|| శ్రీ విఖనస పాదారవింద స్తోత్రం ||
వసంత చూతారుణ పల్లవాభం
ధ్వజాబ్జ వజ్రాంకుశ చక్రచిహ్నమ్ |
వైఖానసాచార్యపదారవిందం
యోగీంద్రవంద్యం శరణం ప్రపద్యే || ౧ ||
ప్రత్యుప్త గారుత్మత రత్నపాద
స్ఫురద్విచిత్రాసనసన్నివిష్టమ్ |
వైఖానసాచార్యపదారవిందం
సింహాసనస్థం శరణం ప్రపద్యే || ౨ ||
ప్రతప్తచామీకర నూపురాఢ్యం
కర్పూర కాశ్మీరజ పంకరక్తమ్ |
వైఖానసాచార్యపదారవిందం
సదర్చితం తచ్చరణం ప్రపద్యే || ౩ ||
సురేంద్రదిక్పాల కిరీటజుష్ట-
-రత్నాంశు నీరాజన శోభమానమ్ |
వైఖానసాచార్యపదారవిందం
సురేంద్రవంద్యం శరణం ప్రపద్యే || ౪ ||
ఇక్ష్వాకుమాంధాతృదిలీపముఖ్య-
-మహీశమౌళిస్థకిరీటజుష్టమ్ |
వైఖానసాచార్యపదారవిందం
మహీశవంద్యం శరణం ప్రపద్యే || ౫ ||
మరీచిముఖ్యైర్భృగుకశ్యపాత్రి-
-మునీంద్రవంద్యైరభిపూజితం తత్ |
వైఖానసాచార్యపదారవిందం
మునీంద్రవంద్యం శరణం ప్రపద్యే || ౬ ||
అనేకముక్తామణివిద్రుమైశ్చ
వైఢూర్యహేమ్నాకృత పాదుకస్థమ్ |
వైఖానసాచార్యపదారవిందం
తత్పాదుకస్థం శరణం ప్రపద్యే || ౭ ||
దితేః సుతానాం కరపల్లవాభ్యాం
సంలాలితం తత్సురపుంగవానామ్ |
వైఖానసాచార్యపదారవిందం
సురారివంద్యం శరణం ప్రపద్యే || ౮ ||
క్షేత్రాణి తీర్థాని వనాని భూమౌ
తీర్థాని కుర్వద్రజసోత్థితేన |
వైఖానసాచార్యపదారవిందం
సంచారితం తం శరణం ప్రపద్యే || ౯ ||
దీనం భవాంభోధిగతం నృశంసం
వైఖానసాచార్య సురార్థనీయైః |
త్వత్పాదపద్మోత్థమరందవర్షై-
-ర్దోషాకరం మాం కృపయాఽభిషించ || ౧౦ ||
వైఖానసాచార్యపదాంకితం యః
పఠేద్ధరేరర్చనయాగకాలే |
సుపుత్రపౌత్రాన్ లభతే చ కీర్తిం
ఆయుష్యమారోగ్యమలోలుపత్వమ్ || ౧౧ ||
ఏషామాసీదాది వైఖానసానాం
జన్మక్షేత్రే నైమిశారణ్యభూమిః |
దేవో యేషాం దేవకీ పుణ్యరాశిః
తేషాం పాదద్వంద్వపద్మం ప్రపద్యే || ౧౨ ||
భవ్యాయ మౌనివర్యాయ పరిపూతాయ వాగ్మినే |
యోగప్రభా సమేతాయ శ్రీమద్విఖనసే నమః || ౧౩ ||
లక్ష్మీవల్లభ సంకల్పవల్లభాయ మహాత్మనే |
శ్రీమద్విఖనసే భూయాత్ నిత్యశ్రీః నిత్యమంగళమ్ || ౧౪ ||
నారాయణం సకమలం సకలామరేంద్రం
వైఖానసం మమ గురుం నిగమాగమేంద్రమ్ |
భృగ్వాత్రికశ్యపమరీచి ముఖాన్మునీంద్రాన్
సర్వానహం కులగురూన్ ప్రణమామి మూర్ధ్నా || ౧౫ ||
ఇతి శ్రీ విఖనస పాదారవింద స్తోత్రమ్ |
Found a Mistake or Error? Report it Now
