శ్రీ గాయత్ర్యక్షరవల్లీ స్తోత్రం

|| శ్రీ గాయత్ర్యక్షరవల్లీ స్తోత్రం ||

తత్కారం చంపకం పీతం బ్రహ్మవిష్ణుశివాత్మకమ్ |
శాంతం పద్మాసనారూఢం ధ్యాయేత్ స్వస్థాన సంస్థితమ్ || ౧ ||

సకారం చింతయేచ్ఛాంతం అతసీపుష్పసన్నిభమ్ |
పద్మమధ్యస్థితం కామ్యముపపాతకనాశనమ్ || ౨ ||

వికారం కపిలం చింత్యం కమలాసనసంస్థితమ్ |
ధ్యాయేచ్ఛాంతం ద్విజశ్రేష్ఠో మహాపాతకనాశనమ్ || ౩ ||

తుకారం చింతయేత్ప్రాజ్ఞ ఇంద్రనీలసమప్రభమ్ |
నిర్దహేత్సర్వదుఃఖస్తు గ్రహరోగసముద్భవమ్ || ౪ ||

వకారం వహ్నిదీప్తాభం చింతయిత్వా విచక్షణః |
భ్రూణహత్యాకృతం పాపం తక్షణాదేవ నాశయేత్ || ౫ ||

రేకారం విమలం ధ్యాయేచ్ఛుద్ధస్ఫటికసన్నిభమ్ |
పాపం నశ్యతి తత్ క్షిప్రమగమ్యాగమనోద్భవమ్ || ౬ ||

ణికారం చింతయేద్యోగీ విద్యుద్వల్లీసమప్రభమ్ |
అభక్ష్యభక్షజం పాపం తత్క్షణాదేవ నశ్యతి || ౭ ||

యంకారం తారకావర్ణమిందుశేఖరభూషితమ్ |
యోగినాం వరదం ధ్యాయేద్బ్రహ్మహత్యాఘనాశనమ్ || ౮ ||

భకారం కృష్ణవర్ణం తు నీలమేఘసమప్రభమ్ |
ధ్యాత్వా పురుషహత్యాది పాపం నాశయతి ద్విజః || ౯ ||

ర్గోకారం రక్తవర్ణం తు కమలాసన సంస్థితమ్ |
తం గోహత్యాకృతం పాపం నాశయేచ్చ విచింతయన్ || ౧౦ ||

దేకారం మకరశ్యామం కమలాసనసంస్థితమ్ |
చింతయేత్సతతం యోగీ స్త్రీహత్యాదహనం పరమ్ || ౧౧ ||

వకారం శుక్లవర్ణం తు జాజీపుష్పసమప్రభమ్ |
గురుహత్యా కృతం పాపం ధ్యాత్వా దహతి తత్క్షణాత్ || ౧౨ ||

స్యకారం చ తదా పీతం సువర్ణ సదృశప్రభమ్ |
మనసా చింతితం పాపం ధ్యాత్వా దహతి నిశ్చయమ్ || ౧౩ ||

ధీకారం చింతయేచ్ఛుభ్రం కుందపుష్పసమప్రభమ్ |
పితృమాతృవధాత్పాపాన్ముచ్యతే నాత్ర సంశయః || ౧౪ ||

మకారం పద్మరాగాభాం చింతయేద్దీప్తతేజసమ్ |
పూర్వజన్మార్జితం పాపం తత్క్షణాదేవ నశ్యతి || ౧౫ ||

హికారం శంఖవర్ణం చ పూర్ణచంద్రసమప్రభమ్ |
అశేషపాపదహనం ధ్యాయేన్నిత్యం విచక్షణః || ౧౬ ||

ధికారం పాండురం ధ్యాయేత్పద్మస్యోపరిసంస్థితమ్ |
ప్రతిగ్రహకృతం పాపం తత్క్షణాదేవ నశ్యతి || ౧౭ ||

యోకారం రక్తవర్ణం తు ఇంద్రగోపసమప్రభమ్ |
ధ్యాత్వా ప్రాణివధం పాపం దహత్యగ్నిరివేంధనమ్ || ౧౮ ||

ద్వితీయచ్చైవ యః ప్రాక్తో యోకారో రక్తసన్నిభః |
నిర్దహేత్సర్వపాపాని నాన్యైః పాపైశ్చ లిప్యతే || ౧౯ ||

నకారం తు ముఖం పూర్వమాదిత్యోదయసన్నిభమ్ |
సకృద్ధ్యాత్వా ద్విజశ్రేష్ఠ సగచ్ఛేదైశ్వరం పరమ్ || ౨౦ ||

నీలోత్పలదళశ్యామం ప్రకారం దక్షిణాననమ్ |
సకృద్ధ్యాత్వా ద్విజశ్రేష్ఠ సగచ్ఛేద్వైష్ణవం పదమ్ || ౨౧ ||

శ్వేతవర్ణం తు తత్పీతం చోకారం పశ్చిమాననమ్ |
సకృద్ధ్యాత్వా ద్విజశ్రేష్ఠ రుద్రేణ సహమోదతే || ౨౨ ||

శుక్లవర్ణేందుసంకాశం దకారం చోత్తరాననమ్ |
సకృద్ధ్యాత్వా ద్విజశ్రేష్ఠ సగచ్ఛేద్బ్రహ్మణఃపదమ్ || ౨౩ ||

యాత్కారస్తు శిరః ప్రోక్తశ్చతుర్థవదనప్రభః |
ప్రత్యక్ష ఫలదో బ్రహ్మా విష్ణు రుద్రాత్మకః స్మృతః || ౨౪ ||

ఏవం ధ్యాత్వా తు మేధావీ జపం హోమం కరోతి యః |
న భవేత్పాతకం తస్య అమృతం కిం న విద్యతే |
సాక్షాద్భవత్యసౌ బ్రహ్మా స్వయంభూః పరమేశ్వరః || ౨౫ ||

ఇతి శ్రీ గాయత్ర్యక్షరవల్లీ స్తోత్రమ్ |

Found a Mistake or Error? Report it Now