ viśālākṣaṁ vidyudvarṇāmbarāvr̥tam || 13 ||
bhānukōṭipratīkāśa kirīṭēna virājitam |
ratnagraivēyakēyūraratnakuṇḍalamaṇḍitam || 14 ||
ratnakaṅkaṇamañjīrakaṭisūtrairalaṅkr̥tam |
śrīvatsakaustubhōraskaṁ muktāhārōpaśōbhitam || 15 ||
divyaratnasamāyuktamudrikābhiralaṅkr̥tam |
rāghavaṁ dvibhujaṁ bālaṁ rāmamīṣatsmitānanam || 16 ||
tulasīkundamandārapuṣpamālyairalaṅkr̥tam |
karpūrāgurukastūrīdivyagandhānulēpanam || 17 ||
yōgaśāstrēṣvabhirataṁ yōgēśaṁ yōgadāyakam |
sadā bharatasaumitriśatrughnairupaśōbhitam || 18 ||
vidyādharasurādhīśasiddhagandharvakinnaraiḥ |
yōgīndrairnāradādyaiśca stūyamānamaharniśam || 19 ||
viśvāmitravasiṣṭhādimunibhiḥ parisēvitam |
sanakādimuniśrēṣṭhairyōgivr̥ndaiśca sēvitam || 20 ||
rāmaṁ raghuvaraṁ vīraṁ dhanurvēdaviśāradam |
maṅgalāyatanaṁ dēvaṁ rāmaṁ rājīvalōcanam || 21 ||
sarvaśāstrārthatattvajñamānandakarasundaram |
kausalyānandanaṁ rāmaṁ dhanurbāṇadharaṁ harim || 22 ||
ēvaṁ sañcintayanviṣṇuṁ yajjyōtiramalaṁ vibhum |
prahr̥ṣṭamānasō bhūtvā munivaryaḥ sa nāradaḥ || 23 ||
sarvalōkahitārthāya tuṣṭāva raghunandanam |
kr̥tāñjalipuṭō bhūtvā cintayannadbhutaṁ harim || 24 ||
yadēkaṁ yatparaṁ nityaṁ yadanantaṁ cidātmakam |
yadēkaṁ vyāpakaṁ lōkē tadrūpaṁ cintayāmyaham || 25 ||
vijñānahētuṁ vimalāyatākṣaṁ
prajñānarūpaṁ svasukhaikahētum |
śrīrāmacandraṁ harimādidēvaṁ
parātparaṁ rāmamahaṁ bhajāmi || 26 ||
kaviṁ purāṇaṁ puruṣaṁ purastā-
-tsanātanaṁ yōginamīśitāram |
aṇōraṇīyāṁsamanantavīryaṁ
prāṇēśvaraṁ rāmamasau dadarśa || 27 ||
nārada uvāca |
nārāyaṇaṁ jagannāthamabhirāmaṁ jagatpatim |
kaviṁ purāṇaṁ vāgīśaṁ rāmaṁ daśarathātmajam || 28 ||
rājarājaṁ raghuvaraṁ kausalyānandavardhanam |
bhargaṁ varēṇyaṁ viśvēśaṁ raghunāthaṁ jagadgurum || 29 ||
satyaṁ satyapriyaṁ śrēṣṭhaṁ jānakīvallabhaṁ vibhum |
saumitripūrvajaṁ śāntaṁ kāmadaṁ kamalēkṣaṇam || 30 ||
ādityaṁ ravimīśānaṁ ghr̥ṇiṁ sūryamanāmayam |
ānandarūpiṇaṁ saumyaṁ rāghavaṁ karuṇāmayam || 31 ||
jāmadagniṁ tapōmūrtiṁ rāmaṁ paraśudhāriṇam |
vākpatiṁ varadaṁ vācyaṁ śrīpatiṁ pakṣivāhanam || 32 ||
śrīśārṅgadhāriṇaṁ rāmaṁ cinmayānandavigraham |
haladhr̥gviṣṇumīśānaṁ balarāmaṁ kr̥pānidhim || 33 ||
śrīvallabhaṁ kr̥pānāthaṁ jaganmōhanamacyutam |
matsyakūrmavarāhādirūpadhāriṇamavyayam || 34 ||
vāsudēvaṁ jagadyōnimanādinidhanaṁ harim |
gōvindaṁ gōpatiṁ viṣṇuṁ gōpījanamanōharam || 35 ||
gōgōpālaparīvāraṁ gōpakanyāsamāvr̥tam |
vidyutpuñjapratīkāśaṁ rāmaṁ kr̥ṣṇaṁ jaganmayam || 36 ||
gōgōpikāsamākīrṇaṁ vēṇuvādanatatparam |
kāmarūpaṁ kalāvantaṁ kāminīkāmadaṁ vibhum || 37 ||
manmathaṁ mathurānāthaṁ mādhavaṁ makaradhvajam |
