|| Sri Subrahmanya Pooja Vidhanam ||
punaḥ saṅkalpam –
pūrvokta evaṃ guṇa viśeṣaṇa viśiṣṭāyāṃ śubha tithau vallīdevasenāsameta śrīsubrahmaṇyeśvara prasādena sarvopaśānti pūrvaka dīrghāyurārogya dhana kalatra putra pautrābhi vṛddhyarthaṃ sthiralakṣmī kīrtilābha śatruparājayādi sakalābhīṣṭa siddhyarthaṃ śrī subrahmaṇyeśvara svāmi pūjāṃ kariṣye ||
dhyānam –
ṣaḍvaktraṃ śikhivāhanaṃ trinayanaṃ citrāmbarālaṅkṛtaṃ
śaktiṃ vajramasiṃ triśūlamabhayaṃ kheṭaṃ dhanuścakrakam |
pāśaṃ kukkuṭamaṅkuśaṃ ca varadaṃ hastairdadānaṃ sadā
dhyāyedīpsita siddhidaṃ śivasutaṃ vande surārādhitam ||
śrīvallīdevasenā sameta śrīsubrahmaṇyaṃ dhyāyāmi |
āvāhanam –
subrahmaṇya mahābhāga krauñcākhyagiribhedana |
āvāhayāmi deva tvaṃ bhaktābhīṣṭaprado bhava ||
śrīvallīdevasenā sameta śrīsubrahmaṇyaṃ āvāhayāmi |
āsanam –
agniputra mahābhāga kārtikeya surārcita |
ratnasiṃhāsanaṃ deva gṛhāṇa varadāvyaya ||
śrīvallīdevasenā sameta śrīsubrahmaṇyāya namaḥ āsanaṃ samarpayāmi |
pādyam –
gaṇeśānuja deveśa vallīkāmadavigraha |
pādyaṃ gṛhāṇa gāṅgeya bhaktyā dattaṃ surārcita ||
śrīvallīdevasenā sameta śrīsubrahmaṇyāya namaḥ pādayoḥ pādyaṃ samarpayāmi |
arghyam –
brahmādi devabṛndānāṃ praṇavārthopadeśaka |
arghyaṃ gṛhāṇa deveśa tārakāntaka ṣaṇmukha ||
śrīvallīdevasenā sameta śrīsubrahmaṇyāya namaḥ hastayorarghyaṃ samarpayāmi |
ācamanīyam –
elākuṅkumakastūrīkarpūrādisuvāsitaiḥ |
tīrthairācamyatāṃ deva gaṅgādharasutāvyaya ||
śrīvallīdevasenā sameta śrīsubrahmaṇyāya namaḥ ācamanīyaṃ samarpayāmi |
pañcāmṛta snānam –
śarkarā madhu gokṣīra phalasāra ghṛtairyutam |
pañcāmṛtasnānamidaṃ bāhuleya gṛhāṇa bho ||
śrīvallīdevasenā sameta śrīsubrahmaṇyāya namaḥ pañcāmṛtasnānaṃ samarpayāmi |
śuddhodaka snānam –
svāmin śaravaṇodbhūta śūrapadmāsurāntaka |
gaṅgādisalilaiḥ snāhi devasenāmanohara ||
śrīvallīdevasenā sameta śrīsubrahmaṇyāya namaḥ śuddhodaka snānaṃ samarpayāmi |
vastram –
dukūlavastrayugalaṃ muktājālasamanvitam |
prītyā gṛhāṇa gāṅgeya bhaktāpadbhañjanakṣama ||
śrīvallīdevasenā sameta śrīsubrahmaṇyāya namaḥ vastrayugmaṃ samarpayāmi |
upavītam –
rājataṃ brahmasūtraṃ ca kāñcanaṃ cottarīyakam |
yajñopavītaṃ deveśa gṛhāṇa suranāyaka ||
śrīvallīdevasenā sameta śrīsubrahmaṇyāya namaḥ upavītaṃ samarpayāmi |
bhasma –
nityāgnihotrasambhūtaṃ virajāhomabhāvitam |
gṛhāṇa bhasma he svāmin bhaktānāṃ bhūtido bhava ||
śrīvallīdevasenā sameta śrīsubrahmaṇyāya namaḥ bhasma samarpayāmi |
gandham –
kastūrīkuṅkumādyaiśca vāsitaṃ sahimodakam |
gandhaṃ vilepanārthāya gṛhāṇa krauñcadāraṇa ||
śrīvallīdevasenā sameta śrīsubrahmaṇyāya namaḥ gandhān dhārayāmi |
