|| ಶ್ರೀ ಗಣೇಶ ಸ್ತೋತ್ರಂ (ಅಗ್ನಿ ಕೃತಂ) ||
ಅಗ್ನಿರುವಾಚ |
ನಮಸ್ತೇ ವಿಘ್ನನಾಶಾಯ ಭಕ್ತಾನಾಂ ಹಿತಕಾರಕ |
ನಮಸ್ತೇ ವಿಘ್ನಕರ್ತ್ರೇ ವೈ ಹ್ಯಭಕ್ತಾನಾಂ ವಿನಾಯಕ || ೧ ||
ನಮೋ ಮೂಷಕವಾಹಾಯ ಗಜವಕ್ತ್ರಾಯ ಧೀಮತೇ |
ಆದಿಮಧ್ಯಾಂತಹೀನಾಯಾದಿಮಧ್ಯಾಂತಸ್ವರೂಪಿಣೇ || ೨ ||
ಚತುರ್ಭುಜಧರಾಯೈವ ಚತುರ್ವರ್ಗಪ್ರದಾಯಿನೇ |
ಏಕದಂತಾಯ ವೈ ತುಭ್ಯಂ ಹೇರಂಬಾಯ ನಮೋ ನಮಃ || ೩ ||
ಲಂಬೋದರಾಯ ದೇವಾಯ ಗಜಕರ್ಣಾಯ ಢುಂಢಯೇ |
ಯೋಗಶಾಂತಿಸ್ವರೂಪಾಯ ಯೋಗಶಾಂತಿಪ್ರದಾಯಿನೇ || ೪ ||
ಯೋಗಿಭ್ಯೋ ಯೋಗದಾತ್ರೇ ಚ ಯೋಗಿನಾಂ ಪತಯೇ ನಮಃ |
ಚರಾಚರಮಯಾಯೈವ ಪ್ರಣವಾಕೃತಿಧಾರಿಣೇ || ೫ ||
ಸಿದ್ಧಿಬುದ್ಧಿಮಯಾಯೈವ ಸಿದ್ಧಿಬುದ್ಧಿಪ್ರದಾಯಕ |
ಸಿದ್ಧಿಬುದ್ಧಿಪತೇ ತುಭ್ಯಂ ನಮೋ ಭಕ್ತಪ್ರಿಯಾಯ ಚ || ೬ ||
ಅನಂತಾನನ ದೇವೇಶ ಪ್ರಸೀದ ಕರುಣಾನಿಧೇ |
ದಾಸೋಽಹಂ ತೇ ಗಣಾಧ್ಯಕ್ಷ ಮಾಂ ಪಾಲಯ ವಿಶೇಷತಃ || ೭ ||
ಧನ್ಯೋಽಹಂ ಸರ್ವದೇವೇಷು ದೃಷ್ಟ್ವಾ ಪಾದಂ ವಿನಾಯಕ |
ಕೃತಕೃತ್ಯೋ ಮಹಾಯೋಗೀ ಬ್ರಹ್ಮಭೂತೋ ನ ಸಂಶಯಃ || ೮ ||
ಯದಿ ಪ್ರಸನ್ನಭಾವೇನ ವರದೋಽಸಿ ಗಜಾನನ |
ತದಾ ಮಾಂ ಶಾಪಹೀನಂ ತ್ವಂ ಕುರು ದೇವೇಂದ್ರಸತ್ತಮ || ೯ ||
ತವ ಭಕ್ತಿಂ ದೃಢಾಂ ದೇಹಿ ಯಯಾ ಮೋಹೋ ವಿನಶ್ಯತಿ |
ತವ ಭಕ್ತೈಃ ಸಹಾವಾಸೋ ಮಮಾಸ್ತು ಗಣನಾಯಕ || ೧೦ ||
ಯದಾ ಸಂಕಟಸಂಯುಕ್ತಸ್ತದಾ ಸ್ಮರಣತಸ್ತವ |
ನಿಸ್ಸಂಕಟೋಽಹಮತ್ಯಂತಂ ಭವಾಮಿ ತ್ವತ್ಪ್ರಸಾದತಃ || ೧೧ ||
ಇತಿ ಶ್ರೀಮನ್ಮುದ್ಗಲೇ ಮಹಾಪುರಾಣೇ ದ್ವಿತೀಯಖಂಡೇ ಅಗ್ನಿ ಕೃತ ಶ್ರೀ ಗಣೇಶ ಸ್ತೋತ್ರಮ್ ||
Found a Mistake or Error? Report it Now
