|| ಸೋಮ ಸ್ತೋತ್ರ ||
ಶ್ವೇತಾಂಬರೋಜ್ಜ್ವಲತನುಂ ಸಿತಮಾಲ್ಯಗಂಧಂ
ಶ್ವೇತಾಶ್ವಯುಕ್ತರಥಗಂ ಸುರಸೇವಿತಾಂಘ್ರಿಂ.
ದೋರ್ಭ್ಯಾಂ ಧೃತಾಭಯಗದಂ ವರದಂ ಸುಧಾಂಶುಂ
ಶ್ರೀವತ್ಸಮೌಕ್ತಿಕಧರಂ ಪ್ರಣಮಾಮಿ ಚಂದ್ರಂ.
ಆಗ್ನೇಯಭಾಗೇ ಸರಥೋ ದಶಾಶ್ವಶ್ಚಾತ್ರೇಯಜೋ ಯಾಮುನದೇಶಜಶ್ಚ.
ಪ್ರತ್ಯಙ್ಮುಖಸ್ಥಶ್ಚತುರಶ್ರಪೀಠೇ ಗದಾಧರೋ ನೋಽವತು ರೋಹಿಣೀಶಃ.
ಚಂದ್ರಂ ನಮಾಮಿ ವರದಂ ಶಂಕರಸ್ಯ ವಿಭೂಷಣಂ.
ಕಲಾನಿಧಿಂ ಕಾಂತರೂಪಂ ಕೇಯೂರಮಕುಟೋಜ್ಜ್ವಲಂ.
ವರದಂ ವಂದ್ಯಚರಣಂ ವಾಸುದೇವಸ್ಯ ಲೋಚನಂ.
ವಸುಧಾಹ್ಲಾದನಕರಂ ವಿಧುಂ ತಂ ಪ್ರಣಮಾಮ್ಯಹಂ.
ಶ್ವೇತಮಾಲ್ಯಾಂಬರಧರಂ ಶ್ವೇತಗಂಧಾನುಲೇಪನಂ.
ಶ್ವೇತಛತ್ರೋಲ್ಲಸನ್ಮೌಲಿಂ ಶಶಿನಂ ಪ್ರಣಮಾಮ್ಯಹಂ.
ಸರ್ವಂ ಜಗಜ್ಜೀವಯಸಿ ಸುಧಾರಸಮಯೈಃ ಕರೈಃ.
ಸೋಮ ದೇಹಿ ಮಮಾರೋಗ್ಯಂ ಸುಧಾಪೂರಿತಮಂಡಲಂ.
ರಾಜಾ ತ್ವಂ ಬ್ರಾಹ್ಮಣಾನಾಂ ಚ ರಮಾಯಾ ಅಪಿ ಸೋದರಃ.
ರಾಜಾ ನಾಥಶ್ಚೌಷಧೀನಾಂ ರಕ್ಷ ಮಾಂ ರಜನೀಕರ.
ಶಂಕರಸ್ಯ ಶಿರೋರತ್ನಂ ಶಾರ್ಙ್ಗಿಣಶ್ಚ ವಿಲೋಚನಂ.
ತಾರಕಾಣಾಮಧೀಶಸ್ತ್ವಂ ತಾರಯಾಽಸ್ಮಾನ್ಮಹಾಪದಃ.
ಕಲ್ಯಾಣಮೂರ್ತೇ ವರದ ಕರುಣಾರಸವಾರಿಧೇ.
ಕಲಶೋದಧಿಸಂಜಾತ ಕಲಾನಾಥ ಕೃಪಾಂ ಕುರು.
ಕ್ಷೀರಾರ್ಣವಸಮುದ್ಭೂತ ಚಿಂತಾಮಣಿಸಹೋದ್ಭವ.
ಕಾಮಿತಾರ್ಥಾನ್ ಪ್ರದೇಹಿ ತ್ವಂ ಕಲ್ಪದ್ರುಮಸಹೋದರ.
ಶ್ವೇತಾಂಬರಃ ಶ್ವೇತವಿಭೂಷಣಾಢ್ಯೋ ಗದಾಧರಃ ಶ್ವೇತರುಚಿರ್ದ್ವಿಬಾಹುಃ.
ಚಂದ್ರಃ ಸುಧಾತ್ಮಾ ವರದಃ ಕಿರೀಟೀ ಶ್ರೇಯಾಂಸಿ ಮಹ್ಯಂ ಪ್ರದದಾತು ದೇವಃ.
Found a Mistake or Error? Report it Now