śrīdharaṁ śrīkaraṁ śrīśaṁ śrīnivāsaṁ parātparam || 38 ||
bhūtēśaṁ bhūpatiṁ bhadraṁ vibhūtiṁ bhūmibhūṣaṇam |
sarvaduḥkhaharaṁ vīraṁ duṣṭadānavavairiṇam || 39 ||
śrīnr̥siṁhaṁ mahābāhuṁ mahāntaṁ dīptatējasam |
cidānandamayaṁ nityaṁ praṇavaṁ jyōtirūpiṇam || 40 ||
ādityamaṇḍalagataṁ niścitārthasvarūpiṇam |
bhaktipriyaṁ padmanētraṁ bhaktānāmīpsitapradam || 41 ||
kausalyēyaṁ kalāmūrtiṁ kākutsthaṁ kamalāpriyam |
siṁhāsanē samāsīnaṁ nityavratamakalmaṣam || 42 ||
viśvāmitrapriyaṁ dāntaṁ svadāraniyatavratam |
yajñēśaṁ yajñapuruṣaṁ yajñapālanatatparam || 43 ||
satyasandhaṁ jitakrōdhaṁ śaraṇāgatavatsalam |
sarvaklēśāpaharaṇaṁ vibhīṣaṇavarapradam || 44 ||
daśagrīvaharaṁ raudraṁ kēśavaṁ kēśimardanam |
vālipramathanaṁ vīraṁ sugrīvēpsitarājyadam || 45 ||
naravānaradēvaiścasēvitaṁ hanumatpriyam |
śuddhaṁ sūkṣmaṁ paraṁ śāntaṁ tārakaṁ brahmarūpiṇam || 46 ||
sarvabhūtātmabhūtasthaṁ sarvādhāraṁ sanātanam |
sarvakāraṇakartāraṁ nidānaṁ prakr̥tēḥ param || 47 ||
nirāmayaṁ nirābhāsaṁ niravadyaṁ nirañjanam |
nityānandaṁ nirākāramadvaitaṁ tamasaḥ param || 48 ||
parātparataraṁ tattvaṁ satyānandaṁ cidātmakam |
manasā śirasā nityaṁ praṇamāmi raghūttamam || 49 ||
sūryamaṇḍalamadhyasthaṁ rāmaṁ sītāsamanvitam |
namāmi puṇḍarīkākṣamamēyaṁ gurutatparam || 50 ||
namō:’stu vāsudēvāya jyōtiṣāṁ patayē namaḥ |
namō:’stu rāmadēvāya jagadānandarūpiṇē || 51 ||
namō vēdāntaniṣṭhāya yōginē brahmavādinē |
māyāmayanirāsāya prapannajanasēvinē || 52 ||
vandāmahē mahēśānacaṇḍakōdaṇḍakhaṇḍanam |
jānakīhr̥dayānandavardhanaṁ raghunandanam || 53 ||
utphullāmalakōmalōtpaladalaśyāmāya rāmāya tē-
-:’kāmāya pramadāmanōharaguṇagrāmāya rāmātmanē |
yōgārūḍhamunīndramānasasarōhaṁsāya saṁsāravi-
-dhvaṁsāya sphuradōjasē raghukulōttaṁsāya puṁsē namaḥ || 54 ||
bhavōdbhavaṁ vēdavidāṁ variṣṭha-
-mādityacandrānalasuprabhāvam |
sarvātmakaṁ sarvagatasvarūpaṁ
namāmi rāmaṁ tamasaḥ parastāt || 55 ||
nirañjanaṁ niṣpratimaṁ nirīhaṁ
nirāśrayaṁ niṣkalamaprapañcam |
nityaṁ dhruvaṁ nirviṣayasvarūpaṁ
nirantaraṁ rāmamahaṁ bhajāmi || 56 ||
bhavābdhipōtaṁ bharatāgrajaṁ taṁ
bhaktipriyaṁ bhānukulapradīpam |
bhūtatrināthaṁ bhuvanādhipaṁ taṁ
bhajāmi rāmaṁ bhavarōgavaidyam || 57 ||
sarvādhipatyaṁ samarāṅgadhīraṁ
satyaṁ cidānandamayasvarūpam |
satyaṁ śivaṁ śāntimayaṁ śaraṇyaṁ
sanātanaṁ rāmamahaṁ bhajāmi || 58 ||
kāryakriyākāraṇamapramēyaṁ
kaviṁ purāṇaṁ kamalāyatākṣam |
kumāravēdyaṁ karuṇāmayaṁ taṁ
kalpadrumaṁ rāmamahaṁ bhajāmi || 59 ||
trailōkyanāthaṁ sarasīruhākṣaṁ
dayānidhiṁ dvandvavināśahētum |
