|| Sri Maha Kali Shodasopachara Puja ||
punaḥ saṅkalpaṃ –
pūrvokta evaṃ guṇa viśeṣaṇa viśiṣṭāyāṃ śubha tithau śrī kālikā parameśvarī anugraha prasāda siddhidvārā sarvaśatrubādhā śāntyarthaṃ, mama sarvāriṣṭa nivṛttyarthaṃ, sarvakārya siddhyarthaṃ, śrī kālikā parameśvarī prītyarthaṃ dhyāna āvāhanādi ṣoḍaśopacāra pūjāṃ kariṣye ||
dhyānam –
śavārūḍhāṃ mahābhīmāṃ ghoradaṃṣṭrāṃ hasanmukhīṃ
caturbhujāṃ khaḍgamuṇḍavarābhayakarāṃ śivām |
muṇḍamālādharāṃ devīṃ lalajjihvāṃ digambarāṃ
evaṃ sañcintayetkālīṃ śmaśānālayavāsinīm || 1 ||
yā kālikā rogaharā suvandyā-
-rvaśyaiḥ samastairvyavahāradakṣaiḥ |
janairjanānāṃ bhayahāriṇī ca
sā devamātā mayi saukhyadātrī || 2 ||
yā māyā prakṛtiśaktiścaṇḍamuṇḍavimardinī |
sā pūjyā sarvadevaiśca hyasmākaṃ varadā bhava || 3 ||
oṃ śrīkālikā devyai namaḥ dhyāyāmi |
āvāhanaṃ –
āgaccha varade devi daityadarpaniṣūdinī |
pūjāṃ gṛhāṇa sumukhi namaste śaṅkarapriye ||
oṃ śrīkālikā devyai namaḥ āvāhayāmi |
āsanaṃ –
anekaratnasamyuktaṃ nānāmaṇigaṇānvitam |
kārtasvaramayaṃ divyamānasaṃ pratigṛhyatām ||
oṃ śrīkālikā devyai namaḥ suvarṇasiṃhāsanaṃ samarpayāmi |
pādyaṃ –
gaṅgādi sarvatīrthebhyo mayā prārthanayā”hṛtam |
toyametatsukhasparśa pādyarthaṃ pratigṛhyatām ||
oṃ śrīkālikā devyai namaḥ pādayoḥ pādyaṃ samarpayāmi |
arghyaṃ –
gandhapuṣpākṣatairyuktamarghyaṃ sampāditaṃ mayā |
gṛhāṇa tvaṃ mahādevi prasannā bhava sarvadā ||
oṃ śrīkālikā devyai namaḥ hastayoḥ arghyaṃ samarpayāmi |
ācamanīyaṃ –
ācamyatāṃ tvayā devi bhaktirme hyacalāṃ kuru |
īpsitāṃ me varaṃ dehi paratra ca parāṃ gatim ||
oṃ śrīkālikā devyai namaḥ mukhe ācamanīyaṃ samarpayāmi |
pañcāmṛta snānaṃ –
payodhadhi ghṛtaṃ kṣaudraṃ sitayā ca samanvitam |
pañcāmṛtamanenādya kuru snānaṃ dayānidhe ||
oṃ śrīkālikā devyai namaḥ pañcāmṛtasnānaṃ samarpayāmi |
snānaṃ –
jāhnavītoyamānītaṃ śubhaṃ karpūrasamyutam |
snāpayāmi suraśreṣṭhe tvāṃ putrādi phalapradān ||
oṃ śrīkālikā devyai namaḥ śuddhodakasnānaṃ samarpayāmi |
snānānantaraṃ śuddhācamanīyaṃ samarpayāmi |
vastraṃ –
vastraṃ ca somadaivatyaṃ lajjāyāstu nivāraṇam |
mayā niveditaṃ bhaktyā gṛhāṇa parameśvarī ||
oṃ śrīkālikā devyai namaḥ vastraṃ samarpayāmi |
upavastraṃ –
yāmāśritya mahāmāyā jagat sammohinī sadā |
tasyai te parameśāni kalpayāmyuttarīyakam ||
oṃ śrīkālikā devyai namaḥ upavastraṃ samarpayāmi |
