|| Prahlada Krutha Narasimha Stuti 2 ||
bhagavat stutiḥ (prahlāda kr̥taṁ)
prahlāda uvāca |
namastē puṇḍarīkākṣa namastē puruṣōttama |
namastē sarvalōkātman namastē tigmacakriṇē || 1 ||
namō brahmaṇyadēvāya gōbrāhmaṇahitāya ca |
jagaddhitāya kr̥ṣṇāya gōvindāya namō namaḥ || 2 ||
brahmatvē sr̥jatē viśvaṁ sthitau pālayatē punaḥ |
rudrarūpāya kalpāntē namastubhyaṁ trimūrtayē || 3 ||
dēvā yakṣāsurāḥ siddhā nāgā gandharvakinnarāḥ |
piśācā rākṣasāścaiva manuṣyāḥ paśavastathā || 4 ||
pakṣiṇaḥ sthāvarāścaiva pipīlikasarīsr̥pāḥ |
bhūmyāpō:’gnirnabhō vāyuḥ śabdaḥ sparśastathā rasaḥ || 5 ||
rūpaṁ gandhō manō buddhirātmā kālastathā guṇāḥ |
ētēṣāṁ paramārthaśca sarvamētattvamacyuta || 6 ||
vidyāvidyē bhavān satyamasatyaṁ tvaṁ viṣāmr̥tē |
pravr̥ttaṁ ca nivr̥ttaṁ ca karma vēdōditaṁ bhavān || 7 ||
samastakarmabhōktā ca karmōpakaraṇāni ca |
tvamēva viṣṇō sarvāṇi sarvakarmaphalaṁ ca yat || 8 ||
mayyanyatra tathā:’śēṣabhūtēṣu bhuvanēṣu ca |
tavaiva vyāptiraiśvaryaguṇasaṁsūcikī prabhō || 9 ||
tvāṁ yōginaścintayanti tvāṁ yajanti ca yājakāḥ |
havyakavyabhugēkastvaṁ pitr̥dēvasvarūpadhr̥k || 10 ||
rūpaṁ mahattē sthitamatra viśvaṁ
tataśca sūkṣmaṁ jagadētadīśa |
rūpāṇi sarvāṇi ca bhūtabhēdā-
-stēṣvantarātmākhyamatīva sūkṣmam || 11 ||
tasmācca sūkṣmādiviśēṣaṇānā-
-magōcarē yatparamātmarūpam |
kimapyacintyaṁ tava rūpamasti
tasmai namastē puruṣōttamāya || 12 ||
sarvabhūtēṣu sarvātman yā śaktiraparā tava |
guṇāśrayā namastasyai śāśvatāyai surēśvara || 13 ||
yātītagōcarā vācāṁ manasāṁ cāviśēṣaṇā |
jñānijñānaparicchēdyā tāṁ vandē cēśvarīṁ parām || 14 ||
ōṁ namō vāsudēvāya tasmai bhagavatē sadā |
vyatiriktaṁ na yasyāsti vyatiriktō:’khilasya yaḥ || 15 ||
namastasmai namastasmai namastasmai mahātmanē |
nāma rūpaṁ na yasyaikō yō:’stitvēnōpalabhyatē || 16 ||
yasyāvatārarūpāṇi samarcanti divaukasaḥ |
apaśyantaḥ paraṁ rūpaṁ namastasmai mahātmanē || 17 ||
yō:’ntastiṣṭhannaśēṣasya paśyatīśaḥ śubhāśubham |
taṁ sarvasākṣiṇaṁ viśvaṁ namasyē paramēśvaram || 18 ||
namō:’stu viṣṇavē tasmai yasyābhinnamidaṁ jagat |
dhyēyaḥ sa jagatāmādyaḥ sa prasīdatu mē:’vyayaḥ || 19 ||
yatrōtamētat prōtaṁ ca viśvamakṣaramavyayam |
ādhārabhūtaḥ sarvasya sa prasīdatu mē hariḥ || 20 ||
ōṁ namō viṣṇavē tasmai namastasmai punaḥ punaḥ |
yatra sarvaṁ yataḥ sarvaṁ yaḥ sarvaṁ sarvasaṁśrayaḥ || 21 ||
sarvagatvādanantasya sa ēvāhamavasthitaḥ |
mattaḥ sarvamahaṁ sarvaṁ mayi sarvaṁ sanātanē || 22 ||
ahamēvākṣayō nityaḥ paramātmā:’:’tmasaṁśrayaḥ |
brahmasañjñō:’hamēvāgrē tathā:’ntē ca paraḥ pumān || 23 ||
iti śrīviṣṇupurāṇē prathamāṁśē ēkōnaviṁśō:’dhyāyē prahlāda kr̥ta bhagavat stutiḥ |
Found a Mistake or Error? Report it Now
