శ్రీ గాయత్రీ తత్త్వమాలామంత్రం

|| శ్రీ గాయత్రీ తత్త్వమాలామంత్రం ||

అస్య శ్రీగాయత్రీతత్త్వమాలామంత్రస్య విశ్వామిత్ర ఋషిః అనుష్టుప్ ఛందః పరమాత్మా దేవతా హలో బీజాని స్వరాః శక్తయః అవ్యక్తం కీలకం మమ సమస్తపాపక్షయార్థే శ్రీగాయత్రీ మాలామంత్ర జపే వినియోగః |

చతుర్వింశతి తత్త్వానాం యదేకం తత్త్వముత్తమమ్ |
అనుపాధి పరం బ్రహ్మ తత్పరం జ్యోతిరోమితి || ౧ ||

యో వేదాదౌ స్వరః ప్రోక్తో వేదాంతే చ ప్రతిష్ఠితః |
తస్య ప్రకృతిలీనస్య తత్పరం జ్యోతిరోమితి || ౨ ||

తదిత్యాదిపదైర్వాచ్యం పరమం పదమవ్యయమ్ |
అభేదత్వం పదార్థస్య తత్పరం జ్యోతిరోమితి || ౩ ||

యస్య మాయాంశభాగేన జగదుత్పద్యతేఽఖిలమ్ |
తస్య సర్వోత్తమం రూపమరూపస్యాభిధీమహి || ౪ ||

యం న పశ్యంతి పరమం పశ్యంతోఽపి దివౌకసః |
తం భూతాఖిలదేవం తు సుపర్ణముపధావతామ్ || ౫ ||

యదంశః ప్రేరితో జంతుః కర్మపాశనియంత్రితః |
ఆజన్మకృతపాపానామపహంతా ద్విజన్మనామ్ || ౬ ||

ఇదం మహామునిప్రోక్తం గాయత్రీతత్త్వముత్తమమ్ |
యః పఠేత్పరయా భక్త్యా స యాతి పరమాం గతిమ్ || ౭ ||

సర్వవేదపురాణేషు సాంగోపాంగేషు యత్ఫలమ్ |
సకృదస్య జపాదేవ తత్ఫలం ప్రాప్నుయాన్నరః || ౮ ||

అభక్ష్యభక్షణాత్పూతో భవతి | అగమ్యాగమనాత్పూతో భవతి | సర్వపాపేభ్యః పూతో భవతి | ప్రాతరధీయానో రాత్రికృతం పాపం నాశయతి | సాయమధీయానో దివసకృతం పాపం నాశయతి | మధ్యం దినముపయుంజానోఽసత్ ప్రతిగ్రహాదిభ్యో ముక్తో భవతి | అనుపప్లవం పురుషార్థమభివదంతి | యం యం కామమభిధ్యాయతి తత్తదేవాప్నోతి పుత్రపౌత్రాన్ కీర్తిసౌభాగ్యాంశ్చోపలభతే | సర్వభూతాత్మమిత్రో దేహాంతే తద్విశిష్టో గాయత్ర్యా పరమం పదమవాప్నోతి ||

ఇతి శ్రీవేదసారే శ్రీ గాయత్రీ తత్త్వమాలామంత్రమ్ ||

Found a Mistake or Error? Report it Now