ābharaṇaṃ –
svabhāva sundarāṅgārthe nānāśaktyāśrite śive |
bhūṣaṇāni vicitrāṇi kalpayāmyamarārcite ||
oṃ śrīkālikā devyai namaḥ ābharaṇāni samarpayāmi |
gandhaṃ –
paramānanda saubhāgya paripūrṇa digantare |
gṛhāṇa paramaṃ gandhaṃ kṛpayā parameśvari ||
oṃ śrīkālikā devyai namaḥ gandhaṃ samarpayāmi |
kuṅkumaṃ –
kuṅkumaṃ kāntidaṃ divyaṃ kāminī kāmasambhavam |
kuṅkumenārcite devi prasīda parameśvari ||
oṃ śrīkālikā devyai namaḥ kuṅkumaṃ samarpayāmi |
sindūraṃ –
sindūramaruṇābhāsaṃ japākusumasannibham |
pūjitāsi mahādevi prasīda parameśvarī ||
oṃ śrīkālikā devyai namaḥ sindūraṃ samarpayāmi |
kajjalaṃ –
cakṣubhyāṃ kajjalaṃ ramyaṃ subhage śaktikārike |
karpūrajyotirutpannaṃ gṛhāṇa parameśvari ||
oṃ śrīkālikā devyai namaḥ kajjalaṃ samarpayāmi |
haridrā –
haridrārañjite devi sukhasaubhāgyadāyini |
tasmāttvaṃ pūjayāmyatra sukhaśāntiṃ prayaccha me ||
oṃ śrīkālikā devyai namaḥ haridrācūrṇaṃ samarpayāmi |
parimala dravyāṇi –
candanāgaru karpūraṃ kuṅkumaṃ rocanaṃ tathā |
kastūryādi sugandhāṃśca sarvāṅgeṣu vilepaye ||
oṃ śrīkālikā devyai namaḥ nānāvidha parimala dravyāṇi samarpayāmi |
saubhāgya sūtraṃ –
saubhāgyasūtraṃ varade suvarṇamaṇisamyute |
kaṇṭhe gṛhāṇa deveśi saubhāgyaṃ dehi me sadā ||
oṃ śrīkālikā devyai namaḥ saubhāgya sūtraṃ samarpayāmi |
akṣatān –
rañjitā kuṅkumaughena akṣatāścāpi śobhanāḥ |
mamaiṣāṃ devi dānena prasannābhavamīśvarī ||
oṃ śrīkālikā devyai namaḥ akṣatān samarpayāmi |
puṣpamālā –
surabhiṃ puṣpanicayairgrathitaṃ śubhamālikām |
dadāmi tava śobhārthaṃ gṛhāṇa parameśvari ||
oṃ śrīkālikā devyai namaḥ puṣpamālān samarpayāmi |
puṣpāṇi –
mandāra pārijātādi pāṭalī ketakāni ca |
jātī campaka puṣpāṇi gṛhāṇa parameśvarī ||
oṃ śrīkālikā devyai namaḥ puṣpāṇi samarpayāmi |
bilvapatraṃ –
amṛtodbhava śrīvṛkṣo mahādevi priyaḥ sadā |
bilvapatraṃ prayacchāmi pavitraṃ te sureśvarī ||
oṃ śrīkālikā devyai namaḥ bilvapatraṃ samarpayāmi |
atha aṣṭottaraśatanāma pūjā –
śrī kālī aṣṭottaraśatanāmāvalī paśyatu |
dhūpaṃ –
daśāṅga guggulaṃ dhūpaṃ candanāgaru samyutam |
samarpitaṃ mayā bhaktyā mahādevi pragṛhyatām ||
oṃ śrīkālikā devyai namaḥ dhūpamāghrāpayāmi |
dīpaṃ –
ghṛtavartisamāyuktaṃ mahātejo mahojjvalam |
dīpaṃ dāsyāmi deveśi suprītā bhava sarvadā ||
oṃ śrīkālikā devyai namaḥ dīpaṃ darśayāmi |
naivedyaṃ –
