श्री रामाष्टकम्

॥ श्री रामाष्टकम् ॥

कृतार्तदेववन्दनंदिनेशवंशनन्दनम्।
सुशोभिभालचन्दनंनमामि राममीश्वरम्॥

मुनीन्द्रयज्ञकारकंशिलाविपत्तिहारकम्।
महाधनुर्विदारकंनमामि राममीश्वरम्॥

स्वतातवाक्यकारिणंतपोवने विहारिणम्।
करे सुचापधारिणंनमामि राममीश्वरम्॥

कुरङ्गमुक्तसायकंजटायुमोक्षदायकम्।
प्रविद्धकीशनायकंनमामि राममीश्वरम्॥

प्लवङ्गसङ्गसम्मतिंनिबद्धनिम्नगापतिम्।
दशास्यवंशसङ्क्षतिंनमामि राममीश्वरम्॥

विदीनदेवहर्षणंकपीप्सितार्थवर्षणम्।
स्वबन्धुशोककर्षणंनमामि राममीश्वरम्॥

गतारिराज्यरक्षणंप्रजाजनार्तिभक्षणम्।
कृतास्तमोहलक्षणंनमामि राममीश्वरम्॥

हृताखिलाचलाभरंस्वधामनीतनागरम्।
जगत्तमोदिवाकरंनमामि राममीश्वरम्॥

इदं समाहितात्मनानरो रघूत्तमाष्टकम्।
पठन्निरन्तरं भयंभवोद्भवं न विन्दते॥

॥ इति श्री रामाष्टकं सम्पूर्णम् ॥

Read in More Languages:

• hindiश्री रामचन्द्राष्टकम्
• hindiश्री राम प्रेमाष्टकम्
• sanskritश्री रघुनाथाष्टकम्
• gujaratiશ્રી રઘુનાથાષ્ટકમ્
• teluguశ్రీరఘునాథాష్టకం
• odiaଶ୍ରୀରଘୁନାଥାଷ୍ଟକମ୍
• englishShri Ram Ashtakam
• englishShri Ramachandra Ashtakam
• englishShri Ramaprema Ashtakam

Found a Mistake or Error? Report it Now