|| Sri Shyamala Ashtottara Shatanama Stotram 2 ||
asya śrīśyāmalāṣṭōttaraśatanāmastōtra mahāmantrasya, mahābhairava r̥ṣiḥ, anuṣṭup chandaḥ, śrīmātaṅgīśvarī dēvatā, ādiśaktiriti bījaṁ, sarvakāmapradēti śaktiḥ, parañjyōtiḥ svarūpiṇīti kīlakaṁ, śyāmalāṣṭōttaraśatanāma japē viniyōgaḥ |
namastē:’stu jagaddhātri mātaṅgīśvari tē namaḥ |
śyāmalē jagadīśānē namastē paramēśvarī || 1 ||
namastē:’stu mahākr̥ṣṇē sarvabhūṣaṇasamyutē |
mahādēvi mahēśāni mahādēvapriyē namaḥ || 2 ||
ādiśaktirmahāśaktiḥ parāśaktiḥ parātparē |
brahmaśaktē viṣṇuśaktē śivaśaktē namō namaḥ || 3 ||
namō:’mr̥tēśvarī dēvi namaḥ paraśivapriyē |
brahmarūpē viṣṇurūpē śivarūpē namō:’stu tē || 4 ||
sarvakāmapradē tubhyaṁ sarvasiddhipradē namaḥ |
sarvasampatpradē nr̥̄ṇāṁ sarvarājasuśaṅkari || 5 ||
strīvaśaṅkari vandē tvāṁ namō naravaśaṅkari |
dēvamōhini sēvē tvāṁ sarvasattvavaśaṅkari || 6 ||
namaḥ śāṅkari vāgdēvi sarvalōkavaśaṅkarī |
sarvābhīṣṭapradē nityē namō mātaṅgakanyakē || 7 ||
namō nīlōtpalaprakhyē namō marakataprabhē |
nīlamēghapratīkāśē indranīlasamaprabhē || 8 ||
namaścaṇḍyādidēvēśi divyanārīvaśaṅkarī |
namastē mātr̥saṁstutyē jayē tē vijayē namaḥ || 9 ||
bhūṣitāṅgi mahāśyāmē mahārāmē mahāprabhē |
mahāviṣṇupriyakarī sadāśivamahāpriyē || 10 ||
rudrāṇī sarvapāpaghnī kāmēśvari namō:’stu tē |
śukaśyāmē laghuśyāmē rājavaśyakarī namaḥ || 11 ||
vīṇāhastē namastubhyaṁ namō gītaratē sadā |
sarvavidyāpradē tubhyaṁ namaḥ śaktyādipūjitē || 12 ||
bhajē:’haṁ vēdagītē tvāṁ dēvagītē namō namaḥ |
śaṅkhakuṇḍalasamyuktē bimbōṣṭhī tvāṁ bhajāmyaham || 13 ||
raktavastraparīdhānē gr̥hītamadhupātrakē |
madhupriyē namastubhyaṁ madhumāṁsabalipriyē || 14 ||
raktākṣī ghārṇamānākṣī smitēndumukhi saṁstutē |
kastūrītilakōpētē candraśīrṣē jaganmayē || 15 ||
namastubhyaṁ mahālakṣmi kadambavanasaṁsthitē |
mahāvidyē namastubhyaṁ stanabhāravirājitē || 16 ||
haraharyādisaṁstutyē smitāsyē tvāṁ bhajāmyaham |
namaḥ kalyāṇadē puṁsāṁ kalyāṇi kamalālayē || 17 ||
mahādāridryasaṁhartrī mahāpātakadāhinī |
mahājñānapradē nr̥̄ṇāṁ mahāsaundaryadē namaḥ || 18 ||
mahāmuktipradē vāṇi parañjyōtiḥ svarūpiṇi |
cidānandātmikē tubhyaṁ namō:’lakṣmīvināśini || 19 ||
bhaktā:’bhayapradē nityamāpannāśini tē namaḥ |
namastē:’stu sahasrākṣi sahasrabhujadhāriṇī || 20 ||
mahyāḥ śubhapradē tubhyaṁ bhaktānāṁ maṅgalapradē |
namō:’stvaśubhasaṁhartrī bhaktāṣṭaiśvaryadē namaḥ || 21 ||
namō dēvyai namastubhyaṁ namastē mukharañjinī |
jaganmātarnamastubhyaṁ namastē sarvanāyikē || 22 ||
namaḥ parāparakalē paramātmapriyē namaḥ |
namastē rājamātaṅgī namastubhyaṁ namō:’stu tē || 23 ||
phalaśrutiḥ –
nāmnāmaṣṭōttaraṁ puṇyaṁ śyāmalāyā itīritam |
prajapēdyō narō bhaktyā sarvapāpairvimucyatē || 24 ||
vyācaṣṭē sarvaśāstrāṇi mahāvāgīśvarō bhavēt |
sakr̥cchravaṇamātrēṇa guhyāddvē ca catuṣṭayam || 25 ||
sarvalōkān vaśīkuryāt kāntyā viṣṇusamō bhavēt |
labhatē mahatīṁ lakṣmīṁ daivatairatidurlabhām || 26 ||
aṇimādiguṇaiśvaryaṁ sa labhēcchīghramēva hi |
jātismr̥tirbhavēcchīghraṁ sarvavidyānidhirbhavēt || 27 ||
prāpnōti paramaṁ jñānaṁ sarvadā sukhamaśnutē |
sarvatra sa bhavētpūjyaḥ sarvatra vijayī bhavēt || 28 ||
bhūtaprētapiśācādi bhayaṁ tasya na jāyatē |
mahatīṁ kīrtimāpnōti labhēdyōgamanuttamam || 29 ||
ghaṭikāpādukādyaṣṭasiddhināthō bhavēdayam |
maṅgalāni bhavēnnityaṁ sa mahāpaṇḍitō bhavēt || 30 ||
labhatē mahadāyuṣyaṁ lōkasammōhanō bhavēt |
labhēdantē mahādēvarūpaṁ nātra vicāraṇā || 31 ||
iti śrī śyāmalāṣṭōttaraśatanāma stōtram ||
Found a Mistake or Error? Report it Now
