|| Sri Kali Kavacham (Trailokya Vijayam) ||
śrīsadāśiva uvāca |
trailōkyavijayasyāsya kavacasya r̥ṣiḥ śivaḥ |
chandō:’nuṣṭubdēvatā ca ādyākālī prakīrtitā || 1 ||
māyābījaṁ bījamiti ramā śaktirudāhr̥tā |
krīṁ kīlakaṁ kāmyasiddhau viniyōgaḥ prakīrtitaḥ || 2 ||
atha kavacam |
hrīmādyā mē śiraḥ pātu śrīṁ kālī vadanaṁ mama |
hr̥dayaṁ krīṁ parā śaktiḥ pāyātkaṇṭhaṁ parātparā || 3 ||
nētrē pātu jagaddhātrī karṇau rakṣatu śaṅkarī |
ghrāṇaṁ pātu mahāmāyā rasanāṁ sarvamaṅgalā || 4 ||
dantān rakṣatu kaumārī kapōlau kamalālayā |
ōṣṭhādharau kṣamā rakṣēccibukaṁ cāruhāsinī || 5 ||
grīvāṁ pāyātkulēśānī kakutpātu kr̥pāmayī |
dvau bāhū bāhudā rakṣētkarau kaivalyadāyinī || 6 ||
skandhau kapardinī pātu pr̥ṣṭhaṁ trailōkyatāriṇī |
pārśvē pāyādaparṇā mē kaṭiṁ mē kamaṭhāsanā || 7 ||
nābhau pātu viśālākṣī prajāsthānaṁ prabhāvatī |
ūrū rakṣatu kalyāṇī pādau mē pātu pārvatī || 8 ||
jayadurgā:’vatu prāṇān sarvāṅgaṁ sarvasiddhidā |
rakṣāhīnaṁ tu yat sthānaṁ varjitaṁ kavacēna ca || 9 ||
tatsarvaṁ mē sadā rakṣēdādyākālī sanātanī |
iti tē kathitaṁ divyaṁ trailōkyavijayābhidham || 10 ||
kavacaṁ kālikādēvyā ādyāyāḥ paramādbhutam |
pūjākālē paṭhēdyastu ādyādhikr̥tamānasaḥ || 11 ||
sarvān kāmānavāpnōti tasyādyāśu prasīdati |
mantrasiddhirbhavēdāśu kiṅkarāḥ kṣudrasiddhayaḥ || 12 ||
aputrō labhatē putraṁ dhanārthī prāpnuyāddhanam |
vidyārthī labhatē vidyāṁ kāmī kāmānavāpnuyāt || 13 ||
sahasrāvr̥ttapāṭhēna varmaṇō:’sya puraskriyā |
puraścaraṇasampannaṁ yathōktaphaladaṁ bhavēt || 14 ||
candanāgarukastūrīkuṅkumai raktacandanaiḥ |
bhūrjē vilikhya guṭikāṁ svarṇasthāṁ dhārayēdyadi || 15 ||
śikhāyāṁ dakṣiṇē bāhau kaṇṭhē vā sādhakaḥ kaṭau |
tasyādyā kālikā vaśyā vāñchitārthaṁ prayacchati || 16 ||
na kutrāpi bhayaṁ tasya sarvatra vijayī kaviḥ |
arōgī cirajīvī syādbalavān dhāraṇakṣamaḥ || 17 ||
sarvavidyāsu nipuṇaḥ sarvaśāstrārthatattvavit |
vaśē tasya mahīpālā bhōgamōkṣau karasthitau || 18 ||
iti mahānirvāṇatantrē saptamōllāsē trailōkyavijayakavacaṁ nāma śrī kālikā kavacam |
Found a Mistake or Error? Report it Now
