|| ஶ்ரீ ஶிவ ஸ்தோத்ரம் (வருண க்ருதம்) ||
கள்யாணஶைலபரிகல்பிதகார்முகாய
மௌர்வீக்ருதாகி²லமஹோரக³னாயகாய |
ப்ருத்²வீரதா⁴ய கமலாபதிஸாயகாய
ஹாலாஸ்யமத்⁴யனிலயாய நமஶ்ஶிவாய || 1 ||
ப⁴க்தார்திப⁴ஞ்ஜன பராய பராத்பராய
காலாப்⁴ரகாந்தி க³ரளாங்கிதகந்த⁴ராய |
பூ⁴தேஶ்வராய பு⁴வனத்ரயகாரணாய
ஹாலாஸ்யமத்⁴யனிலயாய நமஶ்ஶிவாய || 2 ||
பூ⁴தா³ரமூர்தி பரிம்ருக்³ய பதா³ம்பு³ஜாய
ஹம்ஸாப்³ஜஸம்ப⁴வஸுதூ³ர ஸுமஸ்தகாய |
ஜ்யோதிர்மய ஸ்பு²ரிததி³வ்யவபுர்த⁴ராய
ஹாலாஸ்யமத்⁴யனிலயாய நமஶ்ஶிவாய || 3 ||
காத³ம்ப³கானநனிவாஸ குதூஹலாய
காந்தார்த⁴பா⁴க³ கமனீயகளேப³ராய |
காலாந்தகாய கருணாம்ருதஸாக³ராய
ஹாலாஸ்யமத்⁴யனிலயாய நமஶ்ஶிவாய || 4 ||
விஶ்வேஶ்வராய விபு³தே⁴ஶ்வரபூஜிதாய
வித்³யாவிஶிஷ்டவிதி³தாத்ம ஸுவைப⁴வாய |
வித்³யாப்ரதா³ய விமலேந்த்³ரவிமானகா³ய
ஹாலாஸ்யமத்⁴யனிலயாய நமஶ்ஶிவாய || 5 ||
ஸம்பத்ப்ரதா³ய ஸகலாக³ம மஸ்தகேஷு
ஸங்கோ⁴ஷிதாத்ம விப⁴வாய நமஶ்ஶிவாய |
ஸர்வாத்மனே ஸகலது³꞉க²ஸமூலஹந்த்ரே
ஹாலாஸ்யமத்⁴யனிலயாய நமஶ்ஶிவாய || 6 ||
க³ங்கா³த⁴ராய க³ருட³த்⁴வஜவந்தி³தாய
க³ண்ட³ஸ்பு²ரத்³பு⁴ஜக³மண்ட³லமண்டி³தாய |
க³ந்த⁴ர்வ கின்னர ஸுகீ³தகு³ணாத்மகாய
ஹாலாஸ்யமத்⁴யனிலயாய நமஶ்ஶிவாய || 7 ||
ஸாணிம் ப்ரக்³ருஹ்ய மலயத்⁴வஜபூ⁴பபுத்ர்யா꞉
பாண்ட்³யேஶ்வரஸ்ஸ்வயமபூ⁴த்பரமேஶ்வரோ ய꞉ |
தஸ்மை ஜக³த்ப்ரதி²தஸுந்த³ரபாண்ட்³யனாம்னே
ஹாலாஸ்யமத்⁴யனிலயாய நமஶ்ஶிவாய || 8 ||
கீ³ர்வாணதே³ஶிககி³ராமபி தூ³ரக³ம் ய-
த்³வக்தும் மஹத்த்வமிஹ கோ ப⁴வத꞉ ப்ரவீண꞉ |
ஶம்போ⁴ க்ஷமஸ்வ ப⁴க³வச்சரணாரவிந்த³-
ப⁴க்த்யா க்ருதாம் ஸ்துதிமிமாம் மம ஸுந்த³ரேஶ || 9 ||
இதி ஶ்ரீஹாலாஸ்யமாஹாத்ம்யே வருணக்ருத ஶிவஸ்தோத்ரம் |
Found a Mistake or Error? Report it Now
