শ্ৰী কামাক্ষীস্তুতি

|| শ্ৰী কামাক্ষীস্তুতি ||

ৱন্দে কামাক্ষ্যহং ত্ৱাং ৱৰতনুলতিকাং ৱিশ্ৱৰক্ষৈকদীক্ষাং
ৱিষ্ৱগ্ৱিশ্ৱম্ভৰায়ামুপগতৱসতিং ৱিশ্ৰুতামিষ্টদাত্ৰীম্ ।
ৱামোৰূমাশ্ৰিতাৰ্তিপ্ৰশমননিপুণাং ৱীৰ্যশৌৰ্যাদ্যুপেতাং
ৱন্দাৰুস্ৱস্ৱৰ্দ্ৰুমিন্দ্ৰাদ্যুপগতৱিটপাং ৱিশ্ৱলোকালৱালাম্ ॥

চাপল্যাদিয়মভ্ৰগা তটিদহো কিঞ্চেৎসদা সৰ্ৱগা-
হ্যজ্ঞানাখ্যমুদগ্ৰমন্ধতমসং নিৰ্ণুদ্য নিস্তন্দ্ৰিতা ।
সৰ্ৱাৰ্থাৱলিদৰ্শিকা চ জলদজ্যোতিৰ্ন চৈষা তথা
যামেৱং ৱিৱদন্তি ৱীক্ষ্য ৱিবুধাঃ কামাক্ষি নঃ পাহি সা ॥

দোষোৎসৃষ্টৱপুঃ কলাং চ সকলাং বিভ্ৰত্যলং সন্ততং
দূৰত্যক্তকলঙ্কিকা জলজনুৰ্গন্ধস্য দূৰস্থিতা ।
জ্যোৎস্নাতো হ্যুপৰাগবন্ধৰহিতা নিত্যং তমোঘ্না স্থিৰা
কামাক্ষীতি সুচন্দ্ৰিকাতিশয়তা সা পাতু নঃ সৰ্ৱদা ॥

দিশ্যাদ্দেৱি সদা ত্ৱদঙ্ঘ্ৰিকমলদ্ৱন্দ্ৱং শ্ৰিতালিষ্ৱলং
ৱৃত্তিং তৎস্ৱয়মাদধচ্চ ৱিমুখং দোষাকৰাডম্বৰে ।
সূৰ্যাদৰ্শহসন্মুখং শ্ৰুতিপথস্যাত্যন্তভূষায়িতং
নেত্ৰানন্দৱিধায়ি পঙ্কমধৰীকৃত্যোজ্জ্ৱলং সদ্ধৃতম্ ॥

কামাক্ষীপদপদ্ময়ুগ্মমনঘং কুৰ্যান্মদীয়ে মনঃ-
কাসাৰে ৱসতিং সদাপি সুমনস্সন্দোহসংৰাজিতে ।
সুজ্ঞানামৃতপূৰিতে কলুষতাহীনে চ পদ্মালয়ে
নিত্যং সৎকুমুদাশ্ৰিতে নিজৱসত্যাত্তপ্ৰভাৱে সদা ॥

কামক্ষীপদপদ্ময়ুগ্মনখৰাঃ সম্যক্কলাসংয়ুতাঃ
নিত্যং সদ্গুণসংশ্ৰিতাঃ কুৱলয়ামোদোদ্ভৱাধায়কাঃ ।
উৎকোচং দধতশ্চ পঙ্কজনুষাং সংৰোচকাঃ স্থানতঃ
শ্ৰেষ্ঠাদিন্দুনিৰাসকাৰিৱিভৱা ৰক্ষন্তু নঃ সৰ্ৱদা ॥

কামাক্ষীচৰণাৰৱিন্দয়ুগলীগুল্ফদ্ৱয়ং ৰক্ষতা-
দস্মান্ সন্ততমাশ্ৰিতাৰ্তিশমনং দোষৌঘৱিধ্ৱংসনম্ ।
তেজঃপূৰনিধানমঙ্ঘ্ৰিৱলয়াদ্যাকল্পসঙ্ঘট্টন-
প্ৰোদ্যদ্ধ্ৱানমিষেণ চ প্ৰতিশৃণন্নম্ৰালিৰক্ষামিৱ ॥

জঙ্ঘে দ্ৱে ভৱতাং জগত্ত্ৰয়নুতে নিত্যং ত্ৱদীয়ে মন-
স্সন্তোষায় মমামিতোৰ্জিতয়শঃসম্পত্তয়ে চ স্ৱয়ম্ ।
সাম্যোলঙ্ঘনজাঙ্ঘিকে সুৱপুষা ৱৃত্তে প্ৰভাসংয়ুতে
হে কামাক্ষি সমুন্নতে ত্ৰিভুৱনীসঙ্ক্ৰান্তিয়োগ্যে ৱৰে ॥

