ಪಿತೃ ಸ್ತೋತ್ರಂ – ೨ (ರುಚಿ ಕೃತಂ)

|| ಪಿತೃ ಸ್ತೋತ್ರಂ – ೨ (ರುಚಿ ಕೃತಂ) ||

ರುಚಿರುವಾಚ |
ಅರ್ಚಿತಾನಾಮಮೂರ್ತಾನಾಂ ಪಿತೄಣಾಂ ದೀಪ್ತತೇಜಸಾಮ್ |
ನಮಸ್ಯಾಮಿ ಸದಾ ತೇಷಾಂ ಧ್ಯಾನಿನಾಂ ದಿವ್ಯಚಕ್ಷುಷಾಮ್ || ೧ ||

ಇಂದ್ರಾದೀನಾಂ ಚ ನೇತಾರೋ ದಕ್ಷಮಾರೀಚಯೋಸ್ತಥಾ |
ಸಪ್ತರ್ಷೀಣಾಂ ತಥಾನ್ಯೇಷಾಂ ತಾನ್ನಮಸ್ಯಾಮಿ ಕಾಮದಾನ್ || ೨ ||

ಮನ್ವಾದೀನಾಂ ಚ ನೇತಾರಃ ಸೂರ್ಯಾಚಂದ್ರಮಸೋಸ್ತಥಾ |
ತಾನ್ನಮಸ್ಯಾಮ್ಯಹಂ ಸರ್ವಾನ್ ಪಿತೄನಪ್ಯುದಧಾವಪಿ || ೩ ||

ನಕ್ಷತ್ರಾಣಾಂ ಗ್ರಹಾಣಾಂ ಚ ವಾಯ್ವಗ್ನ್ಯೋರ್ನಭಸಸ್ತಥಾ |
ದ್ಯಾವಾಪೃಥಿವ್ಯೋಶ್ಚ ತಥಾ ನಮಸ್ಯಾಮಿ ಕೃತಾಂಜಲಿಃ || ೪ ||

ದೇವರ್ಷೀಣಾಂ ಜನಿತೄಂಶ್ಚ ಸರ್ವಲೋಕ ನಮಸ್ಕೃತಾನ್ |
ಅಕ್ಷಯ್ಯಸ್ಯ ಸದಾ ದಾತೄನ್ ನಮಸ್ಯೇಹಂ ಕೃತಾಂಜಲಿಃ || ೫ ||

ಪ್ರಜಾಪತೇಃ ಕಶ್ಯಪಾಯ ಸೋಮಾಯ ವರುಣಾಯ ಚ |
ಯೋಗೇಶ್ವರೇಭ್ಯಶ್ಚ ಸದಾ ನಮಸ್ಯಾಮಿ ಕೃತಾಂಜಲಿಃ || ೬ ||

ನಮೋ ಗಣೇಭ್ಯಃ ಸಪ್ತಭ್ಯಸ್ತಥಾ ಲೋಕೇಷು ಸಪ್ತಸು |
ಸ್ವಯಂಭುವೇ ನಮಸ್ಯಾಮಿ ಬ್ರಹ್ಮಣೇ ಯೋಗಚಕ್ಷುಷೇ || ೭ ||

ಸೋಮಾಧಾರಾನ್ ಪಿತೃಗಣಾನ್ ಯೋಗಮೂರ್ತಿಧರಾಂಸ್ತಥಾ |
ನಮಸ್ಯಾಮಿ ತಥಾ ಸೋಮಂ ಪಿತರಂ ಜಗತಾಮಹಮ್ || ೮ ||

ಅಗ್ನಿರೂಪಾಂಸ್ತಥೈವಾನ್ಯಾನ್ ನಮಸ್ಯಾಮಿ ಪಿತೄನಹಮ್ |
ಅಗ್ನಿಸೋಮಮಯಂ ವಿಶ್ವಂ ಯತ ಏತದಶೇಷತಃ || ೯ ||

ಯೇ ಚ ತೇಜಸಿ ಯೇ ಚೈತೇ ಸೋಮಸೂರ್ಯಾಗ್ನಿಮೂರ್ತಯಃ |
ಜಗತ್ಸ್ವರೂಪಿಣಶ್ಚೈವ ತಥಾ ಬ್ರಹ್ಮಸ್ವರೂಪಿಣಃ || ೧೦ ||

ತೇಭ್ಯೋಽಖಿಲೇಭ್ಯೋ ಯೋಗಿಭ್ಯಃ ಪಿತೃಭ್ಯೋ ಯತಮಾನಸಃ |
ನಮೋ ನಮೋ ನಮಸ್ತೇಽಸ್ತು ಪ್ರಸೀದಂತು ಸ್ವಧಾಭುಜಃ || ೧೧ ||

ಇತಿ ಶ್ರೀ ಗರುಡಪುರಾಣೇ ಊನನವತಿತಮೋಽಧ್ಯಾಯೇ ರುಚಿಕೃತ ದ್ವಿತೀಯ ಪಿತೃ ಸ್ತೋತ್ರಮ್ |

Found a Mistake or Error? Report it Now