annaṃ caturvidhaṃ svādu rasaiḥ ṣaḍbhiḥ samanvitam |
naivedyaṃ gṛhyatāṃ devi bhaktirmehyacalāṃ kuru ||
oṃ śrīkālikā devyai namaḥ naivedyaṃ samarpayāmi |
ṛtuphalaṃ –
drākṣā kharjūra kadalī panasāmrakapityakam |
nārikelekṣujambvādi phalāni pratigṛhyatām ||
oṃ śrīkālikā devyai namaḥ ṛtuphalaṃ samarpayāmi |
ācamanīyajalaṃ –
kāmārivallabhe devi kurvācamanamambike |
nirantaramahaṃ vande caraṇau tava caṇḍike ||
oṃ śrīkālikā devyai namaḥ naivedyānantaraṃ ācamanīyajalaṃ samarpayāmi |
tāmbūlaṃ –
elālavaṅga kastūrī karpūraiḥ suṣṭhuvāsitām |
vīṭikāṃ mukhavāsārthamarpayāmi sureśvari ||
oṃ śrīkālikā devyai namaḥ tāmbūlaṃ samarpayāmi |
dakṣiṇa (svarṇaṃ)-
pūjāphalasamṛddhyarthaṃ tavāgre svarṇamīśvari |
sthāpitaṃ tena me prītā pūrṇān kuru manorathān ||
oṃ śrīkālikā devyai namaḥ dakṣiṇān samarpayāmi |
nīrājanaṃ –
nīrājanaṃ sumaṅgalyaṃ karpūreṇa samanvitam |
candrārkavahni sadṛśaṃ mahādevi namo’stu te ||
oṃ śrīkālikā devyai namaḥ nīrājanaṃ samarpayāmi |
mantrapuṣpaṃ –
oṃ kālikāyai ca vidmahe śmaśānavāsinyai dhīmahi tanno’ghorā pracodayāt |
oṃ śrīkālikā devyai namaḥ mantrapuṣpaṃ samarpayāmi |
pradakṣiṇa –
namaste devi deveśi namaste īpsitaprade |
namaste jagatāṃ dhātri namaste bhaktavatsale ||
oṃ śrīkālikā devyai namaḥ ātmapradakṣiṇa namaskārān samarpayāmi |
sāṣṭāṅga namaskāraṃ –
namaḥ sarvahitārthāyai jagadādhāra hetave |
sāṣṭāṅgo’yaṃ praṇāmastu prayatnena mayā kṛtaḥ ||
oṃ śrīkālikā devyai namaḥ sāṣṭāṅga namaskārān samarpayāmi |
kṣamā prārthanā –
aparādha sahasrāṇi kriyante’harniśaṃ mayā |
dāso’yamiti māṃ matvā kṣamasva parameśvari ||
āvāhanaṃ na jānāmi na jānāmi visarjanam |
pūjāvidhiṃ na jānāmi kṣamasva parameśvari ||
mantrahīnaṃ kriyāhīnaṃ bhaktihīnaṃ parātpare |
yatpūjitaṃ mayā devi paripūrṇaṃ tadastu te ||
anayā mayā kṛtena dhyāna āvāhanādi ṣoḍaśopacāra pūjanena bhagavatī sarvātmikā śrī kālikā parameśvarī suprītā suprasannā varadā bhavantu ||
tīrthaprasāda grahaṇaṃ –
akālamṛtyaharaṇaṃ sarvavyādhinivāraṇam |
samastapāpakṣayakaraṃ mātṛpādodakaṃ śubham ||
oṃ śrīkālikā devyai namaḥ prasādaṃ śirasā gṛhṇāmi |
visarjanaṃ –
idaṃ pūjā mayā devi yathāśaktyupapāditām |
rakṣārthaṃ tvaṃ samadāya vrajasthānamanuttamam ||
oṃ śrīkālikā devyai namaḥ yathāsthānamudvāsayāmi |
oṃ śāntiḥ śāntiḥ śāntiḥ |
Found a Mistake or Error? Report it Now
