|| శ్రీ నృసింహ నమస్కార స్తోత్రం ||
వజ్రకాయ సురశ్రేష్ఠ చక్రాభయకర ప్రభో |
వరేణ్య శ్రీప్రద శ్రీమన్ నరసింహ నమోఽస్తు తే || ౧ ||
కలాత్మన్ కమలాకాంత కోటిసూర్యసమచ్ఛవే |
రక్తజిహ్వ విశాలాక్ష తీక్ష్ణదంష్ట్ర నమోఽస్తు తే || ౨ ||
దీప్తరూప మహాజ్వాల ప్రహ్లాదవరదాయక |
ఊర్ధ్వకేశ ద్విజప్రేష్ఠ శత్రుంజయ నమోఽస్తు తే || ౩ ||
వికట వ్యాప్తభూలోక నిజభక్తసురక్షక |
మంత్రమూర్తే సదాచారివిప్రపూజ్య నమోఽస్తు తే || ౪ ||
అధోక్షజ సురారాధ్య సత్యధ్వజ సురేశ్వర |
దేవదేవ మహావిష్ణో జరాంతక నమోఽస్తు తే || ౫ ||
భక్తిసంతుష్ట శూరాత్మన్ భూతపాల భయంకర |
నిరహంకార నిర్మాయ తేజోమయ నమోఽస్తు తే || ౬ ||
సర్వమంగళ సర్వేశ సర్వారిష్టవినాశన |
వైకుంఠవాస గంభీర యోగీశ్వర నమోఽస్తు తే || ౭ ||
ఇతి శ్రీ నృసింహ నమస్కార స్తోత్రమ్ |
Found a Mistake or Error? Report it Now
