কনকধারাস্তোত্রম্

|| কনকধারাস্তোত্রম্ ||

বন্দে বন্দারুমন্দারমিন্দিরানন্দকন্দলম্ ।
অমন্দানন্দসন্দোহবন্ধুরং সিন্ধুরাননম্ ॥

অঙ্গং হরেঃ পুলকভূষণমাশ্রয়ন্তী
ভৃঙ্গাঙ্গনেব মুকুলাভরণং তমালম্ ।
অঙ্গীকৃতাখিলবিভূতিরপাঙ্গলীলা
মাঙ্গল্যদাস্তু মম মঙ্গল়দেবতায়াঃ ॥

মুগ্ধা মুহুর্বিদধতী বদনে মুরারেঃ
প্রেমত্রপাপ্রণিহিতানি গতাগতানি ।
মালা দৃশোর্মধুকরীব মহোৎপলে যা
সা মে শ্রিয়ং দিশতু সাগরসম্ভবায়াঃ ॥

আমীলিতাক্ষমধিগম্য মুদা মুকুন্দং
আনন্দকন্দমনিমেষমনঙ্গতন্ত্রম্ ।
আকেকরস্থিতকনীনিকপক্ষ্মনেত্রং
ভূত্যৈ ভবেন্মম ভুজঙ্গশয়াঙ্গনায়াঃ ॥

বাহ্বন্তরে মধুজিতঃ শ্রিতকৌস্তুভে যা
হারাবলীব হরিনীলময়ী বিভাতি ।
কামপ্রদা ভগবতোঽপি কটাক্ষমালা
কল্যাণমাবহতু মে কমলালয়ায়াঃ ॥

কালাম্বুদাল়িললিতোরসি কৈটভারেঃ
ধারাধরে স্ফুরতি যা তডিদঙ্গনেব ।
মাতুস্সমস্তজগতাং মহনীয়মূর্তিঃ
ভদ্রাণি মে দিশতু ভার্গবনন্দনায়াঃ ॥

প্রাপ্তং পদং প্রথমতঃ খলু যৎপ্রভাবান্-
মাঙ্গল্যভাজি মধুমাথিনি মন্মথেন ।
ময়্যাপতেত্তদিহ মন্থরমীক্ষণার্ধং
মন্দালসং চ মকরালয়কন্যকায়াঃ ॥

বিশ্বামরেন্দ্রপদবিভ্রমদানদক্ষং
আনন্দহেতুরধিকং মুরবিদ্বিষোঽপি ।
ঈষন্নিষীদতু ময়ি ক্ষণমীক্ষণার্ধ-
মিন্দীবরোদরসহোদরমিন্দিরায়াঃ ॥

ইষ্টা বিশিষ্টমতয়োঽপি যয়া দয়ার্দ্র
দৃষ্ট্যা ত্রিবিষ্টপপদং সুলভং লভন্তে ।
দৃষ্টিঃ প্রহৃষ্টকমলোদরদীপ্তিরিষ্টাং
পুষ্টিং কৃষীষ্ট মম পুষ্করবিষ্টরায়াঃ ॥

দদ্যাদ্দয়ানুপবনো দ্রবিণাম্বুধারাং
অস্মিন্নকিঞ্চনবিহঙ্গশিশৌ বিষণ্ণে ।
দুষ্কর্মঘর্মমপনীয় চিরায় দূরং
নারায়ণপ্রণয়িনীনয়নাম্বুবাহঃ ॥

ধীর্দেবতেতি গরুডধ্বজসুন্দরীতি
শাকম্ভরীতি শশিশেখরবল্লভেতি ।
সৃষ্টিস্থিতিপ্রলয়কেলিষু সংস্থিতায়ৈ
তস্যৈ নমস্ত্রিভুবনৈকগুরোস্তরুণ্যৈ ॥