akṣatān –
akṣatān dhavalān divyān śāleyān taṇḍulān śubhān |
kāñcanākṣatasamyuktān kumāra pratigṛhyatām ||
śrīvallīdevasenā sameta śrīsubrahmaṇyāya namaḥ akṣatān samarpayāmi |
ābharaṇam –
bhūṣaṇāni vicitrāṇi hemaratnamayāni ca |
gṛhāṇa bhuvanādhāra bhuktimuktiphalaprada ||
śrīvallīdevasenā sameta śrīsubrahmaṇyāya namaḥ ābharaṇāni samarpayāmi |
puṣpam –
punnaga vakulāśoka nīpa pāṭala jāti ca |
vāsantikā bilvajājī puṣpāṇi parigṛhyatām ||
śrīvallīdevasenā sameta śrīsubrahmaṇyāya namaḥ puṣpāṇi samarpayāmi |
athāṅga pūja –
suravanditapādāya namaḥ – pādau pūjayāmi |
mukurākārajānave namaḥ – jānunī pūjayāmi |
karirājakarorave namaḥ – ūrū pūjayāmi |
ratnakiṅkiṇikāyuktakaṭaye namaḥ – kaṭiṃ pūjayāmi |
guhāya namaḥ – guhyaṃ pūjayāmi |
herambasahodarāya namaḥ – udaraṃ pūjayāmi |
sunābhaye namaḥ – nābhiṃ pūjayāmi |
suhṛde namaḥ – hṛdayaṃ pūjayāmi |
viśālavakṣase namaḥ – vakṣaḥsthalaṃ pūjayāmi |
kṛttikāstanandhayāya namaḥ – stanau pūjayāmi |
śatrujayorjitabāhave namaḥ – bāhūn pūjayāmi |
śaktihastāya namaḥ – hastān pūjayāmi |
puṣkarasraje namaḥ – kaṇṭhaṃ pūjayāmi |
ṣaṇmukhāya namaḥ – mukhāni pūjayāmi |
sunāsāya namaḥ – nāsike pūjayāmi |
dviṣaṇṇetrāya namaḥ – netrāṇi pūjayāmi |
hiraṇyakuṇḍalāya namaḥ – karṇau pūjayāmi |
phālanetrasutāya namaḥ – phālaṃ pūjayāmi |
vedaśirovedyāya namaḥ – śiraḥ pūjayāmi |
senāpataye namaḥ – sarvāṇyaṅgāni pūjayāmi |
atha aṣṭottaraśatanāma pūjā –
śrī subrahmaṇya aṣṭottaraśatanāmāvalī paśyatu |
śrī vallī aṣṭottaraśatanāmāvalī paśyatu |
śrī devasenā aṣṭottaraśatanāmāvalī paśyatu |
dhūpam –
daśāṅgaṃ guggulūpetaṃ sugandhaṃ sumanoharam |
kapilāghṛtasamyuktaṃ dhūpaṃ gṛhṇīṣva ṣaṇmukha ||
śrīvallīdevasenā sameta śrīsubrahmaṇyāya namaḥ dhūpamāghrāpayāmi |
dīpam –
sājyaṃ trivartisamyuktaṃ vahninā yojitaṃ mayā |
dīpaṃ gṛhāṇa skandeśa trailokyatimirāpaham ||
śrīvallīdevasenā sameta śrīsubrahmaṇyāya namaḥ dīpaṃ darśayāmi |
dhūpadīpānantaraṃ śuddhācamanīyaṃ samarpayāmi |
naivedyam –
lehyaṃ coṣyaṃ ca bhojyaṃ ca pānīyaṃ ṣaḍrasānvitam |
bhakṣyaśākādisamyuktaṃ naivedyaṃ skanda gṛhyatām ||
śrīvallīdevasenā sameta śrīsubrahmaṇyāya namaḥ naivedyaṃ samarpayāmi |
oṃ bhūrbhuva̱ssuva̍: | tatsa̍vi̱turvare̎ṇya̱ṃ bhargo̍ de̱vasya̍ dhīmahi |
dhiyo̱ yo na̍: praco̱dayā̎t ||
satyaṃ tvā ṛtena pariṣiñcāmi |
(sāyaṅkāle – ṛtaṃ tvā satyena pariṣiñcāmi)
amṛtamastu | a̱mṛ̱to̱pa̱stara̍ṇamasi |
oṃ prā̱ṇāya̱ svāhā̎ | oṃ a̱pā̱nāya̱ svāhā̎ |
oṃ vyā̱nāya̱ svāhā̎ | oṃ u̱dā̱nāya̱ svāhā̎ |
oṃ sa̱mā̱nāya̱ svāhā̎ |
madhye madhye pānīyaṃ samarpayāmi |
a̱mṛ̱tā̱pi̱dhā̱nama̍si | uttarāpośanaṃ samarpayāmi |
