ത്രിപുരാ ഭാരതീ സ്തോത്രം PDF മലയാളം

ത്രിപുരാ ഭാരതീ സ്തോത്രം മലയാളം Lyrics

|| ത്രിപുരാ ഭാരതീ സ്തോത്രം ||

ഐന്ദ്രസ്യേവ ശരാസനസ്യ ദധതീ മധ്യേ ലലാടം പ്രഭാം
ശൗക്ലീം കാന്തിമനുഷ്ണഗോരിവ ശിരസ്യാതന്വതീ സർവതഃ .
ഏഷാഽസൗ ത്രിപുരാ ഹൃദി ദ്യുതിരിവോഷ്ണാംശോഃ സദാഹഃസ്ഥിതാ
ഛിന്ദ്യാന്നഃ സഹസാ പദൈസ്ത്രിഭിരഘം ജ്യോതിർമയീ വാങ്മയീ ..

യാ മാത്രാ ത്രപുസീലതാതനുലസത്തന്തൂത്ഥിതിസ്പർദ്ധിനീ
വാഗ്ബീജേ പ്രഥമേ സ്ഥിതാ തവ സദാ താം മന്മഹേ തേ വയം .
ശക്തിഃ കുണ്ഡലിനീതി വിശ്വജനനവ്യാപാരബദ്ധോദ്യമാ
ജ്ഞാത്വേത്ഥം ന പുനഃ സ്പൃശന്തി ജനനീഗർഭേഽർഭകത്വം നരാഃ ..

ദൃഷ്ട്വാ സംഭ്രമകാരി വസ്തു സഹസാ ഐ ഐ ഇതി വ്യാഹൃതം
യേനാകൂതവശാദപീഹ വരദേ ബിന്ദും വിനാഽപ്യക്ഷരം .
തസ്യാപി ധ്രുവമേവ ദേവി തരസാ ജാതേ തവാഽനുഗ്രഹേ
വാചഃ സൂക്തിസുധാരസദ്രവമുചോ നിര്യാന്തി വക്ത്രാംബുജാത് ..

യന്നിത്യേ തവ കാമരാജമപരം മന്ത്രാക്ഷരം നിഷ്കലം
തത് സാരസ്വതമിത്യവൈതി വിരലഃ കശ്ചിദ് ബുധശ്ചേദ് ഭുവി .
ആഖ്യാനം പ്രതിപർവ സത്യതപസോ യത്കീർതയന്തോ ദ്വിജാഃ
പ്രാരംഭേ പ്രണവാസ്പദം പ്രണയിതാം നീത്വോച്ചരന്തി സ്ഫുടം ..

യത്സദ്യോ വചസാം പ്രവൃത്തികരണേ ദൃഷ്ടപ്രഭാവം ബുധൈ-
സ്താർതീയീകമഹം നമാമി മനസാ തദ്ബീജമിന്ദുപ്രഭം .
അസ്ത്വൗർവോഽപി സരസ്വതീമനുഗതോ ജാഡ്യാംബുവിച്ഛിത്തയേ
ഗൗഃശബ്ദോ ഗിരി വർതതേ സ നിയതം യോഗം വിനാ സിദ്ധിദഃ ..

ഏകൈകം തവ ദേവി ബീജമനഘം സവ്യഞ്ജനാവ്യഞ്ജനം
കൂടസ്ഥം യദി വാ പൃഥക്ക്രമഗതം യദ്വാ സ്ഥിതം വ്യുത്ക്രമാത് .
യം യം കാമമപേക്ഷ്യ യേന വിധിനാ കേനാപി വാ ചിന്തിതം
ജപ്തം വാ സഫലീകരോതി തരസാ തം തം സമസ്തം നൃണാം ..

വാമേ പുസ്തകധാരിണീമഭയദാം സാക്ഷസ്രജം ദക്ഷിണേ
ഭക്തേഭ്യോ വരദാനപേശലകരാം കർപൂരകുന്ദോജ്ജ്വലാം .
ഉജ്ജൃംഭാംബുജപത്രകാന്തനയനസ്നിഗ്ധപ്രഭാലോകിനീം
യേ ത്വാമംബ ന ശീലയന്തി മനസാ തേഷാം കവിത്വം കുതഃ ..