mahābalaṁ vēdanidhiṁ surēśaṁ
sanātanaṁ rāmamahaṁ bhajāmi || 60 ||
vēdāntavēdyaṁ kavimīśitāra-
-manādimadhyāntamacintyamādyam |
agōcaraṁ nirmalamēkarūpaṁ
namāmi rāmaṁ tamasaḥ parastāt || 61 ||
aśēṣavēdātmakamādisañjña-
-majaṁ hariṁ viṣṇumanantamādyam |
apārasaṁvitsukhamēkarūpaṁ
parātparaṁ rāmamahaṁ bhajāmi || 62 ||
tattvasvarūpaṁ puruṣaṁ purāṇaṁ
svatējasā pūritaviśvamēkam |
rājādhirājaṁ ravimaṇḍalasthaṁ
viśvēśvaraṁ rāmamahaṁ bhajāmi || 63 ||
lōkābhirāmaṁ raghuvaṁśanāthaṁ
hariṁ cidānandamayaṁ mukundam |
aśēṣavidyādhipatiṁ kavīndraṁ
namāmi rāmaṁ tamasaḥ parastāt || 64 ||
yōgīndrasaṅghaiśca susēvyamānaṁ
nārāyaṇaṁ nirmalamādidēvam |
natō:’smi nityaṁ jagadēkanātha-
-mādityavarṇaṁ tamasaḥ parastāt || 65 ||
vibhūtidaṁ viśvasr̥jaṁ virāmaṁ
rājēndramīśaṁ raghuvaṁśanātham |
acintyamavyaktamanantamūrtiṁ
jyōtirmayaṁ rāmamahaṁ bhajāmi || 66 ||
aśēṣasaṁsāravihārahīna-
-mādityagaṁ pūrṇasukhābhirāmam |
samastasākṣiṁ tamasaḥ parastā-
-nnārāyaṇaṁ viṣṇumahaṁ bhajāmi || 67 ||
munīndraguhyaṁ paripūrṇakāmaṁ
kalānidhiṁ kalmaṣanāśahētum |
parātparaṁ yatparamaṁ pavitraṁ
namāmi rāmaṁ mahatō mahāntam || 68 ||
brahmā viṣṇuśca rudraśca dēvēndrō dēvatāstathā |
ādityādigrahāścaiva tvamēva raghunandana || 69 ||
tāpasā r̥ṣayaḥ siddhāḥ sādhyāśca marutastathā |
viprā vēdāstathā yajñāḥ purāṇaṁ dharmasaṁhitāḥ || 70 ||
varṇāśramāstathā dharmā varṇadharmāstathaiva ca |
yakṣarākṣasagandharvādikpālā diggajādayaḥ || 71 ||
sanakādimuniśrēṣṭhāstvamēva raghupuṅgava |
vasavō:’ṣṭau trayaḥ kālā rudrā ēkādaśa smr̥tāḥ || 72 ||
tārakāḥ daśa dik caiva tvamēva raghunandana |
saptadvīpāḥ samudrāśca nagāḥ nadyastathā drumāḥ || 73 ||
sthāvarāḥ jaṅgamāścaiva tvamēva raghunāyaka |
dēvatiryaṅmanuṣyāṇāṁ dānavānāṁ tathaiva ca || 74 ||
mātā pitā tathā bhrātā tvamēva raghuvallabha |
sarvēṣāṁ tvaṁ paraṁ brahma tvanmayaṁ sarvamēva hi || 75 ||
tvamakṣaraṁ paraṁ jyōtistvamēva puruṣōttama |
tvamēva tārakaṁ brahma tvattō:’nyannaiva kiñcana || 76 ||
śāntaṁ sarvagataṁ sūkṣmaṁ paraṁ brahma sanātanam |
rājīvalōcanaṁ rāmaṁ praṇamāmi jagatpatim || 77 ||
vyāsa uvāca |
tataḥ prasannaḥ śrīrāmaḥ prōvāca munipuṅgavam |
tuṣṭō:’smi muniśārdūla vr̥ṇīṣva varamuttamam || 78 ||
nārada uvāca |
yadi tuṣṭō:’si sarvajña śrīrāma karuṇānidhē |
tvanmūrtidarśanēnaiva kr̥tārthō:’haṁ ca sarvadā || 79 ||
dhanyō:’haṁ kr̥takr̥tyō:’haṁ puṇyō:’haṁ puruṣōttama |
adya mē saphalaṁ janma jīvitaṁ saphalaṁ ca mē || 80 ||
adya mē saphalaṁ jñānamadya mē saphalaṁ tapaḥ |
adya mē saphalaṁ karma tvatpādāmbhōjadarśanāt || 81 ||
adya mē saphalaṁ sarvaṁ tvannāmasmaraṇaṁ tathā |