শ্রুত্যৈ নমোঽস্তু শুভকর্মফলপ্রসূত্যৈ
রত্যৈ নমোঽস্তু রমণীয়গুণার্ণবায়ৈ ।
শক্ত্যৈ নমোঽস্তু শতপত্রনিকেতনায়ৈ
পুষ্ট্যৈ নমোঽস্তু পুরুষোত্তমবল্লভায়ৈ ॥

নমোঽস্তু নালীকনিভাননায়ৈ
নমোঽস্তু দুগ্ধোদধিজন্মভূম্যৈ ।
নমোঽস্তু সোমামৃতসোদরায়ৈ
নমোঽস্তু নারায়ণবল্লভায়ৈ ॥

নমোঽস্তু হেমাম্বুজপীঠিকায়ৈ
নমোঽস্তু ভূমণ্ডলনায়িকায়ৈ ।
নমোঽস্তু দেবাদিদয়াপরায়ৈ
নমোঽস্তু শার্ঙ্গায়ুধবল্লভায়ৈ ॥

নমোঽস্তু দেব্যৈ ভৃগুনন্দনায়ৈ
নমোঽস্তু বিষ্ণোরুরসি স্থিতায়ৈ ।
নমোঽস্তু লক্ষ্ম্যৈ কমলালয়ায়ৈ
নমোঽস্তু দামোদরবল্লভায়ৈ ॥

নমোঽস্তু কান্ত্যৈ কমলেক্ষণায়ৈ
নমোঽস্তু ভূত্যৈ ভুবনপ্রসূত্যৈ ।
নমোঽস্তু দেবাদিভিরর্চিতায়ৈ
নমোঽস্তু নন্দাত্মজবল্লভায়ৈ ॥

সম্পৎকরাণি সকলেন্দ্রিয়নন্দনানি
সাম্রাজ্যদানবিভবানি সরোরুহাক্ষি ।
ত্বদ্বন্দনানি দুরিতোত্তরণোদ্যতানি
মামেব মাতরনিশং কলয়ন্তু মান্যে ॥

যৎকটাক্ষসমুপাসনাবিধিঃ
সেবকস্য সকলার্থসম্পদঃ ।
সন্তনোতি বচনাঙ্গমানসৈঃ
ত্বাং মুরারিহৃদয়েশ্বরীং ভজে ॥

সরসিজনিলয়ে সরোজহস্তে
ধবল়তমাংশুকগন্ধমাল্যশোভে ।
ভগবতি হরিবল্লভে মনোজ্ঞে
ত্রিভুবনভূতিকরি প্রসীদ মহ্যম্ ॥

দিগ্ঘস্তিভিঃ কনককুম্ভমুখাবসৃষ্ট
স্বর্বাহিনী বিমলচারুজলপ্লুতাঙ্গীম্ ।
প্রাতর্নমামি জগতাং জননীমশেষ
লোকাধিনাথগৃহিণীমমৃতাব্ধিপুত্রীম্ ॥

কমলে কমলাক্ষবল্লভে ত্বং
করুণাপূরতরঙ্গিতৈরপাঙ্গৈঃ ।
অবলোকয় মামকিঞ্চনানাং
প্রথমং পাত্রমকৃত্রিমং দয়ায়াঃ ॥

দেবি প্রসীদ জগদীশ্বরি লোকমাতঃ
কল্যানগাত্রি কমলেক্ষণজীবনাথে ।
দারিদ্র্যভীতিহৃদয়ং শরণাগতং মাং
আলোকয় প্রতিদিনং সদয়ৈরপাঙ্গৈঃ ॥

স্তুবন্তি যে স্তুতিভিরমূভিরন্বহং
ত্রয়ীময়ীং ত্রিভুবনমাতরং রমাম্ ।
গুণাধিকা গুরুতরভাগ্যভাগিনো
ভবন্তি তে ভুবি বুধভাবিতাশয়াঃ ॥

Found a Mistake or Error? Report it Now