hastau prakṣālayāmi | pādau prakṣālayāmi |
śuddhācamanīyaṃ samarpayāmi |
tāmbūlam –
pūgīphalasamāyuktaṃ nāgavallīdalairyutam |
karpūracūrṇasamyuktaṃ tāmbūlaṃ pratigṛhyatām ||
śrīvallīdevasenā sameta śrīsubrahmaṇyāya namaḥ tāmbūlaṃ samarpayāmi |
nīrājanam –
devasenāpate skanda saṃsāradhvāntabhāraka |
nīrājanamidaṃ deva gṛhyatāṃ surasattama ||
śrīvallīdevasenā sameta śrīsubrahmaṇyāya namaḥ karpūranīrājanaṃ darśayāmi |
mantrapuṣpam –
oṃ tatpuruṣāya vidmahe mahāsenāya dhīmahi | tanno skandaḥ pracodayāt |
puṣpāñjaliṃ pradāsyāmi bhaktābhīṣṭapradāyaka |
gṛhāṇavallīramaṇa suprītenāntarātmanā ||
śrīvallīdevasenā sameta śrīsubrahmaṇyāya namaḥ puṣpāñjaliṃ samarpayāmi |
pradakṣiṇa namaskāram –
yāni kāni ca pāpāni janmāntarakṛtāni ca |
tāni tāni praṇaśyanti pradakṣiṇa pade pade ||
pāpo’haṃ pāpakarmā’haṃ pāpātmā pāpasambhava |
trāhimāṃ kṛpayā deva śaraṇāgatavatsala ||
anyathā śaraṇaṃ nāsti tvameva śaraṇaṃ mama |
tasmātkāruṇya bhāvena rakṣa rakṣa sureśvara ||
śrīvallīdevasenā sameta śrīsubrahmaṇyāya namaḥ ātmapradakṣiṇa namaskāraṃ samarpayāmi |
namaskāram –
ṣaḍānanaṃ kuṅkumaraktavarṇaṃ
dviṣaḍbhujaṃ bālakamambikāsutam |
rudrasya sūnuṃ surasainyanāthaṃ
guhaṃ sadā’haṃ śaraṇaṃ prapadye ||
śrīvallīdevasenā sameta śrīsubrahmaṇyāya namaḥ prārthanā namaskārān samarpayāmi |
rājopacāra pūjā –
oṃ śrīvallīdevasenā sameta śrīsubrahmaṇyāya namaḥ |
chatramācchādayāmi |
cāmarairvījayāmi |
gītaṃ śrāvayāmi |
nṛtyaṃ darśayāmi |
vādyaṃ ghoṣayāmi |
āndolikān ārohayāmi |
aśvān ārohayāmi |
gajān ārohayāmi |
oṃ śrīvallīdevasenā sameta śrīsubrahmaṇyāya namaḥ |
samasta rājopacārān devopacārān samarpayāmi |
arghyam –
devasenāpate svāmin senānīrakhileṣṭada |
idamarghyaṃ pradāsyāmi suprīto bhava sarvadā ||
oṃ śrīvallīdevasenā sameta śrīsubrahmaṇyāya namaḥ |
idamarghyaṃ idamarghyaṃ idamarghyam || 1 ||
candrātreya mahābhāga soma somavibhūṣaṇa |
idamarghyaṃ pradāsyāmi suprīto bhava sarvadā ||
oṃ śrīvallīdevasenā sameta śrīsubrahmaṇyāya namaḥ |
idamarghyaṃ idamarghyaṃ idamarghyam || 2 ||
nīlakaṇṭha mahābhāga subrahmaṇyasuvāhana |
idamarghyaṃ pradāsyāmi suprīto bhava sarvadā ||
oṃ śrīvallīdevasenā sameta śrīsubrahmaṇyāya namaḥ |
idamarghyaṃ idamarghyaṃ idamarghyam || 3 ||
kṣamāprārthanā –
mantrahīnaṃ kriyāhīnaṃ bhaktihīnaṃ sureśvara |
yatpūjitaṃ mayā deva paripūrṇaṃ tadastu te ||
anayā dhyānāvāhanādi ṣoḍaśopacāra pūjayā bhagavān sarvātmakaḥ śrīvallīdevasenā sameta śrīsubrahmaṇya svāmi suprīto suprasanno varado bhavatu ||
oṃ śāntiḥ śāntiḥ śāntiḥ ||
Found a Mistake or Error? Report it Now
