|| శ్రీ సూర్య స్తోత్రం – ౨ (దేవ కృతం) ||
దేవా ఊచుః |
నమస్తే ఋక్స్వరూపాయ సామరూపాయ తే నమః |
యజుః స్వరూపరూపాయ సామ్నాం ధామవతే నమః || ౧ ||
జ్ఞానైకధామభూతాయ నిర్ధూతతమసే నమః |
శుద్ధజ్యోతిః స్వరూపాయ విశుద్ధాయామలాత్మనే || ౨ ||
చక్రిణే శంఖినే ధామ్నే శార్ఙ్గిణే పద్మినే నమః |
వరిష్ఠాయ వరేణ్యాయ పరస్మై పరమాత్మనే || ౩ ||
నమోఽఖిలజగద్వ్యాపిస్వరూపాయాత్మమూర్తయే |
సర్వకారణభూతాయ నిష్ఠాయై జ్ఞానచేతసామ్ || ౪ ||
నమః సూర్యస్వరూపాయ ప్రకాశాత్మస్వరూపిణే |
భాస్కరాయ నమస్తుభ్యం తథా దినకృతే నమః || ౫ ||
శర్వరీహేతవే చైవ సంధ్యాజ్యోత్స్నాకృతే నమః |
త్వం సర్వమేతద్భగవన్ జగదుద్భ్రమతా త్వయా || ౬ ||
భ్రమత్యా విద్ధమఖిలం బ్రహ్మాండం సచరాచరమ్ |
త్వదంశుభిరిదం స్పృష్టం సర్వం సంజాయతే శుచిః || ౭ ||
క్రియతే త్వత్కరైః స్పర్శాజ్జలాదీనాం పవిత్రతా |
హోమదానాదికో ధర్మో నోపకారాయ జాయతే || ౮ ||
తావద్యావన్న సంయోగి జగదేతత్ త్వదంశుభిః |
ఋచస్తే సకలా హ్యేతా యజూంష్యేతాని చాన్యతః || ౯ ||
సకలాని చ సామాని నిపతంతి త్వదంగతః |
ఋఙ్మయస్త్వం జగన్నాథ త్వమేవ చ యజుర్మయః || ౧౦ ||
యతః సామమయశ్చైవ తతో నాథ త్రయీమయః |
త్వమేవ బ్రహ్మణో రూపం పరం చాపరమేవ చ || ౧౧ ||
మూర్తామూర్తస్తథా సూక్ష్మః స్థూలరూపస్తథా స్థితః |
నిమేషకాష్ఠాదిమయః కాలరూపః క్షయాత్మకః |
ప్రసీద స్వేచ్ఛయా రూపం స్వతేజః శమనం కురు || ౧౨ ||
ఇదం స్తోత్రవరం రమ్యం శ్రోతవ్యం శ్రద్ధయా నరైః |
శిష్యో భూత్వా సమాధిస్థో దత్త్వా దేయం గురోరపి || ౧౩ ||
ఇతి శ్రీమార్కండేయపురాణే పంచసప్తతితమోఽధ్యాయే దేవ కృత శ్రీ సూర్య స్తోత్రమ్ |
Found a Mistake or Error? Report it Now