কামাক্ষ্যন্ৱহমেধমানমৱতাজ্জানুদ্ৱয়ং মাং তৱ
প্ৰখ্যাতাৰিপৰাভৱৈকনিৰতি প্ৰদ্যোতনাভং দ্যুতেঃ ।
সম্যগ্ৱৃত্তমতীৱ সুন্দৰমিদং সম্পন্নিদানং সতাং
লোকপ্ৰাভৱশংসি সৰ্ৱশুভদং জঙ্ঘাদ্ৱয়োত্তম্ভনম্ ॥

ঊৰূ তে ভৱতাং মুদে মম সদা কামাক্ষি ভো দেৱতে
ৰম্ভাটোপৱিমৰ্দনৈকনিপুণে নীলোৎপলাভে শুভে ।
শুণ্ডাদণ্ডনিভে ত্ৰিলোকৱিজয়স্তম্ভৌ শুচিত্ৱাৰ্জৱ-
শ্ৰীয়ুক্তে চ নিতম্বভাৰভৰণৈকাগ্ৰপ্ৰয়ত্নে সদা ॥

কামাক্ষ্যন্ৱহমিন্ধতাং নিগনিগপ্ৰদ্যোতমানং পৰং
শ্ৰীমদ্দৰ্পণদৰ্পহাৰি জঘনদ্ৱন্দ্ৰং মহত্তাৱকম ।
যত্ৰেয়ং প্ৰতিবিম্বিতা ত্ৰিজগতী সৃষ্টেৱ ভূয়স্ত্ৱয়া
লীলাৰ্থং প্ৰতিভাতি সাগৰৱনগ্ৰাৱাদিকাৰ্ধাৱৃতা ॥

বোভূতাং যশসে মমাম্ব ৰুচিৰৌ ভূলোকসঞ্চাৰতঃ
শ্ৰান্তৌ স্থূলতৰৌ তৱাতিমৃদুলৌ স্নিগ্ধৌ নিতম্বৌ শুভৌ ।
গাঙ্গেয়োন্নতসৈকতস্থলকচগ্ৰাহিস্ৱৰূপৌ গুণ-
শ্লাঘ্যৌ গৌৰৱশোভিনৌ সুৱিপুলৌ কামাক্ষি ভো দেৱতে ॥

কামাক্ষ্যদ্য সুৰক্ষতাৎ কটিতটী তাৱক্যতীৱোজ্জ্ৱল-
দ্ৰত্নালঙ্কৃতহাটকাঢ্যৰশনাসম্বদ্ধঘণ্টাৰৱা ।
তত্ৰত্যেন্দুমণীন্দ্ৰনীলগৰুডপ্ৰখ্যোপলজ্যোতিষা
ৱ্যাপ্তা ৱাসৱকাৰ্মুকদ্যুতিখনীৱাভাতি যা সৰ্ৱদা ॥

ৱস্তিঃ স্ৱস্তিগতা তৱাতিৰুচিৰা কামাক্ষি ভো দেৱতে
সন্তোষং ৱিদধাতু সন্ততমসৌ পীতাম্বৰাষ্টিতা ।
তত্ৰাপি স্ৱকয়া শ্ৰিয়া তত ইতঃ প্ৰদ্যোতয়ন্তী দিশঃ
কান্তেন্দ্ৰোপলকান্তিপুঞ্জকণিকেৱাভাতি যা সৌষ্ঠৱাৎ ॥

যন্নাভীসৰসী ভৱাভিধমৰুক্ষোণীনিৱিষ্টোদ্ভৱ-
ত্তৃষ্ণাৰ্তাখিলদেহিনামনুকলং সুজ্ঞানতোয়ং ৱৰম্ ।
দত্ৱা দেৱি সুগন্ধি সদ্গণসদাসেৱ্যং প্ৰণুদ্য শ্ৰমং
সন্তোষায় চ বোভৱীতু মহিতে কামাক্ষি ভো দেৱতে ॥

যন্মধ্যং তৱ দেৱি সূক্ষ্মমতুলং লাৱণ্যমূলং নভঃ-
প্ৰখ্যং দুষ্টনিৰীক্ষণপ্ৰসৰণশ্ৰান্ত্যাপনুত্ত্যা ইৱ ।
জাতং লোচনদূৰগং তদৱতাৎ কামাক্ষি সিংহান্তৰ-
স্ৱৈৰাটোপনিৰাসকাৰি ৱিমলজ্যোতিৰ্ময়ং প্ৰত্যহম্ ॥

