|| శ్రీ సూర్యార్యా స్తోత్రం (యాజ్ఞవల్క్య కృతం) ||
శుకతుండచ్ఛవిసవితుశ్చండరుచేః పుండరీకవనబంధోః |
మండలముదితం వందే కుండలమాఖండలాశాయాః || ౧ ||
యస్యోదయాస్తసమయే సురముకుటనిఘృష్టచరణకమలోఽపి |
కురుతేంజలిం త్రినేత్రః స జయతి ధామ్నాం నిధిః సూర్యః || ౨ ||
ఉదయాచలతిలకాయ ప్రణతోఽస్మి వివస్వతే గ్రహేశాయ |
అంబరచూడామణయే దిగ్వనితాకర్ణపూరాయ || ౩ ||
జయతి జనానందకరః కరనికరనిరస్తతిమిరసంఘాతః |
లోకాలోకాలోకః కమలారుణమండలః సూర్యః || ౪ ||
ప్రతిబోధితకమలవనః కృతఘటనశ్చక్రవాకమిథునానామ్ |
దర్శితసమస్తభువనః పరహితనిరతో రవిః సదా జయతి || ౫ ||
అపనయతు సకలకలికృతమలపటలం సప్రతప్తకనకాభః |
అరవిందవృందవిఘటనపటుతరకిరణోత్కరః సవితా || ౬ ||
ఉదయాద్రిచారుచామర హరితహయఖురపరిహతరేణురాగ |
హరితహయ హరితపరికర గగనాంగణదీపక నమస్తేఽస్తు || ౭ ||
ఉదితవతి త్వయి విలసతి ముకులీయతి సమస్తమస్తమితబింబే |
న హ్యన్యస్మిన్ దినకర సకలం కమలాయతే భువనమ్ || ౮ ||
జయతి రవిరుదయసమయే బాలాతపః కనకసన్నిభో యస్య |
కుసుమాంజలిరివ జలధౌ తరంతి రథసప్తయః సప్త || ౯ ||
ఆర్యాః సాంబపురే సప్త ఆకాశాత్పతితా భువి |
యస్య కంఠే గృహే వాపి న స లక్ష్మ్యా వియుజ్యతే || ౧౦ ||
ఆర్యాః సప్త సదా యస్తు సప్తమ్యాం సప్తధా జపేత్ |
తస్య గేహం చ దేహం చ పద్మా సత్యం న ముంచతి || ౧౧ ||
నిధిరేష దరిద్రాణాం రోగిణాం పరమౌషధమ్ |
సిద్ధిః సకలకార్యాణాం గాథేయం సంస్మృతా రవేః || ౧౨ ||
ఇతి శ్రీయాజ్ఞవల్క్య విరచితం శ్రీ సూర్యార్యా స్తోత్రమ్ |
Found a Mistake or Error? Report it Now