tvatpādāmbhōruhadvandvasadbhaktiṁ dēhi rāghava || 82
tataḥ paramasamprītaḥ sa rāmaḥ prāha nāradam |
mēghagambhīrayā vācā dhanvī vījitamanmathaḥ || 83 ||
śrīrāma uvāca |
munivarya mahābhāga munē tviṣṭaṁ dadāmi tē |
yattvayā cēpsitaṁ sarvaṁ manasā tadbhaviṣyati || 84 ||
nārada uvāca |
varaṁ na yācē raghunātha yuṣma-
-tpadābjabhaktiḥ satataṁ mamāstu |
idaṁ priyaṁ nātha varaṁ prayāccha
punaḥ punastvāmidamēva yācē || 85 ||
vyāsa uvāca |
ityēvamīḍitō rāmaḥ prādāttasmai varāntaram |
vīrō rāmō mahātējāḥ saccidānandavigrahaḥ || 86 ||
advaitamamalaṁ jñānaṁ svanāmasmaraṇaṁ tathā |
antardadhau jagannāthaḥ puratastasya rāghavaḥ || 87 ||
iti śrīraghunāthasya stavarājamanuttamam |
sarvasaubhāgyasampattidāyakaṁ muktidaṁ śubham || 88 ||
kathitaṁ brahmaputrēṇa vēdānāṁ sāramuttamam |
guhyādguhyatamaṁ divyaṁ tava snēhātprakīrtitam || 89 ||
yaḥ paṭhēcchr̥ṇuyādvāpi trisandhyaṁ śraddhayānvitaḥ |
brahmahatyādipāpāni tatsamāni bahūni ca || 90 ||
svarṇastēyaṁ surāpānaṁ gurutalpagatistathā |
gōvadhādyupapāpāni anr̥tātsambhavāni ca || 91 ||
sarvaiḥ pramucyatē pāpaiḥ kalpāyutaśatōdbhavaiḥ |
mānasaṁ vācikaṁ pāpaṁ karmaṇā samupārjitam || 92 ||
śrīrāmasmaraṇēnaiva tatkṣaṇānnaśyati dhruvam |
idaṁ satyamidaṁ satyaṁ satyamētadihōcyatē || 93 ||
rāmaṁ satyaṁ paraṁ brahma rāmātkiñcinna vidyatē |
tasmādrāmasvarūpaṁ hi satyaṁ satyamidaṁ jagat || 94 ||
śrīrāmacandra raghupuṅgava rājavarya
rajēndra rāma raghunāyaka rāghavēśa |
rājādhirāja raghunandana rāmacandra
dāsō:’hamadya bhavataḥ śaraṇāgatō:’smi || 95 ||
vaidēhīsahitaṁ suradrumatalē haimē mahāmaṇḍapē
madhyē puṣpakamāsanē maṇimayē vīrāsanē saṁsthitam |
agrē vācayati prabhañjanasutē tattvaṁ munibhyaḥ paraṁ
vyākhyātaṁ bharatādibhiḥ parivr̥taṁ rāmaṁ bhajē śyāmalam || 96 ||
rāmaṁ ratnakirīṭakuṇḍalayutaṁ kēyūrahārānvitaṁ
sītālaṅkr̥tavāmabhāgamamalaṁ siṁhāsanasthaṁ vibhum |
sugrīvādiharīśvaraiḥ suragaṇaiḥ saṁsēvyamānaṁ sadā
viśvāmitraparāśarādimunibhiḥ saṁstūyamānaṁ prabhum || 97 ||
sakalaguṇanidhānaṁ yōgibhiḥ stūyamānaṁ
bhujavijitasamānaṁ rākṣasēndrādimānam |
mahitanr̥pabhayānaṁ sītayā śōbhamānaṁ
smara hr̥daya vimānaṁ brahma rāmābhidhānam || 98 ||
raghuvara tava mūrtirmāmakē mānasābjē
narakagatiharaṁ tē nāmadhēyaṁ mukhē mē |
aniśamatulabhaktyā mastakaṁ tvatpadābjē
bhavajalanidhimagnaṁ rakṣa māmārtabandhō || 99 ||
rāmaratnamahaṁ vandē citrakūṭapatiṁ harim |
kausalyābhaktisambhūtaṁ jānakīkaṇṭhabhūṣaṇam || 100 ||
iti śrīsanatkumārasaṁhitāyāṁ nāradōktaṁ śrīrāmastavarājastōtraṁ sampūrṇam |
Found a Mistake or Error? Report it Now