ধৃত্যৈ তে কুচয়োৰ্ৱলিত্ৰয়মিষাৎ সৌৱৰ্ণদামত্ৰয়ী-
বদ্ধং মধ্যমনুত্তমং সুদৃঢয়োৰ্গুৰ্ৱোৰ্যযোৰ্দৈৱতে ।
সৌৱৰ্ণৌ কলশাৱিৱাদ্য চ পয়ঃপূৰীকৃতৌ সৎকৃতৌ
তৌ কামাক্ষি মুদং সদা ৱিতনুতাং ভাৰং পৰাকৃত্য নঃ ॥

পাণী তে শৰণাগতাভিলষিতশ্ৰেয়ঃপ্ৰদানোদ্যতৌ
সৌভাগ্যাধিকশংসিশাস্ত্ৰৱিহৰদ্ৰেখাঙ্কিতৌ শৌভনৌ ।
স্ৱৰ্লোকদ্ৰুমপঞ্চকং ৱিতৰণে তত্ততৃষাং তস্য ত-
ৎপাত্ৰালাভৱিশঙ্কয়াঙ্গুলিমিষান্মন্যে ৱিভাত্যত্ৰ হি ॥

দত্তাং দেৱি কৰৌ তৱাতিমৃদুলৌ কামাক্ষি সম্পৎকৰৌ
সদ্ৰত্নাঞ্চিতকঙ্কণাদিভিৰলং সৌৱৰ্ণকৈৰ্ভূষিতৌ ।
নিত্যং সম্পদমত্ৰ মে ভৱভয়প্ৰধ্ৱংসনৈকোৎসুকৌ
সংৰক্তৌ চ ৰসালপল্লৱতিৰস্কাৰং গতৌ সুন্দৰৌ ॥

ভূয়াস্তাং ভুজগাধিপাৱিৱ মুদে বাহূ সদা মাংসলৌ
কামাক্ষ্যুজ্জ্ৱলনূত্নৰত্নখচিতস্ৱৰ্ণাঙ্গদালঙ্কৃতৌ ।
ভাৱৎকৌ মম দেৱি সুন্দৰতৰৌ দূৰীকৃতদ্ৱেষণ-
প্ৰোদ্যদ্বাহুবলৌ জগত্ত্ৰয়নুতৌ নম্ৰালিৰক্ষাপৰৌ ॥

স্কন্ধৌ দেৱি তৱাপৰৌ সুৰতৰুস্কন্ধাৱিৱোজ্জৃম্ভিতা-
ৱস্মান্নিত্যমতন্দ্ৰিতৌ সমৱতাং কামাক্ষি দত্ৱা ধনম্ ।
কণ্ঠাসক্তসমস্তভূষণৰুচিৱ্যাপ্তৌ স্ৱয়ং ভাস্ৱৰৌ
লোকাঘৌঘসমস্তনাশনচণাৱুত্তম্ভিতাৱুদ্দ্যুতী ॥

গ্ৰীৱা কম্বুসমানসংস্থিতিৰসৌ কান্ত্যেন্দ্ৰনীলোপমা
পায়ান্মামনিশং পুৰাণৱিনুতে কামাক্ষি ভো তাৱকী ।
নানাৰত্নৱিভূষণৈঃ সুৰুচিৰা সৌৱৰ্ণকৈৰ্মৌত্তিক-
শ্ৰেষ্টোদ্গুম্ভিতমালয়া চ ৱিমলা লাৱণ্যপাথোনিধিঃ ॥

দেৱি ত্ৱদ্ৱদনাম্বুজং ৱিতনুতাচ্ছ্ৰেয়ঃ পৰং শাশ্ৱতম্ ।
কামাক্ষ্যদ্য মমাম্ব পঙ্কজমিদং যৎকান্তিলাভে (চ্ছয়া) ।
তোয়ে নূনমহৰ্নিশং চ ৱিমলে মঙ্ক্ত্ৱা তপস্যত্যলং
তৎসৌন্দৰ্যনিধানমগ্ৰ্যসুষমং কান্তালকালঙ্কৃতম্ ॥

নেত্ৰে তে কৰুণাকটাক্ষৱিশিখৈঃ কামাদিনিত্যদ্ৱিষো
বাহ্যামপ্যৰিসংহতিং মম পৰাকৃত্যাৱতাং নিত্যশঃ ।
হে কামাক্ষি ৱিশালতামুপগতে হ্যাকৰ্ণ মিষ্টাৱহে
সাতত্যেন ফলাৰ্থিনাং নিজগতেঃ সম্ফুলকং জায়তে ॥