യേ ത്വാം പാണ്ഡുരപുണ്ഡരീകപടലസ്പഷ്ടാഭിരാമപ്രഭാം
സിഞ്ചന്തീമമൃതദ്രവൈരിവ ശിരോ ധ്യായന്തി മൂർധ്നി സ്ഥിതാം .
അശ്രാന്തം വികടസ്ഫുടാക്ഷരപദാ നിര്യാതി വക്ത്രാംബുജാത്
തേഷാം ഭാരതി ഭാരതീ സുരസരിത്കല്ലോലലോലോർമ്മിഭിഃ ..

യേ സിന്ദൂരപരാഗപുഞ്ജപിഹിതാം ത്വത്തേജസാ ദ്യാമിമാ-
മുർവീ ചാപി വിലീനയാവകരസപ്രസ്താരമഗ്നാമിവ .
പശ്യന്തി ക്ഷണമപ്യനന്യമനസസ്തേഷാമനംഗജ്വര-
ക്ലാന്താസ്ത്രസ്തകുരംഗശാവകദൃശോ വശ്യാ ഭവന്തി സ്ത്രിയഃ ..

ചഞ്ചത്കാഞ്ചനകുണ്ഡലാംഗദധരാമാബദ്ധകാഞ്ചീസ്രജം
യേ ത്വാം ചേതസി തദ്ഗതേ ക്ഷണമപി ധ്യായന്തി കൃത്വാ സ്ഥിരം .
തേഷാം വേശ്മനി വിഭ്രമാദഹരഹഃ സ്ഫാരീ ഭവന്ത്യശ്ചിരാദ്
മാദ്യത്കുഞ്ജരകർണതാലതരലാഃ സ്ഥൈര്യം ഭജന്തേ ശ്രിയഃ ..

ആർഭട്യാ ശശിഖണ്ഡമണ്ഡിതജടാജൂടാം നൃമുണ്ഡസ്രജം
ബന്ധൂകപ്രസവാരുണാംബരധരാം പ്രേതാസനാധ്യാസിനീം .
ത്വാം ധ്യായന്തി ചതുർഭുജാം ത്രിനയനാമാപീനതുംഗസ്തനീം
മധ്യേ നിമ്നവലിത്രയാങ്കിതതനും ത്വദ്രൂപസമ്പത്തയേ ..

ജാതോഽപ്യല്പപരിച്ഛദേ ക്ഷിതിഭൃതാം സാമാന്യമാത്രേ കുലേ
നിഃശേഷാവനിചക്രവർതിപദവീം ലബ്ധ്വാ പ്രതാപോന്നതഃ .
യദ്വിദ്യാധരവൃന്ദവന്ദിതപദഃ ശ്രീവത്സരാജോഽഭവദ്
ദേവി ത്വച്ചരണാംബുജപ്രണതിജഃ സോഽയം പ്രസാദോദയഃ ..

ചണ്ഡി ത്വച്ചരണാംബുജാർചനകൃതേ ബില്വീദലോല്ലുണ്ടന-
ത്രുട്യത്കണ്ടകകോടിഭിഃ പരിചയം യേഷാം ന ജഗ്മുഃ കരാഃ .
തേ ദണ്ഡാങ്കുശചക്രചാപകുലിശശ്രീവത്സമത്സ്യാങ്കിതൈ-
ര്ജായന്തേപൃഥിവീഭുജഃ കഥമിവാംഭോജപ്രഭൈഃ പാണിഭിഃ ..

വിപ്രാഃ ക്ഷോണിഭുജോ വിശസ്തദിതരേ ക്ഷീരാജ്യമധ്വൈക്ഷവൈ
സ്ത്വാം ദേവി ത്രിപുരേ പരാപരകലാം സന്തർപ്യ പൂജാവിധൗ .
യാം യാം പ്രാർഥയതേ മനഃ സ്ഥിരധിയാം തേഷാം ത ഏവ ധ്രുവം
താം താം സിദ്ധിമവാപ്നുവന്തി തരസാ വിഘ്നൈരവിഘ്നീകൃതാ ..

