|| Sri Surya Stotram 2 ||
dēvā ūcuḥ |
namastē r̥ksvarūpāya sāmarūpāya tē namaḥ |
yajuḥ svarūparūpāya sāmnāṁ dhāmavatē namaḥ || 1 ||
jñānaikadhāmabhūtāya nirdhūtatamasē namaḥ |
śuddhajyōtiḥ svarūpāya viśuddhāyāmalātmanē || 2 ||
cakriṇē śaṅkhinē dhāmnē śārṅgiṇē padminē namaḥ |
variṣṭhāya varēṇyāya parasmai paramātmanē || 3 ||
namō:’khilajagadvyāpisvarūpāyātmamūrtayē |
sarvakāraṇabhūtāya niṣṭhāyai jñānacētasām || 4 ||
namaḥ sūryasvarūpāya prakāśātmasvarūpiṇē |
bhāskarāya namastubhyaṁ tathā dinakr̥tē namaḥ || 5 ||
śarvarīhētavē caiva sandhyājyōtsnākr̥tē namaḥ |
tvaṁ sarvamētadbhagavan jagadudbhramatā tvayā || 6 ||
bhramatyā viddhamakhilaṁ brahmāṇḍaṁ sacarācaram |
tvadaṁśubhiridaṁ spr̥ṣṭaṁ sarvaṁ sañjāyatē śuciḥ || 7 ||
kriyatē tvatkaraiḥ sparśājjalādīnāṁ pavitratā |
hōmadānādikō dharmō nōpakārāya jāyatē || 8 ||
tāvadyāvanna samyōgi jagadētat tvadaṁśubhiḥ |
r̥castē sakalā hyētā yajūṁṣyētāni cānyataḥ || 9 ||
sakalāni ca sāmāni nipatanti tvadaṅgataḥ |
r̥ṅmayastvaṁ jagannātha tvamēva ca yajurmayaḥ || 10 ||
yataḥ sāmamayaścaiva tatō nātha trayīmayaḥ |
tvamēva brahmaṇō rūpaṁ paraṁ cāparamēva ca || 11 ||
mūrtāmūrtastathā sūkṣmaḥ sthūlarūpastathā sthitaḥ |
nimēṣakāṣṭhādimayaḥ kālarūpaḥ kṣayātmakaḥ |
prasīda svēcchayā rūpaṁ svatējaḥ śamanaṁ kuru || 12 ||
idaṁ stōtravaraṁ ramyaṁ śrōtavyaṁ śraddhayā naraiḥ |
śiṣyō bhūtvā samādhisthō dattvā dēyaṁ gurōrapi || 13 ||
iti śrīmārkaṇḍēyapurāṇē pañcasaptatitamō:’dhyāyē dēva kr̥ta śrī sūrya stōtram |
Found a Mistake or Error? Report it Now
