ಶ್ರೀ ಸೂರ್ಯಾರ್ಯಾ ಸ್ತೋತ್ರಂ (ಯಾಜ್ಞವಲ್ಕ್ಯ ಕೃತಂ)

|| ಶ್ರೀ ಸೂರ್ಯಾರ್ಯಾ ಸ್ತೋತ್ರಂ (ಯಾಜ್ಞವಲ್ಕ್ಯ ಕೃತಂ) ||

ಶುಕತುಂಡಚ್ಛವಿಸವಿತುಶ್ಚಂಡರುಚೇಃ ಪುಂಡರೀಕವನಬಂಧೋಃ |
ಮಂಡಲಮುದಿತಂ ವಂದೇ ಕುಂಡಲಮಾಖಂಡಲಾಶಾಯಾಃ || ೧ ||

ಯಸ್ಯೋದಯಾಸ್ತಸಮಯೇ ಸುರಮುಕುಟನಿಘೃಷ್ಟಚರಣಕಮಲೋಽಪಿ |
ಕುರುತೇಂಜಲಿಂ ತ್ರಿನೇತ್ರಃ ಸ ಜಯತಿ ಧಾಮ್ನಾಂ ನಿಧಿಃ ಸೂರ್ಯಃ || ೨ ||

ಉದಯಾಚಲತಿಲಕಾಯ ಪ್ರಣತೋಽಸ್ಮಿ ವಿವಸ್ವತೇ ಗ್ರಹೇಶಾಯ |
ಅಂಬರಚೂಡಾಮಣಯೇ ದಿಗ್ವನಿತಾಕರ್ಣಪೂರಾಯ || ೩ ||

ಜಯತಿ ಜನಾನಂದಕರಃ ಕರನಿಕರನಿರಸ್ತತಿಮಿರಸಂಘಾತಃ |
ಲೋಕಾಲೋಕಾಲೋಕಃ ಕಮಲಾರುಣಮಂಡಲಃ ಸೂರ್ಯಃ || ೪ ||

ಪ್ರತಿಬೋಧಿತಕಮಲವನಃ ಕೃತಘಟನಶ್ಚಕ್ರವಾಕಮಿಥುನಾನಾಮ್ |
ದರ್ಶಿತಸಮಸ್ತಭುವನಃ ಪರಹಿತನಿರತೋ ರವಿಃ ಸದಾ ಜಯತಿ || ೫ ||

ಅಪನಯತು ಸಕಲಕಲಿಕೃತಮಲಪಟಲಂ ಸಪ್ರತಪ್ತಕನಕಾಭಃ |
ಅರವಿಂದವೃಂದವಿಘಟನಪಟುತರಕಿರಣೋತ್ಕರಃ ಸವಿತಾ || ೬ ||

ಉದಯಾದ್ರಿಚಾರುಚಾಮರ ಹರಿತಹಯಖುರಪರಿಹತರೇಣುರಾಗ |
ಹರಿತಹಯ ಹರಿತಪರಿಕರ ಗಗನಾಂಗಣದೀಪಕ ನಮಸ್ತೇಽಸ್ತು || ೭ ||

ಉದಿತವತಿ ತ್ವಯಿ ವಿಲಸತಿ ಮುಕುಲೀಯತಿ ಸಮಸ್ತಮಸ್ತಮಿತಬಿಂಬೇ |
ನ ಹ್ಯನ್ಯಸ್ಮಿನ್ ದಿನಕರ ಸಕಲಂ ಕಮಲಾಯತೇ ಭುವನಮ್ || ೮ ||

ಜಯತಿ ರವಿರುದಯಸಮಯೇ ಬಾಲಾತಪಃ ಕನಕಸನ್ನಿಭೋ ಯಸ್ಯ |
ಕುಸುಮಾಂಜಲಿರಿವ ಜಲಧೌ ತರಂತಿ ರಥಸಪ್ತಯಃ ಸಪ್ತ || ೯ ||

ಆರ್ಯಾಃ ಸಾಂಬಪುರೇ ಸಪ್ತ ಆಕಾಶಾತ್ಪತಿತಾ ಭುವಿ |
ಯಸ್ಯ ಕಂಠೇ ಗೃಹೇ ವಾಪಿ ನ ಸ ಲಕ್ಷ್ಮ್ಯಾ ವಿಯುಜ್ಯತೇ || ೧೦ ||

ಆರ್ಯಾಃ ಸಪ್ತ ಸದಾ ಯಸ್ತು ಸಪ್ತಮ್ಯಾಂ ಸಪ್ತಧಾ ಜಪೇತ್ |
ತಸ್ಯ ಗೇಹಂ ಚ ದೇಹಂ ಚ ಪದ್ಮಾ ಸತ್ಯಂ ನ ಮುಂಚತಿ || ೧೧ ||

ನಿಧಿರೇಷ ದರಿದ್ರಾಣಾಂ ರೋಗಿಣಾಂ ಪರಮೌಷಧಮ್ |
ಸಿದ್ಧಿಃ ಸಕಲಕಾರ್ಯಾಣಾಂ ಗಾಥೇಯಂ ಸಂಸ್ಮೃತಾ ರವೇಃ || ೧೨ ||

ಇತಿ ಶ್ರೀಯಾಜ್ಞವಲ್ಕ್ಯ ವಿರಚಿತಂ ಶ್ರೀ ಸೂರ್ಯಾರ್ಯಾ ಸ್ತೋತ್ರಮ್ |

Found a Mistake or Error? Report it Now