|| Sri Vikhanasa Stotram ||
naimiśē nimiśakṣētrē gōmatyā samalaṅkr̥tē |
harērārādhanāsaktaṁ vandē vikhanasaṁ munim || 1 ||
rēcakaiḥ pūrakaiścaiva kumbhakaiśca samāyutam |
prāṇāyāmaparaṁ nityaṁ vandē vikhanasaṁ munim || 2 ||
tulasīnalinākṣaiśca kr̥tamālā vibhūṣitam |
añcitairūrdhvapuṇḍraiśca vandē vikhanasaṁ munim || 3 ||
tulasīstabakaiḥ padmairharipādārcanāratam |
śāntaṁ jitēndriyaṁ mauniṁ vandē vikhanasaṁ munim || 4 ||
kuṇḍalāṅgadahārādyairmudrikābhiralaṅkr̥tam |
sarvābharaṇasamyuktaṁ vandē vikhanasaṁ munim || 5 ||
ratnakaṅkaṇamañjīra kaṭisūtrairalaṅkr̥tam |
kāñcīpītāmbaradharaṁ vandē vikhanasaṁ munim || 6 ||
śaraccandrapratīkāśairdhavalairupavītakaiḥ |
sōttarīyaṁ baddhaśikhaṁ vandē vikhanasaṁ munim || 7 ||
kambugrīvaṁ viśālākṣaṁ vikasatpaṅkajānanam |
kandarpakōṭilāvaṇyaṁ vandē vikhanasaṁ munim || 8 ||
kundēnduśaṅkhasadr̥śa dantapaṅktyā virājitam |
sūryakōṭinibhaṁ kāntyā vandē vikhanasaṁ munim || 9 ||
jvālāmaṇigaṇaprakhya nakhapaṅktyā suśōbhitam |
karābhyāmañjalikaraṁ vandē vikhanasaṁ munim || 10 ||
vandē vikhanasaṁ sākṣādbrahmarūpaṁ munīśvaram |
śrutismr̥tītihāsajñaiḥ r̥ṣibhiḥ samabhiṣṭhutam || 11 ||
vandē bhr̥guṁ tapōniṣṭhaṁ marīciṁ ca mahāmunim |
atriṁ caiva trikālajñaṁ kāśyapaṁ brahmavādinam || 12 ||
ētadvikhanasastōtraṁ prātarutthāya yaḥ paṭhēt |
divā ca yadi vā rātrau samēṣu viṣamēṣu ca |
na bhayaṁ vindatē kiñcitkāryasiddhiṁ ca gacchati || 13 ||
ētadvikhanasastōtraṁ yaḥ paṭhēddharisannidhau |
viṣṇōrārādhanē kālē japakālē viśēṣataḥ || 14 ||
ya ētat prātarutthāya nityaṁ ca prayataḥ paṭhēt |
putraḥ pautrairdhanaṁ tasya āyurārōgyasampadaḥ || 15 ||
ētairyuktō mahābhōgī ihalōkē sukhī bhavēt |
antē vimānamāruhya viṣṇulōkaṁ ca gacchati || 16 ||
iti śrī vikhanasa stōtram |
Found a Mistake or Error? Report it Now