ভ্ৰূয়ুগ্মং তৱ দেৱি চাপলতিকাহঙ্কাৰনিৰ্ৱাপণং
কান্তং মুগ্ধৱিকাসচেষ্টিতমহাভাগ্যাদিসংসূচকম্ ।
কামাক্ষ্যন্ৱহমেধতাং কৃতপৰিস্পন্দং ৰিপূদ্ৱাসনে
দীনানিঙ্গিতচেষ্টিতৈৰৱদিদং সুৱ্যক্তৰূপং পৰম্ ॥

নানাসূনৱিতানসৌৰভপৰিগ্ৰাহৈকলোলালয়ঃ
কিং মাং প্ৰত্যভিয়ন্তি নেতি কুপিতং তপ্ত্ৱা তপো দুষ্কৰম্ ।
নাসীভূয় তৱাতিসৌৰভৱহং ভূত্ৱাভিতঃ প্ৰেক্ষণ-
ৱ্যাজেন প্ৰিয়কপ্ৰসূনমলিভিঃ কামাক্ষি ভাত্যাশ্ৰিতম্ ॥

ৱক্ত্ৰং পাতু তৱাতিসুন্দৰমিদং কামাক্ষি নঃ সৰ্ৱদা
শ্ৰীমৎকুন্দসুকুড্মলাগ্ৰদশনশ্ৰেণীপ্ৰভাশোভিতম্ ।
পুষ্যদ্বিম্বফলাৰুণাধৰপুটং সদ্ৱীটিকাৰঞ্জিতং
সৌভাগ্যাতিশয়াভিধায়িহসিতশ্ৰীশোভিতাশাগণম্ ॥

সন্তোষং শ্ৰুতিশষ্কুলীয়ুগমিদং সদ্ৰত্নশোভাস্ফুৰ-
ত্তাটঙ্কাঢ্যযুগেন ভাস্ৱৰৰুচা সম্ভূষিতং তাৱকম্ ।
কামাক্ষ্যদ্য চৰীকৰীতু ৱিমলজ্যোতিৰ্মমানাৰতং
স্ৱাভ্যাশস্থিতগণ্ডভাগফলকং সৰাজয়জ্জ্যোতিষা ॥

শীৰ্ষং তে শিৰসা নমামি সততং কামাক্ষ্যহং সুন্দৰং
সূক্ষ্মং তন্মধুপালিনীলকুটিলশ্ৰীকুন্তলালঙ্কৃতম্ ।
সীমন্তং সুৱিভজ্য তত্ৰ ৱিপুলশ্ৰীমন্মণীন্দ্ৰানিত
স্ৱৰ্ণালঙ্কৰণপ্ৰভাসুৰুচিৰং শীৰ্ষণ্যভূষায়িতম্ ॥

কামাক্ষীশ্ৱৰি কোটিসূৰ্যনিনসদ্ৱজ্ৰাদিৰত্নাঞ্চিত-
শ্ৰীমন্মুগ্ধকিৰীটভৃদ্ৱিতৰতাদ্ধন্যং শিৰস্তাৱকম্ ।
সম্পত্তিং নিতৰাং মমাম্ব মনুজাপ্ৰাপ্যামিহানাৰতং
লোকেঽমুত্ৰ ভৱাভিধং ৱ তিমিৰং লূত্ৱা সদালিশ্ৰিতম্ ॥

কামাক্ষীস্তুতিমন্ৱহং ভুৱি নৰাঃ শুদ্ধাশ্চ যে ভক্তিতঃ
শৃণ্ৱন্ত্যত্ৰ পঠন্তি ৱা স্থিৰধিয়ঃ পণ্যামিমামৰ্থিনঃ ।
দীৰ্ঘায়ুৰ্ধনধান্যসম্পদমমী ৱিন্দন্তি ৱাণীং যশঃ
সৌভাগ্যং সুতপৌত্ৰজাতমধিকখ্যাতিং মুদং সৰ্ৱদা ॥

কৌণ্ডিন্যান্ৱয়সম্ভূতৰামচন্দ্ৰাৰ্যসূৰিণা ।
নিৰ্মিতা ভাতি কামাক্ষীস্তুতিৰেষা সতাং মতা ॥

ইতি শ্ৰীকামাক্ষীস্তুতিঃ সম্পূৰ্ণা ।

Found a Mistake or Error? Report it Now