ശബ്ദാനാം ജനനീ ത്വമത്ര ഭുവനേ വാഗ്വാദിനീത്യുച്യസേ
ത്വത്തഃ കേശവവാസവപ്രഭൃതയോഽപ്യാവിർഭവന്തി ധ്രുവം .
ലീയന്തേ ഖലു യത്ര കല്പവിരതൗ ബ്രഹ്മാദയസ്തേഽപ്യമീ
സാ ത്വം കാചിദചിന്ത്യരൂപമഹിമാ ശക്തിഃ പരാ ഗീയസേ ..

ദേവാനാം ത്രിതയം ത്രയീ ഹുതഭുജാം ശക്തിത്രയം ത്രിസ്വരാ
സ്ത്രൈലോക്യം ത്രിപദീ ത്രിപുഷ്കരമഥ ത്രിബ്രഹ്മ വർണാസ്ത്രയഃ .
യത്കിഞ്ചിജ്ജഗതി ത്രിധാ നിയമിതം വസ്തു ത്രിവർഗാദികം
തത്സർവം ത്രിപുരേതി നാമ ഭഗവത്യന്വേതി തേ തത്ത്വതഃ ..

ലക്ഷ്മീം രാജകുലേ ജയാം രണമുഖേ ക്ഷേമങ്കരീമധ്വനി
ക്രവ്യാദദ്വിപസർപഭാജി ശബരീം കാന്താരദുർഗേ ഗിരൗ .
ഭൂതപ്രേതപിശാചജൃംഭകഭയേ സ്മൃത്വാ മഹാഭൈരവീം
വ്യാമോഹേ ത്രിപുരാം തരന്തി വിപദസ്താരാം ച തോയപ്ലവേ ..

മായാ കുണ്ഡലിനീ ക്രിയാ മധുമതീ കാലീ കലാമാലിനീ
മാതംഗീ വിജയാ ജയാ ഭഗവതീ ദേവീ ശിവാ ശാംഭവീ .
ശക്തിഃ ശങ്കരവല്ലഭാ ത്രിനയനാ വാഗ്വാദിനീ ഭൈരവീ
ഹ്രീങ്കാരീ ത്രിപുരാ പരാപരമയീ മാതാ കുമാരീത്യസി ..

ആ ഈ പല്ലവിതൈഃ പരസ്പരയുതൈർദ്വിത്രിക്രമാദ്യക്ഷരൈഃ
കാദ്യൈഃ ക്ഷാന്തഗതൈഃ സ്വരാദിഭിരഥ ക്ഷാന്തൈശ്ച തൈഃ സസ്വരൈഃ .
നാമാനി ത്രിപുരേ ഭവന്തി ഖലു യാന്യത്യന്തഗുഹ്യാനി തേ
തേഭ്യോ ഭൈരവപത്നി വിംശതിസഹസ്രേഭ്യഃ പരേഭ്യോ നമഃ ..

ബോദ്ധവ്യാ നിപുണം ബുധൈസ്തുതിരിയം കൃത്വാ മനസ്തദ്ഗതം
ഭാരത്യാസ്ത്രിപുരേത്യനന്യമനസോ യത്രാദ്യവൃത്തേ സ്ഫുടം .
ഏകദ്വിത്രിപദക്രമേണ കഥിതസ്തത്പാദസംഖ്യാക്ഷരൈ-
ര്മന്ത്രോദ്ധാരവിധിർവിശേഷസഹിതഃ സത്സമ്പ്രദായാന്വിതഃ ..

സാവദ്യം നിരവദ്യമസ്തു യദി വാ കിംവാഽനയാ ചിന്തയാ
നൂനം സ്തോത്രമിദം പഠിഷ്യതി ജനോ യസ്യാസ്തി ഭക്തിസ്ത്വയി .
സഞ്ചിന്ത്യാപി ലഘുത്വമാത്മനി ദൃഢം സഞ്ജായമാനം ഹഠാത്
ത്വദ്ഭക്ത്യാ മുഖരീകൃതേന രചിതം യസ്മാന്മയാപി ധ്രുവം ..